ئه‌ڤرۆ، هۆشه‌نگ تاجر:

چاڤدێره‌كێ سیاسی یێ رۆژهه‌لاتێ كوردستانێ راگه‌هاند كو ٧٤ سالان به‌ری نها د ره‌وشه‌كا گه‌له‌ك ئالۆز دا ب پشكداریا بارزانیێ نه‌مر و هه‌ڤالێن وی كوردان شیا بۆ جارا ئێكێ د دیرۆكێ دا كۆماره‌كێ ئاڤا بكه‌ن، ره‌نگه‌ ژیێ كۆمارێ كورت بوو لێ گه‌له‌ك ده‌ستكه‌فتێن خوه‌ یێن دیرۆكی هه‌بوون.

سه‌عید مورادی چاڤدێرێ سیاسی یێ رۆژهه‌لاتێ كوردستانێ بۆ ئه‌ڤرۆ نیوز دیار كر كو راگه‌هاندنا كۆمارا كوردستانێ ل باژێرێ مهابادێ به‌ری ٧٤ سالان نیشا دده‌ت كو كوردان هه‌ر ده‌مه‌كێ بۆ بده‌ستڤه‌ئینانا مافێن خوه‌ یێن ره‌وا كار كرینه‌ و بێگومان راگه‌هاندنا كۆماره‌كێ د ناڤ دلێ سیسته‌مێ پاشایه‌تی یێ ئیرانێ د وی سه‌رده‌می دا تشته‌ك كێم نه‌بوو و گۆت: (كۆمارا كوردستانێ د ده‌مه‌كێ دا هاته‌ راگه‌هاندن كو ل رۆژهه‌لاتا ناڤین شه‌ره‌ك مه‌زن هه‌بوو و وه‌لاتێن زلهێز ژی كار بۆ به‌رژه‌وه‌ندیێن خوه‌ دكرن و بێگومان ژ به‌ر به‌رژه‌وه‌ندیێن خوه‌ یێن ل گه‌ل وه‌لاتێن رۆژهه‌لاتا ناڤین وان پشته‌ڤانی ل كۆمارا كوردستانێ نه‌كر و ژ به‌ر هندێ ژی ژیێ كۆمارێ گه‌له‌ك كورت بوو).

ناڤهاتی ئه‌و یه‌ك ژی دیار كر كو د وی ژیێ خوه‌ یێ كورت دا كۆمارا كوردستانێ شیا گه‌له‌ك ده‌ستكه‌فتێن دیرۆكی بۆ هه‌موو كوردان تۆمار بكه‌ت و ٧٤ سال ل سه‌ر دامه‌زراناندنا كۆمارا كوردستانێ ده‌رباز بوون لێ هه‌تا نها ژی هه‌موو وه‌لاتیێن كورد ل هه‌ر چار پارچێن كوردستانێ و جیهانێ شانازیێ ب كۆمارا كوردستانێ و ده‌ستكه‌فتێن وێ دكه‌ن.

چاڤدێرێ سیاسی یێ رۆژهه‌لاتێ كوردستانێ ئه‌و یه‌ك ژی دیار كر كو كۆمار ژ ئالیێ هێزه‌كا پاشكه‌فتی ڤه‌ هاته‌ ژناڤبرن كو ژ هزرێن دیموكراسیخوازی و ئاشتیانه‌ یێن كوردان دترسیان و هه‌تا نها ژی سیسته‌مێ ئیرانێ هه‌ر د قه‌یرانێ دایه‌ و نه‌شیایه‌ پرسێن خوه‌ ژی چاره‌سه‌ر بكه‌ت و ئه‌ڤرۆكه‌ مه‌زنترین مه‌ترسی ل سه‌ر سیسته‌مێ ئیرانێ هه‌یه‌ و بێگومان هه‌ر گوهۆرینه‌ك ل ئیرانێ روو بده‌ت دێ د به‌رژه‌وه‌ندیا كوردان دا بیت.

ناڤهاتی د دووماهیا ئاخڤتنا خوه‌ دا ئه‌و یه‌ك ژی دیار كر كو پشكداریا بارزانیێ نه‌مر و هه‌ڤالێن وی د ئاڤاكرنا كۆمارا كوردستانێ دا بۆ هه‌موو جیهانێ سه‌لماند كو دۆزا كوردان ئێكه‌ و كورد ل هه‌ر جهه‌كێ بن دێ پشته‌ڤانیێ ل برایێن خوه‌ كه‌ن، ئه‌ڤرۆكه‌ هه‌موو كورده‌ك ل جیهانێ شانازیێ ب ده‌ستكه‌فتێن هه‌رێما كوردستانێ دكه‌ت و هێڤیا مه‌ هه‌موویان ئه‌وه‌ كو رۆژه‌كێ ده‌وله‌تا كوردی ل هه‌رێما كوردستانێ بهێته‌ راگه‌هاند دا خه‌ونا هه‌موو كوردان ببیته‌ راستی و گۆت: (ئه‌ڤرۆكه‌ ل هه‌رێما كوردستانێ سیسته‌مه‌ك دیموكراتی هه‌یه‌، زۆلم و زۆرداری ل چو كه‌سه‌كێ ناهێته‌ كرن، هه‌موو پێكهاتێن ئایینی و جڤاكی د ناڤ سیسته‌مێ دیموكراتی یێ هه‌رێما كوردستانێ دا وه‌كو برا پێكڤه‌ دژین و ئه‌و یه‌ك ژی سه‌ركه‌فتنه‌كا مه‌زنه‌ بۆ هه‌موو كوردان و ل كۆمارا كوردستانێ ژی هه‌مان هزر هه‌بوو و دوژمنێن كوردان هه‌تا نها ژی ژ هزرێ پێشكه‌فتی و دیموكراتی یێ كوردان دترسن و نها ژی گه‌له‌ك جاران پیلانان دگێرن دا ده‌ستكه‌فتێن گه‌لێ كوردستانێ ل هه‌رێما كوردستانێ و پارچێن دی یێن كوردستانێ ژناڤ ببه‌ن، ژ به‌ر هندێ ژی پێدڤیه‌ ئه‌م وانان ژ دیرۆكا خوه‌ وه‌ربگرین و ب هه‌موو ره‌نگه‌كێ خوه‌دان ژ ده‌ستكه‌فتێن هه‌رێما كوردستانێ و كۆمارا كوردستانێ ده‌ركه‌ڤین و ب ڤه‌كۆلینێن زانستی راستیان بۆ رایا گشتی یا جیهانێ ئاشكرا بكه‌ین).

ئه‌ڤرۆ نیۆز, ئه‌میر ئه‌ترووشی:

رێڤه‌به‌رێ‌ گشتیێ‌ وه‌به‌رهێنانێ‌ ل پارێزگه‌ها دهۆكێ‌ راگه‌هاند، بۆ جارا ئێكێ‌ ماسته‌ر پلانه‌كا نوو بۆ وه‌به‌رهێنانێ‌ ل پارێزگه‌ها دهۆكێ‌ دهێته‌ دانان و د ڤێ‌ ماسته‌ر پلانێ‌ دا گرنگی ب سێ‌ سه‌كته‌رێن سه‌ره‌كی هاتیه‌ كرن.

كوردو ئیسحان عه‌بدولسه‌مه‌د، رێڤه‌به‌رێ‌ گشتیێ‌ وه‌به‌رهێنانێ‌ ل پارێزگه‌ها دهۆكێ‌ بۆ ئه‌ڤرۆ نیۆز دیار كر، به‌ری نها هه‌موو پرۆژه‌یێن وه‌به‌رهێنانێ‌ بێ پشكداریا وه‌لاتیان دهاتنه‌ دانان، به‌لێ‌ ل گۆره‌ی رێنمایێن نوو یێن كارنامه‌یا حۆكمه‌تا هه‌رێما كوردستانێ‌ گرنگیه‌كا مه‌زن ب هه‌رسێ‌ سه‌كته‌رێن (چاندن و گه‌شتۆگۆزار و پیشه‌سازی) هاتیه‌ دان و ژ ئه‌ڤرۆ پێڤه‌ دێ‌ بۆچوونا وه‌لاتیان و یه‌كێن كارگێری یێن ده‌ڤه‌ری ل سه‌ر هێته‌ وه‌رگرتن.

ئاشكرا ژی كر كو نها كار د دانانا ماسته‌ر پلانێ‌ دا دهێته‌ كرن و بۆچووێن جهێن به‌رپرس ل هه‌ر ده‌ڤه‌ره‌كێ‌ و بۆچونا خه‌لكێ‌ ده‌ڤه‌رێ‌ دهێته‌ وه‌رگرتن كا چ پرۆژه‌ بۆ وان د گرنگن و خه‌لك خوه‌ د چ پرۆژه‌ دا دبینیت و ژ نوو دێ‌ بۆچوون هێنه‌ گه‌نگه‌شه‌كرن و ماسته‌ر پلانا ل سه‌ر وان پرۆژه‌یان هێنه‌ دانان.

ئاماژه‌ ب هندێ‌ ژی دا كو نها سه‌ره‌دانێن مه‌ بۆ هه‌موو ده‌ڤه‌ران د به‌رده‌وامن بۆ هندێ‌ ژ نێزیك بزانین پرۆژه‌یێن گرنگ بۆ هه‌ر ده‌ڤه‌ره‌كێ‌ چنه‌.