ئەڤرۆ نیوز:
جان لودریان وەزیرێ دەرڤە یێ فرەنسا راگەهاند کو ئەو ب چو رەنگەکێ رێ نادەن تورکیا بابەتێ کۆچبەران وەکو کارتەکێ ل دژی وەلاتێن ئێکەتیا ئورۆپا بکار بینیت.
ناڤهاتی راگەهاند ژی دڤێت تورکیا کار بۆ چارەسەریەکا سیاسی ل سووریێ بکەت و دەستان ژ ئالۆزکرنا رەوشا سووریێ بەردەت، چونکو هەتا رەوشا ئالۆز یا سووریێ بەردەوام بیت دێ خەلکێ سڤیل کۆچبەر بن.
ئەڤرۆ نیوز:
ئەڤرۆ سەرۆکێ حوکمەتا هەرێما کوردستانێ مەسرور بارزانی سەرپەرشتیا کۆمبوونەکا تایبەت ل دۆر خوە پاراستنا ل ڤایرۆسێ کۆرۆنا کر و پاشی ژی چەندین بریارێن گرنگ ژ بۆ پاراستنا وەلاتیان هاتنە دان.
ئێک: پشتی کو چەندین حالەتێن کۆرۆنا ل سلێمانیێ هاتنە تۆمار کرن ژ بۆ پتر پاراستنا وەلاتیان بەری نها بریارا راگرتنا خواندنێ هاتبوو دان نها ژی بریار هاتە دان کو هەموو رێورەسمێن ئایینی (مزگەفت، کلیسا و پەرستگاه) ل گەل گۆتارا هەینیێ بۆ دەمەکێ نەدیار بهێنە راگرتن.
دو: دڤێت هەموو پێدڤاتێن نوشداری بهێنە دابینکرن و قەرەنتیا حالەتێن گومانای و هەروەسا پتر پشکنین ل خالێن سنوری بهێنە کرن.
سێ: پێدڤیە رێنمایێن خالێن سنوری بهێنە توندکرن و یا پێدڤی بهێتە کرن بێی کو چو کارتێکرنا خوە ل بزاڤا بازرگانی بکەت.
چار: ژ بۆ رەوشا نها نەبیتە بارگرانی ل سەر بازرگانان ئەنجوومەنێ وەزیران بریار دا کو وەزیرێن پەیوەندیار ب بابەتی چاڤخشاندنێ ب باج و رسوماتێن دی بهێتە کرن دا ئەو یەک نەبیتە بارگرانی و زیانێن مادی ژی بهێنە کێمکرن.
٥: پێدڤیە ل کەمپێن ئاواران ژی هەموو کارێن پێدڤی بهێنە کرن و حوکمەتا هەرێما کوردستانێ ژ بۆ هندێ دێ ل گەل رێکخراوێن جیهانی ژی هەماهەنگیێ کەت.
ئەڤرۆ نیوز:
ل دەوروبەرێن ئدلبێ هێزێن رژێما سووریێ ب چەکێن گران و سڤک هێرشی چەندین خالێن چاڤدێریێ یێن سەربازێن تورکیا کرن و رێکخراوا چاڤدێریا مافێن مرۆڤی یا سووریێ ژی دیار دکەت کو د ئەنجاما هێرشێن هێزێن سووریا دا چەندین سەربازێن تورکیا هاتینە کوشتن.
ل ئالیێ دی روسیا ژی راگەهاند ئەو رێ نادەن تورکیا فرۆکێن شەری ل سووریێ بکار بینیت.
ئەڤرۆ نیوز:
رێڤەبەریا خوەسەر یا رۆژئاڤایێ کوردستانێ راگەهاند کو تورکیا بوویە ئەگەرێ هندێ شەرێ ل سووریێ بەردەوام بیت و تورکیا ناهێلیت رەوشا سووریێ ئارام بیت، ژ بەر هندێ ژی نها تورکیا بابەتێ کۆچبەران وەکو کارتەکێ ل دژی ئورۆپا بکار دئینیت و دڤێت ئورۆپا ل هەمبەر کریارێن تورکیا بێدەنگ نەبیت.
رێڤەبەریا خوەسەر ئاماژە ب هندێ ژی کریە کو دڤێت رێگری ل بزاڤێن تورکیا یێن بۆ داگیرکرنا ئاخا سووریێ بهێتە کرن.
ئەڤرۆ نیوز:
د راگەهاندنەکێ دا رێڤەبەریا گشتی یا نەهێلانا ماددەیێن هوشبەر راگەهاند د دو چالاکیێن جودا دا ل باژارێ هەولێرێ و سوران سێ کەسێن بازرگان ب مادیێن هوشبەر هاتنە دەستە سەر کرن.
هەر د وێ راگەهاندنێ دا هاتیە دیار کرن ل رێکەڤتی ٤/٣/٢٠٢٠ ل دویف هندەک پێزانینان و ب هەماهەنگی دگەل رێڤەبەریا گشتی یا نەهێلانا ماددێن تاوانێن رێکخراو یا سەر ب ئاژانسا پاراستنێ ڤە هێزێن وان شیان بازرگانەکێ دگەل پێنچ کێلو گرامێن ماددیێن هوشبەر ژ جورێ هیرویین ل هەولێرێ دەست ب سەر دا بگرن، هەر ل رێکەڤتی ٢/٣/٢٠٢٠ ژلایێ بنگەهێ نەهێلانا ماددیێن هوشبەر ل قەزا سوران شیان دو تومەتبارێن خەلکێ هەولێرێ ل بازگەها بێخالێ دەستە سەر بکەن و دگەل دا ژی سێ (٣,٥٤٣) کێلو گرامێن ماددەیێن هوشبەر ژ جورێ حەشیش و ٤٨ گرام ژ جورێ کریستال و ٣٩٠٠ دولارێن ئەمریکی یێ سەختە دگەل وان دو کەسان دا بهێنە دەستە سەر کرن .
و هاتیە دیار کرن ژی تاوانبارێن وێ کەیسێ بۆ دادگەهێ هاتنە رەوانە کرن ژ بۆ وێ چەندێ ڤەکولین دگەل وان تاوانباران بهێتە کرن.
ئەڤرۆ نیوز:
وەزارەتا بەرەڤانیێ یا روسیا راگەهاند کو تورکیا ل سووریێ قانوونێن نێڤدەولەتی بنپێ دکەت و هێزێن سەربازی رەوانەی ئدلبێ دکەت.
وەزارەتا بەرەڤانیێ یا روسیا دیار ژی کر کو حوکمەتا سووریێ ل ئدلبێ شەرێ تیرۆرستان دکەت و دڤێت ئاخا خوە ژ تیرۆرستان پاقژ بکەت، ژ بەر هندێ ژی ئەو وەکو روسیا پشتەڤانیێ ل حوکمەتا سووریێ دکەن لێ مخابن تورکیا پشتەڤانیێ ل تیرۆرستان دکەت و ئەو یەک ژی ب چو رەنگەکێ ناهێتە قەبوولکرن.
ئه‌ڤرۆ نیۆز، عه‌زیز هه‌ورامی:
پاش ئه‌وه‌ی ماموستاییه‌كی ئاینی له سلێمانی گیانی له‌ده‌ستدا به ڤایرۆسی كۆرۆنا لیژنه‌ی فتوا و پارێزگار و به‌ڕێوه‌به‌رایه‌تی ئه‌وقافی سلێمانی بڕیاریاندا، نوێژی به‌كۆمه‌ڵ ڕابگیردرێت و ئه‌م هه‌فته‌یه‌ش نوێژی هه‌ینی له مزگه‌وته‌كان ناكرێت.
دكتۆر ئه‌حمه‌د شافعی ئه‌ندامی لیژنه‌ی فتوا له مزگه‌وتی سلێمانی، به ئه‌ڤرۆ نیۆزی ڕاگه‌یاند:” بڕیارماندا به‌وه‌ی هه‌موو نوێژه به‌كۆمه‌ڵه‌كان له مزگه‌وه‌ته‌كان ڕابگیردرێن بۆ كاتێكی نادیار و ته‌نها له مزگه‌وته‌كان بانگ ده‌درێت و پاش بانگه‌كه بانگ بێژه‌كه داوا له موسڵمانان ده‌كات له ماڵه‌كانی خۆیان نوێژه‌كانیان بكه‌ن.
هه‌روه‌ها ئاماژه‌ی به‌وه‌كرد، بڕیاردرا بۆ ئه‌م هه‌فته‌یه نوێژی هه‌ینی له مزگه‌وته‌كان ڕابگیردرێت، پاشان له‌سه‌ر ڕه‌وشی ڤایرۆسه‌كه بڕیاری ترده‌درێت بۆ هه‌فته‌كانی تر. ناوبراو ده‌ڵێ، له‌به‌ر ئه‌وه‌ی ئه‌م نه‌خۆشیه له ڕێگه‌ی ته‌وقه و كۆكه و پژمین ده‌گوازرێته‌وه له نێوان مرۆڤه‌كان به‌پێویست زاندرا نوێژی به‌كۆمه‌ڵ له ئێستادا له مزگه‌وته‌كان ڕابگرین.
ئه‌ڤرۆ نیوز:
په‌یڤدارێ وه‌زاره‌تا ساخله‌میا حكومه‌تا هه‌رێما كوردستانێ راگه‌هاند: پیدڤیه تێكه‌لیكرن بهێته سنورداركرن هه‌كه مه‌ترسیا تووشبوونێ ب كورونایێ زێده‌تر دبیت.
پشتی توماركرنا 6 حاله‌تێن كورونایێ ل سلێمانیێ، ته‌ڤایا لایه‌نێن په‌یوه‌ندیدار ئاشكراكرن، كۆ پێدڤیه ته‌ڤایا هه‌لكه‌فت و پرسه و ئاهه‌نگ ل هه‌رێما كوردستانێ بهێنه راوه‌ستاندن و داخازا بجهكرنا رێنمایێن وه‌زاره‌تا ساخله‌میا حكومه‌تێ بكه‌ن.
د.محه‌مه‌د قادر په‌یڤدارێ وه‌زاره‌تا ساخله‌میا حكومه‌تا هه‌رێما كوردستانێ راگه‌هاند: تانوكه بتنێ 6 حاله‌ت هه‌نه، هه‌ر كه‌سێ نیشانه‌كا ڤایرۆسی هه‌بیت دێ چاڤدێریا وی و پشكنینێن پێدڤی بۆ هێنه‌كرن.
ناڤبری ئه‌و چه‌نده ژی راگه‌هاند: مه ئه‌ڤه چه‌ندین جارا راگه‌هاند و دێ هه‌ر بێژین دیر بكه‌ڤن ژ تێكه‌لی و جهێن قه‌ره‌بالغ و هاتنوچونێ سنوردار بكه‌ن، خو هه‌تا دناڤ ئه‌ندامێن خێزانێ ژی ژێك دیر بكه‌ڤن.
ئه‌ڤرۆ نیوز،عه‌لی حاجی :
تیمێن ساخله‌میێ ب سه‌ر رێڤه‌به‌ریا گشتی یا ساخله‌میێ ل پارێزگه‌ها دهوكێ به‌رده‌وامن ل سه‌ر به‌لاڤ كرنا رینمایێن تایبه‌ت خوه پاراستنێ ژ ڤایروسێ كورونایێ دناڤ هێزێن پێشمه‌رگه‌یێ كوردستانێ دا.
دكتور ره‌عه‌د محه‌مه‌د بۆ ئه‌ڤرۆ نیوز گۆت: هێزێن پێشمه‌رگه‌یێ كوردستانێ د ئاماده‌باشیێ دانه بۆ هه‌ر شه‌ره‌كێ نه‌چاڤه‌رێكری له‌ورا ئه‌م دبینن و ئه‌ڤا دهێته كرن شه‌ره‌كێ جیهانی یه دگه‌ل ڤی ڤایرۆسی دهێته كرن،له‌ورا وه‌كو تیما ساخله‌میێ سه‌ره‌دانێن مه به‌رده‌وامن بۆ ناڤ هێزێن پێشمه‌رگه‌یێ كوردستانێ و پێشتر ژی مه سه‌ره‌دانا سحێلا كر بوو و ئه‌ڤرۆ ژی ل سوپایێ چار ل كومه‌لگه‌ها هیزاوا و رۆژێن دویڤ دا ژی دێ سه‌ره‌دانێن مه بۆ باتێلێ و ئاكرێ به‌رده‌وام بن دا كو ب شێوه‌یه‌كێ زانستی ئه‌م چاوانیا خۆ پاراستنێ بگه‌هیننه هێزێن پێشمه‌رگه‌یی و ئه‌وژی ژلایێ خۆ ب شێوه‌یێن زانستی وان رێنمایان ل هێزێن دیترێن پێشمه‌رگه‌یی به‌لاڤ بكه‌ن .
و گوت ژی : پێشكێش كرنا سیمنارێن ب ڤی ره‌نگی دناڤ رێڤه‌به‌ریێن حكومه‌تێ و ته‌خێن گرنگێن جڤاكی به‌رده‌وامن و ئارمانجا سه‌ه‌ركی ژی ئه‌وه ئه‌م بشێن ب رێكێن زانستی سه‌ره‌ده‌ریێ دگه‌ل خوه پاراستنا ڤایروسێ كورونایێ بكه‌ین .
نيشاندان