ئه‌ڤرۆ نيوز:

ژنه‌كا 25 سالی دلێ‌ خوه‌ بو ئه‌ڤرۆ ڤه‌دكه‌ت و دبێژیت: ئه‌ڤه‌ 4 ساله‌ من شوو كری و من چ ئاریشه‌ ل گه‌ل زه‌لامێ‌ خوه‌ نینن، بتنێ‌ من ئاریشه‌ ل گه‌ل تیێ‌ خوه‌ هه‌یه‌، تیێ‌ من گه‌له‌ك بزاڤێ‌ دكه‌ت خوه‌ نێزیكی من بكه‌ت و ده‌ستدرێژیا سكسی ب زوری ل گه‌ل من كریه‌، ئه‌ز نزانم چ بكه‌م سه‌رێن رێیا لبه‌ر من به‌رزه‌ بوینه‌، ئه‌ز د ڤی حالی دا مریم و نه‌شێم بو كه‌سێ‌ بێژم دترسم زه‌لامێ‌ من بزانیت، زور یا بێزار بویم گه‌له‌ك جارا هزرا خوه‌سوتنێ‌ و خوه‌كوشتنێ‌ دكه‌م، داكو ژ ڤی نه‌ مرۆڤی خلاس ببم، لێ‌ دلێ‌ من ناگریت ژبه‌ر من كوره‌ك هه‌یه‌ دترسم پشتی من ره‌زیل ببیت، بێهنا من روژ بو روژێ‌ ته‌نگتره‌، ئه‌ڤ ژیانا خوش و شرین یا ل به‌ر من بویه‌ قه‌بره‌كێ‌ تاری، هیڤیدارم بو من رێیه‌ چاره‌سه‌ریه‌كێ‌ هوین چ دبێژن و ئه‌ز چ بكه‌م؟

خانما هێژا:

جڤاكی و خه‌لكی، مالێ‌ و په‌روه‌ردێ‌ ئه‌م هند یێن ترساندین هه‌تا وی راده‌ی كو هه‌كه‌ كه‌سه‌ك ژی غه‌درێ‌ و زوریێ‌ ل مه‌ بكه‌ت و مافێ‌ مه‌ ژ مه‌ وه‌رگریت، ئه‌م نه‌وێرین باخڤین و نه‌شێین به‌ره‌ڤانیێ‌ ژ خوه‌ و مافێ‌ خوه‌ بكه‌ین و ئه‌م دترسین به‌حسێ‌ وی تشتی بكه‌ین، ژبه‌ركو وه‌سا هزر دكه‌ین كه‌س باوه‌ر ژ مه‌ ناكه‌ت و هه‌ر ئه‌م دێ‌ تێ‌ چین، ئه‌ڤه‌ ژی دزڤریت بو كێمكرنا ژنێ‌ د جڤاكی دا، ئه‌م هه‌موو تشتا نا كه‌ینه‌ خه‌تێت جڤاكی، به‌لكو به‌شه‌ك دكه‌ڤیته‌ ل سه‌ر كه‌ساتیا ژنێ‌ ژی، ژبه‌ركو ژنێ‌ خوه‌ گه‌هاندیه‌ وی راده‌ی و خوه‌ كریه‌ قوربانی و دترسیت، هه‌كه‌ ژن یا زیره‌ك بیت و خوه‌ زیره‌ك بكه‌ت ب رێیا خواندنا په‌رتوكا دێ‌ دشێت كه‌سایه‌تیا خوه‌ پێش ئێخیت و د دنیایێ‌ گه‌هیت و ماف و به‌رپرسیاری و ئه‌ركێن خوه‌ زانیت و هه‌كو د ڤان تشتا گه‌هشت، هینگێ‌ ئه‌ڤ چه‌نده‌ دێ‌ بیته‌ پالده‌ر كو داخوازا مافێ‌ خوه‌ بكه‌ت و نه‌ترسیت و باخڤیت هه‌كه‌ خه‌له‌تی نه‌كربیت.

خانم تو ب خوه‌ یا نه‌ ئارامی و دترسی و یا تووشی ده‌ستدرێژیا سكسی یا نه‌خوش بوی ژلایێ‌ تیێ‌ خوه‌ڤه‌ كو تی وه‌كو برایێ‌ مرۆڤیه‌، ژلایه‌كێ‌ دیڤه‌ هه‌م تو هه‌ست ب گونه‌هباریێ‌ دكه‌ی و هه‌م ژی دترسی نه‌كو زه‌لامێ‌ ته‌ ڤی تشتی بزانیت، لڤێره‌ تو دو بارێت گران رادكه‌ی، بارێ‌ ئێكێ‌ ته‌حه‌مولا وێ‌ ده‌ستدرێژیا سكسی دكه‌ی بارێ‌ دی ترسه‌ زه‌لامێ‌ ته‌ ڤی تشتی بزانیت و ل دووماهیێ‌ ته‌ چ گونه‌ها خوه‌ نینه‌، به‌لێ‌ دڤیابا هه‌ر ژ ده‌ستپێكێ‌ ته‌ گوتبا زه‌لامێ‌ خوه‌، چونكی ماده‌م خه‌له‌تی نه‌ ژ ته‌یه‌ تو دشیای بابه‌تی بو زه‌لامێ‌ خوه‌ زه‌لال كه‌ی، دا به‌لكی هه‌ر زوو زه‌لامێ‌ ته‌ چاره‌سه‌ریه‌ك دیتبا و تو ژ وی دوور كربای.

چاره‌سه‌ری ئه‌وه‌ ل ده‌ستپێكێ‌ ب هه‌موو ره‌نگا خوه‌ ژێ‌ دوور بكه‌ و بزاڤێ‌ بكه‌ مالا خوه‌ ببه‌نه‌ جهه‌كێ‌ دی، ئه‌و جهێ‌ ئه‌و لێ‌ بیت نه‌چێ‌ و رێیا خوه‌ بگوهوره‌ و نه‌مینه‌ وی جهێ‌ تیێ‌ ته‌ لێ‌، چونكی دێ‌ مه‌سه‌له‌ خرابتر لێ‌ هێت و ئه‌ڤ ترس و قه‌له‌قه‌ ژ دلێ‌ ته‌ ناهێنه‌ ده‌ر و دێ‌ زێده‌تر لێ‌ هێت و بیته‌ ئه‌گه‌رێ‌ هندێ‌ ئاشكرا ببیت و دێ‌ زه‌لامێ‌ ته‌ بێژیت ته‌ بوچی نه‌گوته‌ من.

هه‌كه‌ هه‌ر به‌لا خوه‌ ژ ته‌ڤه‌ نه‌كر و فایده‌ نه‌كر، ژنوو ل گه‌ل زه‌لامێ‌ خوه‌ باخڤه‌ و ڤێ‌ ئاریشێ‌ بگه‌هینێ‌، به‌لێ‌ هه‌كه‌ زه‌لامه‌كێ‌ خوانده‌ڤان و تێگه‌هشتی نه‌بیت و یێ‌ گوندی بیت و په‌نایێ‌ بو چه‌كی ببه‌ت ئه‌ز ئاموژگاریا ته‌ ناكه‌م بێژیێ‌، ئانكو سه‌ح كێ‌ كا ئاستێ‌ تێگه‌هشتنا زه‌لامێ‌ ته‌ چه‌نده‌ و هه‌تا چه‌ند دێ‌ د ڤی تشتی گه‌هیتن، هه‌كه‌ دنیایه‌ باوه‌ر ژ ته‌ نه‌كر و باوه‌ر ژ برایێ‌ خوه‌ كر، ئانكو ئه‌ڤه‌ ئه‌و زه‌لام نینه‌ یێ‌ كو تو پشتا خوه‌ پێ‌ گه‌رم دكه‌ی.

به‌رسڤدان: ده‌روونناس ئاواز 

گۆشا دلێ خۆ ڤه‌ ل سه‌ر فه‌يسبۆكى