٢٤ نیسانێ ھەردەم رۆژەکا خەمگینە ل دەڤ ئەرمەنێن جیھانێ، چونکو رۆژا قرکرنا ئەرمەنان بوویە ژ لایێ دەولەتا ئوسمانی ڤە و ھەر ھندک بۆ دەڤەرەکێ چوون و د ڤێ فەرمانێ دا گەلەکان قەستا باشوورێ کوردستانێ کر، نوونەرێ ئەرمەنێن کوردستانێ ل پەرلەمانێ کوردستانێ د دیدارەکێ دا ل گەل رۆژناما ئەڤرۆ ئاشکراکر کو ھەتا (٢٥٠٠) ئەرمەنان ل باشوور ھەنە و لێ دژین.

ئەڤرۆ، سالار دۆسکی:
یەروانت نیسان مارکوس ئەمینیان، ئەندامێ پەرلەمانێ کوردستانێ کو تاکە نوونەرێ ئەرمەنانە ل پەرلەمانێ کوردستانێ د دیدارەکا رۆژناما ئەڤرۆ دا دیار کر، پشتی دەولەتا ئوسمانی فەرمانا نەھێلان و قرکرنا ئەرمەنان دەرکری، ل دەڤەرێن ئەنادول و سنورێ دەولەتا ئوسمانیان رێکەفتی ٢٤-٤- ١٩١٥ رابوون ب گرتنا رەوشەنبیر و نوشدار و نڤیسەرێن ئەرمن و ل ستەنبوولێ کوشتن، پاشی ل ویلایەتا ( محافگە) دستپێکر و ل دەڤەرێن (موشێ، قوس، دیاربەکر، دێرسم) دەڤەرێن ئەرمەن تێدا ھەموو گرتن و ئەرمەنێن باشوورێ کوردستانێ ژ وان بووینە ئەوێن، ئەڤ فەرمانە ژێگرتی.
ئەندامێ پەرلەمانێ کوردستانێ زێدەتر گۆت: ئەرمەن ل ئەرمنستانێ دژین و ل گەلەک وەلاتان وەک، ( ئەمریکا، روسیا، فەرنسا، جورجیا، لوبنان، سوریا، ئوکرانیا، ئیران، ئەرجەنتین، تورکیا، کەندا، ئەلمانیا، ئوسترالیا، بەرازیل، بلغاریا، عیراق، یونان، مسر، ئوردن، ئیسرائیل و فەلەستین)، ھەژمار ھەموو ئەرمەنێن دونیایێ نێزیکی ٨ ملیۆنانە و ل ئەرمەنستانێ (٢) ملیۆنن.
یەروانت ئاماژە دا وێ چەندێ، ل عیراقێ دو جۆرێن ئەرمەنان ھەنە، دەمێ دەولەتا عەباسی و باشورێ کوردستانێ دەمێ جینوسایدا دژی ئەرمەنان ژ لایێ دەولەتا ئوسمانی ڤە ھاتیەکرن، قەستا باشورێ کوردستانێ کرینە، دیسان ئەرمەنان تایبەتمەندیا خوە ھەیە وەک شارستانی و ھەر تشتەکێ گریدایی ب ژیانا ئەرمەنان ڤە و ھەتا ل مۆزیکێ ژی تایبەتمەندیا خوە ھەیە.
نوونەرێ ئەرمەنێن کوردستانێ ل پەرلەمانێ کوردستانێ دیار کر کو جوداھی دناڤبەرا کرستیان و ئەرمەنان دا، زمان و نەتەوەیە و وەک ئاین ئێک بووینە، پشتی سەرھلدانا پیرۆز ل سالا ١٩٩١ وەک زمان ماف ھەیە و ھەر کەسەک دشێت بزمانێ خوە بخوینیت، دیسان ھەموو مافێن رەوشەنبیری و جڤاکی ھەنە، حوکمەتا ھەرێما کوردستانێ دو دێر ئاڤاکرینە، دئێک ل دھۆکێ و یا دی ل گوندێ ھاورێسکێ ل زاخۆ ھاتیە ئاڤاکرن، دیسا گوندێ ئاڤزریکا بۆ ئەرمەنان خانی ھاتینە نووژەنکرن، دیسان ئەرمەنان سێ قوتابخانە ھەنە کو زمانێ دایکێ یێ ئەرمەنی تێدا دھێتە خواندن، ئێک ل زاخۆ، دیسان دو ل گوندێن ئەرمەن تێدا دنشتەجێ دو قوتابخانە بۆ ھاتینە ئاڤاکرن.
یەروانت نیسان خویاژی کر، ل کوردستانا باشوور ئەرمەنان ماف ھەیە سەرەدانا دەرڤە بکەن، ب گشتی ئەرمەن ل کوردستانا باشور خەلکێ ڤی وەلاتی نە و ل گەل برایێن خوە یێن کورد ژیاینە، ئەوێن نوکە ل دەرڤەی وەلاتی گومان نینە ھەر ھزرا ڤێ ئاخێ دکەن، چونکە ل گەل ژیاینە.
یەروانت گۆت ژی: داخوازێ ژ سەرکرداتیا کوردستانێ دکەین زێدەتر پەیوەندیێن خوە ل گەل ئەرمنستانێ خوەش بکەت ب ڤەکرنا ئینستویوتەکا کوردی ئەرمەنی ل باشوورێ کوردستانێ و گۆت: ھەتا نوکە جینوسایدا ئەرمەنان ل کوردستانێ نەھاتیە نیاسین وەک جینوساید و قرکرنا ئەرمەنان ژ لایێ دەولەتا ئوسمانی ڤە، ل دووڤ دەستوری و مادێ (١١٠) ئەڤە دەستھەلاتێن حوکمەتا مەرکەزی نە و ئەز ژی وەک نوونەرێ ئەرمەنان دێ ھەموو دەرگەھا قوتم کو ئەڤ چەندە بھێتە پەسەندکرن.