ئەڤرۆ نیوز:
ژ ئەگەرێ بارینێ بەفرێ رێیا ٦٤٥ گوندان ل پارێزگەهێن وان، جۆلەمێرگ، به‌دلیس و مووشێ ل باکورێ کوردستانێ هاتینە گرتن.
لدووڤ راگەهاندنا باژێرڤانیا وانێ، ژ ئەگەرێ بارینا بەفرێ د ناڤ باژێرێ وانێ دا رێیا ٢٩٤ گوند و جهان ل وێ پارێزگەهێ هاتنە گرتن، باندورەکا نەرێنی ل سەر ژیانا ولاتیان ژی کریە.
هەروەسا ل بدلیسێ ژی رێیا ١٥٣ گوندان و ل مووشێ ژی رێیا ١٢٥ گوندان و ل جۆلەمێرگێ ژی رێیا ٦٣ گوندان هاتینە گرتن.
ئەڤرۆ نیوز:
یوکسەل گەنج رێڤەبەریا ناڤەندا ڤەکۆلینێن سیاسی و جڤاکی ل باکورێ کوردستانێ کو ڤەکۆلینێن مەیدان دکەت راگەهاند کو د ئەنجاما ڤەکۆلینەکا وان یا مەیدانی ل باکورێ کوردستانێ دا دەرکەفت کو ب تنێ ٤٠% کوردان ب کوردی دئاخڤن و یێن دی ب زمانێ تورکیا دئاخڤن.
ل گۆر هەمان ڤەکۆلینێ د ناڤ زارۆیێن کورد دا رێژا ئاخڤتنا ب زمانێ کوردی تنێ ١٠% و ئەو یەک ژی کارەساتەکا مەزنە و زمانێ کوردی ل باکورێ کوردستانێ بەر ب نەمانێ ڤە دچیت.
ئەڤرۆ نیوز:
رەجەب تەیب ئەردۆگانێ سەرۆک کۆمارێ تورکیا راگەهاند کو ل ئدلبێ هێرشی سەربازێن تورکیا دهێنە کرن و گۆت: (یێن هێرشی هێزێن مە دکەن دڤێت بزانن کو تورکیا دێ گورزێن گران ل وان دکەت، سپێدێ وەکو تورکیا دێ بەرنامێ خوە ل دژی ئدلبێ ئاشکرا کەین و بلا کەس ژی چاڤەرێ نەبیت کو ئەم هێزێن خوە ژ ئدلبێ ڤەکێشین).
ئەو یەک د دەمەکێ دایە کو ئەڤرۆ دو سەرۆکێن پارتێن سیاسی ل تورکیا ژی دیار کرن کو دڤێت تورکیا هێرشی ئدلبێ بکەت و ژ رژێما سووریێ پاقژ بکەت.
ئه‌ڤرۆ نیۆز، عه‌زیز هه‌ورامی:
سه‌رچاوه‌یه‌كی تایبه‌ت به ئه‌ڤرۆ نیۆزی ڕاگه‌یاند” ئه‌و گه‌نجه كورده‌ی 15 ڕۆژ له‌مه‌وبه‌ر له ڕێگای ناحیه‌ی جه‌له‌ولا له‌گه‌ڵ 8 كه‌سی تر له‌لایه‌ن گروپێكی تیرۆرستی داعش فڕێندراوه به‌ناوی (هه‌ڵۆ نووری )دانیشتوی ناحیه‌ی زه‌ڕایه‌نی سه‌ربه‌قه‌زای شاره‌زوور، ئه‌مڕۆ 11/2/2020 كاتژمێر 12 بۆ 1ی نیوه‌ڕۆ ته‌له‌فۆنێك بۆ خانه‌واده‌كه‌ی دێت و كه‌سێك به‌زمانی عه‌ره‌بی قسه‌ده‌كات و خۆی به‌چه‌كداری داعش ده‌ناسێنێت، ده‌ڵێ، (هه‌ڵۆ نووری) لای ئێمه‌یه.
سه‌رچاوه تایبه‌ته‌كه وتیشی” ئه‌وكه‌سه‌ی خۆی به‌چه‌كداری داعش ناساندووه داوای 10 ده‌فته‌ر دۆلاری كردووه له به‌رامبه‌ر ئازاد كردنی گیانی (هه‌ڵۆ نووری) به‌ڵام پاش گفتوگۆییه‌كی زۆر ده‌ڵێ، ته‌نها به 7 ده‌فته‌ر دۆلار پێتان ده‌ده‌ینه‌وه.
هه‌ڵۆ نووری خه‌ڵكی ناحیه‌ی زه‌ڕایه‌نی سه‌ربه قه‌زای شاره‌زوور ته‌مه‌نی له نێوان 20 بۆ 21 ساڵ ده‌بێت و خێزانداره و هاوسه‌رگیری له‌گه‌ڵ كچێكی به‌ڕه‌گه‌ز عه‌ره‌ب كردووه، له ماوه‌ی ڕابردوو بۆ سه‌ردانی ماڵه خه‌زوورانی ده‌ڕوات بۆ جه‌له‌ولا و له‌گه‌ڵ 8 كه‌سی تردا ده‌كه‌وته سه‌یته‌ره‌یه‌كی چه‌كدارانی داعش و ده‌فڕێندرێن.
ئەڤرۆ نیوز:
ویلیام رۆباک شیرەتکارێ ئەمریکا د هەڤپەیمانیا نێڤدەولەتی یا شەرێ ل دژی داعشێ سەرەدانا بارەگایێ ئەنجوومەنێ نشتیمانی یێ کوردی ل سووریێ کر و ل گەل بەرپرسێن ئەنەکەسێ کۆمبوو.
پشتی کۆمبوونێ ژی ئەنەکەسێ راگەهاند کو ل گەل شاندێ ئەمریکی بەحسێ رەوشا سووریێ و رۆژئاڤایێ کوردستانێ هاتیە کرن و ئەمریکا دلخوەشیا خوە ل هەمبەر ڤەکرنا بارەگایێن ئەنەکەسێ و دەستپێکرنا قۆناغەکا نوو یا د ناڤبەرا پارتێن کوردی ل رۆژئاڤایێ کوردستانێ دا دیار کریە.
ئەڤرۆ نیوز، نەوزاد هلۆری:
هه‌رده‌ما به‌فر بارى و دوڤدا ئاسمان بویه ساهى، هه‌موو جادده‌یێن ده‌ڤه‌را ئامێدیێ و دینارته و کانی ماسێ و زاویتە و سەرسنکێ و دەڤەرێن دی دبنه به‌ستى، ب ب خوێ نه‌بیت رێ ناهێنه ڤه‌كرن.
سه‌رجون خوشابا، سه‌رۆكێ باژێرڤانیا سه‌رسنكێ دیاركر كو پرانیا رێیێن سه‌رسنكێ ژ ئه‌گه‌رێ به‌ستیبوونێ هاتینه گرتن و بۆ ئەڤرۆ نیوز گۆت: (ب مه‌ره‌ما ڤه‌كرنا رێیا و نه‌هێلانا ئاسته‌نگان هه‌مبه‌رى شوفێران ب تایبه‌تى ل سه‌نته‌رێ باژێرى، باژێرڤانیا سه‌رسنكێ ژ شه‌ڤا بورى هه‌تا ئێڤارى ل سه‌ر ڤه‌كرنا رێیا به‌رده‌وامه و پرانیا رێیا ب خوێ هاتینه ڤه‌كرن، به‌لێ هێشتا ژى هنده‌ك ماینه، ئه‌گه‌ر ب خوێ نه‌بیت رێ ژ به‌ر به‌ستیبوونێ ناهێنه ڤه‌كرن).
فوئاد میكائیل، سه‌رۆكێ باژێرڤانیا دینارته دیاركر كو چیایێ پیرس ژى ب تمامى بویه به‌ستى بۆ ئەڤرۆ نیوز گۆت: (هه‌ر چه‌نده تیمێن مه پشكه‌ك ژ رێیێن سنورێ دینارتێ ڤه‌كرینه ب تایبه‌تى یێن سه‌نته‌رێ دینارتێ، به‌لێ رێیا سه‌ره‌كى یا چیایێ پیرس ب تمامى بویه به‌ستى و هاتن و چوون نینه، له‌وا داخوازێ ل وه‌لاتیان و شوفێران دكه‌ین هه‌تا كو به‌ستى نه حه‌لیێت قه‌ستا پیرس نه‌كه‌ن، مه وه‌كو باژێرڤانى ده‌ست ب ره‌شاندنا خوێ كریه ب تایبه‌تى ل لوفێن زه‌حمه‌ت و سیبه‌ر ژبه‌ر هه‌تا ئێڤارى به‌ستى دمینیت).
كامیران محه‌مه‌د سه‌رۆكێ باژێرڤانیا كانى ماسێ بۆ ئەڤرۆ نیوز گۆت: (شه‌ڤا بورى پێله‌كا بهێز یا به‌فرێ ده‌ڤه‌را به‌روارى بالا و كانى ماسێ بخوڤه گرت و هه‌موو رێیێن هاتن و چوونێ هاتنه گرتن، تیمێن مه هه‌موو ئه‌و رێیێن دكه‌ڤنه سه‌نته‌رێ باژێرى ل گه‌ل هنده‌ك رێیین ده‌وروبه‌ر پێخه‌مه‌ت خوشكرنا رێیا و نه‌هێلانا ئاسته‌نگا هاتن و چوونێ ژ به‌فرێ پاقژكرن، به‌لێ ل هنده‌ك جادده‌یان به‌ستى دروست بوویه و پێدڤى یه شوفێر زور هوشیارێ خوه بن).
رەمەزان سالح، سەرۆکێ باژێرڤانیا زاویتە بۆ ئەڤرۆ نیوز گۆت: (ئەڤرۆ مە رێیێن زاویتە ب خوێ ڤەکرن، چونکی هەموو ببویە بەستی، ب تایبەتی رێیا گەلیێ زاویتە کو جهەکێ گەشتوگۆزاری یە).
هه‌ر ئێك ژ باژێرڤانیێن ئامێدیێ، چه‌مانكێ، بامه‌ڕنێ و دێره‌لووكێ ژى ل سنوورێ باژێرڤانیێن خوه جادده ژ به‌فرێ پاقژكرینه.
نيشاندان