ئه‌ڤرۆ نيوز:
پرۆژێ قانوونا رێگريكرنێ ل بازرگانيكرن و بكارئينانا مادێن بێهوشكه‌ر سيفه‌تا بله‌ز پێ هاتيه دان و برياره ل ڤێ هه‌فتيێ خواندنا دويێ ل په‌رله‌مانێ كوردستانێ بۆ بهێته كرن، ئه‌ندامه‌كا لژنا كاروبارێن جڤاكى ژى ل په‌رله‌مانى دبێژيت، سزايێ بازرگانيكرنێ ب مادێن بێهوشكه‌ر، سێ جاركى هاته بلندكرن.
حه‌سيبه گه‌ردى، ئه‌ندامێ لژنا كاروبارێن جڤاكى ل په‌رله‌مانێ كوردستانێ گۆت” خواندنا ئێكێ بۆ پرۆژێ قانوونا رێگريكرنێ ل مادێن بێهوشكه‌ر يا هاتيه كرن و برياره ل كۆمبوونا داهاته يا په‌رله‌مانى خواندنا دويێ بۆ بهێته كرن و پێداچوون ژى بۆ هاتيه كرن، چونكى پشتى هاتيه هنارتن بۆ لژنێن په‌يوه‌نديدار، بۆ مه رۆهن بوويه ئه‌و سزايێ بۆ كه‌سێن بازرگانيێ ب مادێن بێهوشكه‌ر دكه‌ن، وه‌كو پێدڤى نينه”.
حه‌سيبايێ زێده‌تر بۆ مالپه‌رێ فه‌رمى يێ پارتى ديموكراتى كوردستان گۆت” سزايێ بازرگانيێ ب مادێن بێهوشكه‌ر سێ جاركى هاتيه بلندكرن و ل هنده‌ك حاله‌تان دا سزا دگه‌هيته زيندانيكرنا هه‌تا هه‌تايى و سێداره‌دانێ ژى”.
هه‌روه‌سا گۆت”ئێك ژ خالێن ب هێز يێن د ناڤ وێ پرۆژه قانوونێ دا ئه‌وه، ئه‌و كه‌سێن پێزانينان ل دۆر بازرگانێن مادێن بێهوشكه‌ر دده‌نه لايه‌نێن ئه‌منى و په‌يوه‌نديدار، دێ هێنه خه‌لاتكرن و پاره بۆ هاتيه دياركرن”.
گۆت ژى” هژماره‌كا سه‌نته‌رێن راهێنان و نوشدارى دێ هێنه ڤه‌كرن بۆ وان كه‌سێن بووينه بكارئێنه‌رێن مادێن بێهوشكه‌ر و دێ هێنه چاره‌سه‌ركرن و ل دووڤ پرۆژێ قانوونا ناڤبرى ژى هه‌ر كه‌سه‌كێ بوويه بكارئێنه‌رێ مادێن بێهوشكه‌ر و سه‌ره‌دانا وان سه‌نته‌رێن تايبه‌ت ب چاره‌سه‌ركرنێ ڤه نه‌كه‌ت، دێ سزايێ زيندانكرنێ ل سه‌ر هێته بجهئينان”.
ئه‌ڤرۆ نيوز:
خوه‌نيشانده‌رێن عيراقێ ل مه‌يدانێن خوه‌پيشادانان ل دۆر ده‌نگوباسێ به‌ربژاركرنا (محه‌مه‌د شه‌ياع ئه‌لسودانى) بۆ پۆستێ سه‌رۆك وه‌زيرێن عيراقێ، هه‌لويستێ خوه راگه‌هاند و دژى وى راوه‌ستيان.
خوه‌نيشانده‌رێن مه‌يدانا ته‌حرير ل به‌غدا دژى ده‌نگوباسێ به‌ربژاركرنا محه‌مه‌د شه‌ياع ئه‌لسودانى ئه‌ندامێ په‌رله‌مانێ عيراقێ نه‌رازيبوونا خوه دياركر، د هه‌مان ده‌م دا خوه‌نيشانده‌رێن پارێزگه‌هێن باشوورێ عيراقێ ژى به‌ربژاركرنا محه‌مه‌د شه‌ياع بۆ پۆستێ سه‌رۆك وه‌زيران ره‌تكر و دياركرن كو وى كه‌سێ پێشتر گه‌له‌ك پۆستێن حكومى هه‌بوون و نه‌شێت ببيت سه‌رۆكه‌كێ بێ لايه‌ن بۆ حوكمه‌تا عيراقێ.
هه‌روه‌سا خوه‌نيشانده‌ران لافيته ژى بلندكرن كو ل سه‌ر نڤيسابوو (مه كه‌سايه‌تيه‌كێ بێ لايه‌ن دڤێت نه‌كو كه‌سه‌كێ ده‌ست ژ كاركێشاى) وه‌كو ئاماژه‌ك بۆ ده‌ست ژكاركێشانا محه‌مه‌د شه‌ياع ئه‌لسودانى ژ حزبا ده‌عوه و هه‌ڤپه‌يمانيا ده‌وله‌تا قانوونێ ب سه‌رۆكايه‌تيا نورى مالكى.
محه‌مه‌د شه‌ياع ئه‌لسودانى ل چه‌ند سالێن بۆرى هژماره‌كا پۆستان وه‌گرتبوون وه‌كو وه‌زيرێ مافێن مرۆڤى ل خۆلا دويێ يا حوكمه‌تێ ب سه‌رۆكايه‌تيا نورى مالكى، هه‌روه‌سا وه‌زيرێ كاروبارێن جڤاكى ووه‌زيرێ پيشه‌سازى ب وه‌كاله‌ت د حوكمه‌تا حه‌يده‌ر عه‌بادى، هه‌روه‌سا ئه‌ندامێ حزبا ده‌عوزه يا ئيسلامى يه و كه‌سه‌كێ نێزيكه ژ نورى مالكى، خه‌لكێ پارێزگه‌ها مه‌يسانه ل باشوورێ عيراقێ.
ئه‌ڤرۆ نيوز:
خوه‌نيشانده‌رێن باژێرێ به‌سرا ناڤێ جاده‌يا خومه‌ينى ل وى باژێرێ گوهۆرى بۆ جاده‌يا شه‌هيدێن ئوكتوبه‌رێ.
ل باژێرێ به‌سرا قوتابيێن خوه‌نيشانده‌ر ب گۆتنا دروشمێن دژى سياسه‌تێن ده‌ستهه‌لاتداران و ده‌ستێوه‌ردانێن ئيرانێ به‌رده‌وامى دا خوه‌نيشادانێن خوه.
هه‌ڤده‌م خوه‌نيشانده‌رێن وى باژێرى ناڤێ جاده‌يا خومه‌ينى گوهۆرى و ب جاده‌يا شه‌هيدێن ئوكتوبه‌رێ ناڤكر.
ئه‌ڤرۆ نيوز:
سه‌رۆك وه‌زيرێن هه‌رێما كوردستانێ، مه‌سرور بارزانى په‌يامه‌كا پيرۆزباهيێ ئاراسته‌ى بۆريس جۆنسن سه‌رۆكێ پارتا پارێزگاران و سه‌رۆك وه‌زيرێن بريتانيا كر ب هه‌لكه‌فتا سه‌رۆكه‌فتنا ديرۆكى يا پارتا پارێزگاران د هه‌لبژارتنێن بريتانيا دا.
د په‌يامێ دا هاتيه” پيرۆزباهيا ڤێ سه‌ركه‌فتنا ديرۆكى ل هه‌وه دكه‌م، هيڤيدارم پێكڤه كاربكه‌ين بۆ پێشڤه‌برنا په‌يوه‌نديێن د ناڤبه‌را هه‌رێما كوردستانێ و بريتانيا”.
دهێته زانين پارتا پارێزگاران ل بريتانيا د هه‌لبژارتنێن په‌رله‌مانى دا ل وى وه‌لاتى، سه‌ركه‌فتنه‌كا مه‌زن بده‌ستڤه‌ئينا و پتريا كورسيێن په‌رله‌مانى بۆ خوه مسوگه‌ركرن.
ل ده‌مێ شه‌رێ دژى داعشێ دا، بۆريس جۆنسن سه‌رۆكێ پارتا پارێزگاران و سه‌رۆك وه‌زيرێن بريتانيا يێ نوكه، وه‌كو سه‌رۆكێ باژێرڤانيا له‌نده‌ن سه‌ره‌دانا هه‌رێما كوردستانێ كربوو ل به‌رۆكێن شه‌رى ژى سه‌ره‌دانا هێزێن پێشمه‌رگه‌ى كربوو.
ئەڤرۆ نیوز:
دەزگەهێن راگەهاندنا تورکیا دیار دکەن کو د ماوەیێ چار مەهێن بۆری دا پتر ژ ١٢٠ هزار ئەندامێن ئاکپارتیێ دەست ژ وێ پارتیێ بەرداینە و رۆژانە ژی ئەو یەک بەردەوام دکەت.
دەزگەهێن راپرسیان ژی دیار دکەن پشتی کو داوود ئوگلۆ پارتەکا خوە راگەهاندی و دهێتە چاڤەرێکرن عەلی باباجان ژی پارتەکا نوو ئاڤا بکەت ئەو یەک دێ بنە ئەگەر دا ئەندامێن زێدەتر ژ ئاکپارتیێ جودا ببن و ببنە ئەندامێن هەر دو پارتێن نوو یێن تورکیا.
ئەڤرۆ نیوز:
بالیۆزخانا یابانێ ل شامێ د داخۆیانیەکێ دا بەلاڤکریە کو ژ بۆ هاریکاریێن مرۆڤی ل باکورێ سووریێ و رۆژئاڤایێ کوردستانێ وان بریار داینە ب کۆژمێ ١٤ ملیۆن دۆلاران هاریکاریێن مرۆڤی پێشکێشی رۆژئاڤایێ کوردستانێ بکەن.
د داخۆیانیێ دا هاتیە دیار کرن کو ئەو هاریکاری دێ ب رێیا چەند رێکخراوێن مافێن مرۆڤی هێتە پێشکێش کرن و دێ ژ خوارنێ و پێدڤیاتێن دی یێن ژیانێ پێک هێن.
ئەڤرۆ نیوز:
بالیۆزخانا ئەمریکا ل عیراقێ د داخۆیانیەکێ دا بەلاڤ کریە کو هندەک هێزێن چەکدار و تێکدەر ل حەفتیا بۆری دو جاران هێرشی بالیۆزخانە و هێزێن ئەمریکا کرینە کو د ئەنجام دا ٥ سەرباز بریندار بووینە.
بالیۆزخانا ئەمریکا هۆشداریێ ژی ددەت کو هەر هێزەک بڤێت زیانێ بگەهینتە بەرژەوەندیێن ئەمریکا و هەڤپەیمانێن وێ دێ ب توندی بەرسڤا وان هێتە دان.
ئەڤرۆ نیوز:
سەرۆک مەسعود بارزانی ل گەل بەرپرسێ دەستەیا رێکخراوێن جەماوەری و پیشەیی یا پارتی دیموکراتی کوردستان و هەر سێ سکرتێرێن ئێکەتیا ئافرەتان، لاوان و قوتابیان کۆمبوو.
سەرۆک بارزانی د کۆمبوونێ دا پشتەڤانیا خوە بۆ پرۆژێ چاکسازیێ یێ کو ژ لایێ حوکمەتێ ڤە بۆ پەرلەمانی هاتیە رەوانەکرن دیار کر و راگەهاند کو ئەو پشتەڤانیێ ل پرۆژێ چاکسازیێ و باشتکرنا رەوشا ژیانا پێشمەرگان دکەت، چونکو ئەو یەک دێ بیتە ئەگەرێ پێشڤەچوونێن باشتر ل هەرێما کوردستانێ.
ئه‌ڤرۆ نیوز:
ئوناى ئێمرى ئه‌وێ ل ماوێ چه‌ند حه‌فتیێن بورى هه‌ڤبه‌ستا وى ل گه‌ل یانا ئه‌رسینال هاتیه هه‌لوه‌شاندن ژبه‌ر ئه‌و ئه‌نجامێن لاواز یێن یانێ دخۆلا ئنگلته‌را دا توماركرین و پشتى هه‌ڤبه‌ستا وى ل گه‌ل ئه‌رسینال هاتیه هه‌لوه‌شاندن ئێك ژ یانێن به‌رنیاس ل سه‌ر ئاستێ خۆلا ئنگلته‌را ب فه‌رمى داخوازى ژ وى راهێنه‌رى كر بوو وه‌رگرتنا پوستێ راهێنه‌ریا وێ یانێ لێ وى راهێنه‌رێ ناڤبرى داخوازیا وێ یانێ ره‌تكر .
رۆژناما ماركا ئیسپانى دیاركر یانا ئیڤه‌رتون یا ئنگلیزى ب فه‌رمى هه‌ڤبه‌سته‌ك پێشكێشى راهێنه‌رێ یانا ئه‌رسینال یێ به‌رى نوكه ئوناى ئێمرى كربوو بۆ وه‌رگرتنا پوستێ راهێنه‌ریا وێ یانێ ل جهێ راهێنه‌رێ ئه‌وان یێ به‌رى نوكه پێ پورتوگالى ماركو سیلڤا ئه‌وێ ژ پوستێ وى هاتیه دورخستن ژبه‌ر ئه‌نجامێن لاواز.
هه‌ردیسان وێ رۆژنامێ دیاركریه ژى ئێمرى ل ماوێ چه‌ند رۆژێن بورى دو هه‌ڤبه‌ستێن دو یانێن چینى ژى ره‌تكرینه كو ئه‌وان هه‌ردو یانێن چین كوژمه‌كێ مه‌زن پێشكێشى ئه‌وى راهێنه‌رى كربوو لێ ناڤبرى داخوازیا هه‌ردو یانێن كێشوارێ ئاسیا ره‌تكر بوون.
نيشاندان