ئەڤرۆ نیوز،عەلی حاجی:

پشتی ل ١/٨/٢٠١٩ گەنجه‌کێ زاخۆ بناڤی دژیێ ٢١ سالیێ دا بناڤێ ئەمیر عەبدولعەزیز بەرەڤ وەلاتێ تورکیا ڤە دچیت و ل رێکەڤتی ١/٩/٢٠١٩ ب مەرەما چوونێ بۆ وەلاتێن ئەوروپی د ئاڤا دناڤبەرا وەلاتێ تورکیا و یونان دا دخەندقیت.

موستەفا محەمەد کەسەکێ نێزیك ژ وی گەنجی بۆ ئەڤرۆ نیوز گۆت : ئەمیر عەبدولعەزیز ل رێکەڤتی ١/٨/٢٠١٩ قەستا وەلاتێ تورکیا کربوو دگەل چەند هەڤالەکان و ل دووف دا ل رێکەڤتی ١/٩/٢٠١٩ بریارێ ددەن بەرەڤ وەلاتێ یونانێ ڤە بچن ب رێیا ئاڤێ و پشتی هەولداین ب رێیا ئاڤێ دەربازی وەلاتێ یونان ببن، بەلێ د ناڤ ئاڤێ دا د خەندقن و ل گورەی وان پێزانینێن بەر دەستێ مە کەڤتین هێزەکا دەریایی یا تورکی تەرمێ ئەمیری پشتی حەفت رۆژان ژ خەندقینێ ل بەر لێڤێن ئاڤێ دیتینە و چو ناسنامەیەک ژی دگەل وی دا نەبوو و هەتا پارە و موبایلا وی ژی وەرمتی بوو و کار نەدکر ،پشتی وی دەمی تەرمێ ئەمیری دئیننە باژێرێ ئیستەنبولێ و پشتی بورینا دەمەکێ چ کەسێ پێزانین ل سەر نەبوون نەچار دبن تەرمێ ئەمیری ل وی باژێری ڤەشێرن.

گۆت : پشتی هەولان مە چو پێزانینەک پەیدا نەکری و ئەم نەچار بوین قەستا وەلاتێ تورکیا بکەین بۆ لێگەریانا تەرمێ ئەمیری و پشتی چەندین هەولان ل ڤان دو رۆژان مە شیا پێزانینان وەربگرین ل سەر ئەمیری کو وەسا دیار بوو کو ئەمیر خەندقی یە و نوکە تەرمێ وی ل باژێرێ ئیسته‌نبولێ یە و بریارە سوباهی رۆژا ئەینیێ ئەم تەرمێ وی ژ بن ئەردێ بیننە دەرێ و رەوانەی کوردستانێ بکەین،ل گورەی پێزانینان ژی وەسا هات بو دیار کرن کو قاچاخچیان دزانین ئەمیر خەندقی یە بەلێ چو پێزانین نەدانە مە.

ئەڤرۆ نیوز،عەلی حاجی :

ئەندامەکا پەرلەمانێ کوردستانێ د داخویانیەکێ دا بۆ ئەڤرۆ نیوز دیار کر پشتی ل حەفتیا بوری دیفچوونا بابەتێ کێشەیا گلێشی و بەرمایکان ل زاخۆ کری بریارا خەرچکرنا پێشینەیا کۆمپانیا هیزل هاتە دەرکرن.

زێدەتر گولیزار رەشید سندی گوت: پشتی دیفچوونا من یا بەردەوام ل دور کێشەیا درەنگ راکرنا گلێشی و بەرمایکان و نەدانا پێشینەیا کۆمپانیا هیزل هەر ژ دەست پێکرنا کاری ل زاخۆ و کو ل حەفتیا بوری ل دور ڤێ چەندێ من روونشتنەک دگەل ساسان عەونی وەزیرێ وەزارەتا شارەوانیان ئەنجام دایی بۆ چارەسەر کرنا ڤێ کێشەیێ، ئەڤرۆ ب رێیا وەزیرێ ناڤهاتی بۆ من دیار کر کو بریارا خەرچکرنا پارەیێ پێشینەیا کۆمپانیا هیزل ژلایێ وەزارەتا دارایی ڤە هاتیە دان و ئەڤ بریارە د دەمەکێ نێزیک دا دێ کەڤیتە د بوارێ جێبەجێ کرنێ دا.

ئەو چەندە ژی گوت: دێ بەردەوام دیفچوونا ڤێ کێشەیێ کەم ژبەر کو بهانەیا کۆمپانیا هیزل ژی ل سەر وێ چەندی بوو هەر ژ دەست پێکرنا کاری ل ١/٧/٢٠١٩ کۆمپانیێ چو پارەیەک بو وێ کۆمپانیێ خەرچ نەکربوو لەورا پێدڤی یە ئێدی کۆمپانی ب دروستی ب کارێ خوە رابیت و کێشەیا نەراکرنا گلێشی ل زاخۆ نەمینیت .