ئەڤرۆ نیوز ، زنار تۆڤی:

وەسا بریارە ئەڤرۆ ئێکشەمبێ 1-12-2019 شاندێ هەرێما کوردستانێ سەرەدانا بەغدا بکەت و رێککەفتنا دناڤبەرا هەولێر و بەغدا ل سەر نەفت و بودجەی بهێتە ئیمزا کرن.

خالید شوانی، وەزیرێ هەرێمێ جەخت ل سەر گۆتنێن پێشتر یێن نوونەرێ حوکمەتا هەرێما کوردستانێ ل بەغدا دکەت، کو ناما دەست ژ کارکێشانا عادل عەبدولمەهدی، کاریگەری ل سەر رێککەفتنا دناڤبەرا هەولێر و بەغدا نابیت و ل دەمێ دیارکری دا دێ کۆم بن.

فارس عیسا، نوونەرێ حوکمەتا هەرێما کوردستانێ ل بەغدا گۆتیە، ئەڤرۆ دێ شاندەکێ حکومەتا هەرێما کوردستانێ گەهیتە بەغدا و دێ ئیمزایێ ل سەر وێ رێککەفتنێ کەن، گوت ژی کۆمبوون و ئیمزاکرنا وێ رێککەفتنێ ب سەرۆکاتیا فوئاد حسێنی، وەزیرێ دارایێ عێراقێ دێ ل دەمژمێر9:00 سپێدێ بیت.

بریارە رێککەفتنا دەستپێکی یا تایبەت ب پشکا بودجێ هەرێما کوردستانێ د بودجێ فیدرالی یا سالا 2020 و مووچێ پێشمەرگە ژی بهێتە ئیمزا کرن.

ل دووڤ زانیاریان حوکمەتا عێراقێ گوتۆبێژ بۆ پێدانا 14% هەتا 15% دێ بۆ بودجێ فیدرالی یێ سالا 2020 کەت وەک بەشە بودجێ هەرێما کوردستانێ، بەلێ حوکمەتا هەرێما کوردستانێ داخوازا 17% یا بودجێ فیدرالی دکەت، د بەرامبەر دا هەرێما کوردستانێ رۆژانە 250 هزار بەرمیلێن نەفتا خاڤ ل ژێر رکێفا کۆمپانیا سۆمۆ یا عێراقی هناردە کەت.

ئه‌ڤرۆ نيوز، قائید میرۆ:
بڕیاره‌ ئه‌ڤرۆ رۆژا ئێكشه‌مبى جڤاتا نوونه‌رێن عیراقێ كۆم ببیت و بڕیارا خوه‌ ل دۆر ده‌ست كاركێشانا سه‌رۆك وه‌زیران بده‌ت، چاڤدێره‌ك ژی هه‌لویستێ لێڤه‌گه‌ڕێ شیعان بۆ ده‌ست ژ كاركێشانا حوكمه‌تێ ب گوهۆڕین دزانیت د هه‌لویستێ سیستانی دا و دبێژیت، پێدڤیه‌ له‌ز بۆ پێكئینانا حوكمه‌ته‌كا ته‌كنۆكرات بهێته‌كرن.
دكتوره‌ مه‌یاده‌ نه‌جار، نوونه‌را فڕاكسیۆنا پارتی ل جڤاتا نوونه‌رێن عیراقێ بۆ رۆژناما ئه‌ڤرۆ دیار كر، چه‌ندین داخوازی هه‌نه‌ یێن خوه‌نیشاده‌ران پێدڤیه‌ بهێنه‌ ئێكلاكرن و هێشتا دیار نینه‌ دێ شێوازێ پێكئینانا حوكمه‌تا نوویا عیراقێ یا چاوا بیت و لسه‌ر چو بنه‌مایه‌ك بیت، چونكو دڤێت حوكمه‌ته‌كا بهێزبیت بۆ بجهئینانا داخوازیێن جاده‌یا عیراقی و به‌رهنگاربوونا گه‌نده‌لیێ و كۆنتڕۆلكرنا ره‌وشا ئه‌منی.