ئه‌ڤرۆ نيوز، بارزان مزووری:

پرۆژێ‌ ستراتیژی یێ‌ ئوڤه‌رپاسا باعه‌درێ‌ ئه‌وا ل سه‌ر رێیا نیڤده‌وله‌تی دهێته‌ چێكرن، بڕیار بوو ل سالا 2014 بهێته‌ دروستكرن، رێژه‌كا كێم ژ پرۆژه‌ی هاتبوو دروستكرن و كار تێدا هاته‌ راوه‌ستاندن، لێ‌ د ئه‌ڤ ساله‌ دا دوباره‌ ژ لایێ‌ حكومه‌تا هه‌رێما كوردستانێ‌ ڤه‌ كار ل سه‌ر هاته‌كرن و هه‌تا نوكه‌ ب رێژا 80% كار تێدا ب دووماهیك هاتیه‌ و بڕیاره‌ د ده‌مێ‌ 20 رۆژێن بهێن دا بهێته‌ ڤه‌كرن و بكه‌ڤیته‌ د خزمه‌تا وه‌لاتیان دا.

شه‌مال محه‌مه‌د ئه‌دیب، رێڤه‌به‌رێ‌ ناحیا باعه‌درێ‌ بۆ رۆژناما ئه‌ڤرۆ دیار كر، پرۆژێ‌ ئوڤه‌رپاسا باعه‌درێ‌ ئێك ژ وان پرۆژێن گرنگه‌ یێن ل سه‌ر رێیا نیڤده‌وله‌تی دهێته‌ چێكرن و گۆت: “ئه‌ڤ پرۆژه‌ ژ سالا 2014 وه‌ره‌ هاتیه‌ راوه‌ستاندن، ژ به‌ر وان كاودانێن سه‌ر ب هه‌رێما كوردستانێ‌ دا هاتین، لێ‌ د نها دا كار دوباره‌ ل سه‌ر دهێته‌ كرن و هه‌تا نوكه‌ ب رێژا 80% پرۆژه‌ ب دووماهیك هاتیه‌ و كوژمێ‌ ملیاره‌ك و 900 ملیۆن دینار بۆ هاتینه‌ ته‌رخانكرن و ژ لایێ‌ كۆمپانیا جیلان كار یێ‌ ل سه‌ر دهێته‌ كرن و بۆ ماوێ‌ 20 رۆژێن دی ئه‌ڤ پرۆژه‌ دێ‌ ب دووماهیك هێت و كه‌ڤیته‌ د خزمه‌تا وه‌لاتیان دا”.

رێڤه‌به‌رێ‌ ناحیا باعه‌درێ‌ خویا ژی كر كو بتنێ‌ قووناغا قێركرنێ‌ یا مای و د نها دا كار یێ‌ ل سه‌ر به‌ده‌وامه‌ كو ئه‌ڤ قووناغه‌ ژی ب دووماهیك بهێت و بكه‌ڤیته‌ د خزمه‌تا وه‌لاتیان دا.

ناڤهاتی ئاماژه‌ ب وێ‌ چه‌ندێ‌ ژی كر كو ئه‌ڤ پرۆژه‌ ئێك ژ پرۆژێن گرنگه‌ ل ده‌ڤه‌رێ‌، ژبلی بۆ رێكا سه‌ره‌كی بۆ خه‌لكێ‌ ده‌ڤه‌را شێخان ژ به‌ركو به‌ری ئه‌ڤ پرۆژه‌ بهێته‌ دانان ب ده‌هان كه‌سا د روودانێن هاتنوچوونێ‌ دا ل جهێ‌ ڤی پرۆژه‌ی گیانێ‌ خوه‌ ژ ده‌ست دایه‌، به‌لێ‌ سوپاس بۆ كابینه‌یا نوو یا حكومه‌تا هه‌رێما كوردستانێ‌ كو دوباره‌ ده‌ست ب تمامكرنا ڤی پرۆژه‌ی كری و ل ڤان رۆژا ژی دێ‌ كه‌ڤیته‌ د خزمه‌تا شۆفێران دا.

ئه‌ڤرۆ نیوز ، زنار تۆڤی:

وه‌سا بریاره‌ پشتی ئیمزاكرنێ‌ ژ لایێ‌ سه‌رۆكێ‌ هه‌رێما كوردستانێ‌ ڤه‌، قانوونا تاپۆكرنا خانیێن زێده‌گاڤی بكه‌ڤیته‌ د وارێ‌ بجهئینانێ‌ دا، هه‌روه‌سا ئه‌ندامه‌كێ‌ لیژنا باژێرڤانیان ل په‌رله‌مانێ‌ كوردستانێ‌ ئاشكرا دكه‌ت، ئه‌ڤ قانوونه‌ ئه‌ردی ژی ڤه‌دگریت، به‌لێ‌ مه‌رج بۆ تاپۆكرنا ئه‌ردێ‌ زێده‌گاڤیێ‌ هه‌یه‌.

شوان زراری ئه‌ندامێ‌ لیژنا باژێرڤانیێ‌ ل په‌رله‌مانێ‌ كوردستانێ‌ بۆ ئه‌ڤۆ نیوز دیار كر: نوكه‌ پرۆژه‌ قانوونا تاپۆكرنا خانیێن زێده‌گاڤی ل ده‌ف سه‌رۆكێ‌ هه‌رێما كوردستانێ‌ یه‌ بۆ په‌سه‌ند كرنێ‌، وه‌سا بریاره‌ پشتی په‌سه‌ند كرنێ‌ ژ لایێ‌ سه‌رۆكێ‌ هه‌رێما كوردستانێ‌ ڤه‌ بكه‌ڤیته‌ د وارێ‌ بجهئینانێ‌ دا، د قۆناغا ئێكێ‌ دا شه‌ش هه‌یڤ هاتینه‌ دیار كرن بۆ كۆمكرنا ئامار و داتا ده‌رباره‌ی هژمارا خانیێن زێده‌گاڤیێ‌، هه‌روه‌سا دو سال و شه‌ش هه‌یڤان دێ‌ بۆ بجهئینانا ڤێ‌ بریارێ‌ بن، پێدڤیه‌ د ده‌مێ‌ سێ‌ سالان دا ئه‌ڤ پرۆژه‌ قانوونه‌ ته‌مام ببیت، دیسان لدووڤ قانوونا تاپۆكرنا خانیێن زێده‌گاڤیێ‌ ئه‌ردی ژی ڤه‌دگریت، لێ‌ ڤێ‌ چه‌ندێ‌ مه‌رجێن خوه‌ هه‌نه‌، پێدڤیه‌ ئه‌و جهێ‌ ئه‌ردێ‌ زێده‌گاڤیێ‌ تێدا پرانیا وی خانی بیت، پشتی هنگێ‌ ژ لایێ‌ جڤاتا وێ‌ گه‌ره‌كێ‌ ڤه‌ په‌سه‌ند پێ‌ بهێته‌ دان و خودانێ‌ وی ئه‌ردی دو شاهد حال هه‌بن، كو چو كێشه‌ ل سه‌ر وی ئه‌ردی نینن، ل وی ده‌می دێ‌ یێ‌ مفادار بیت.

ئه‌و ئه‌ندامێ‌ لیژنا باژێرڤانیێ‌ ل په‌رله‌مانێ‌ كوردستانێ‌ زێده‌تر دبێژیت: پێدڤیه‌ د ده‌مێ‌ دو سال و شه‌ش هه‌یڤان دا هه‌موو خانی و ئه‌رد زێده‌گاڤی ل سه‌ر بهێنه‌ تاپۆكرن، دووماهی ب ڤێ‌ كێشێ‌ بهێت، ئه‌و ده‌مێ‌ هاتیه‌ دیار كرن ژی یێ‌ گۆنجایه‌ بۆ بجهئینانا ڤێ‌ قانوونێ‌، دیسان ده‌م یێ‌ ڤه‌كری نینه‌ بۆ تاپۆكرنێ‌ و پشتی ب د ووماهی هاتنا ده‌مێ‌ ده‌ست نیشانكری ئێدی كه‌س نه‌شێت خانیێن زێده‌گاڤی تاپۆ بكه‌ت، هه‌روه‌سا هه‌كه‌ خه‌لك یێ‌ هاریكار بیت، ئه‌و ده‌مێ‌ هاتیه‌ دیار كرن تێرا هندێ‌ هه‌یه‌، كو هه‌موو خانیێن زێده‌گاڤیێ‌ بهێنه‌ تاپۆكرن، دیسان خه‌لك و حكومه‌ت هه‌ردو ژ ڤێ‌ بریارێ‌ د مفادارن، چونكی دێ‌ ژ ئاریشا زێده‌گاڤیێ‌ قورتال بن، هه‌روه‌سا لدووڤ وێ‌ ئاراما وه‌زاره‌تا باژێرڤانیێ‌ دایه‌ مه‌، هه‌ر چه‌نده‌ یا فه‌رمی نینه‌، لێ‌ وه‌سا دیار كریه‌ كو نوكه‌ پتری 250 هزار خانیێن زێده‌گاڤی ل كوردستانێ‌ هه‌نه‌.

ئه‌ڤرۆ نيوز:

حه‌فتیا به‌رهه‌نگاربوونا توندوتیژیا دژی ئافره‌تان ئه‌ڤرۆ رۆژا 25/11/2019 دێ‌ ل ده‌ڤه‌رێن جودا یێن هه‌رێما كودرستانێ‌ ده‌ست پێ‌ كه‌ت و تێدا دێ‌ چه‌ندین چالاكی و ئامارێن تایبه‌ت ب توندوتیژیا به‌رامبه‌ر ئافره‌تان هێنه‌ به‌رچاڤكرن.

رائید فریاد هیدایه‌ت، په‌یڤدارا رێڤه‌به‌ریا به‌رهه‌نگاربوونا توندوتیژیا دژی ئافره‌ت و خێزانێ‌ ل هه‌رێما كوردستانێ‌ بۆ باسنیوز دیار كر كو ئه‌ڤرۆ رێڤه‌به‌ریا به‌رهه‌نگاربوونا توندوتیژیا دژی ئافره‌ت و خێزانێ‌ ل هه‌موو ده‌ڤه‌رێن هه‌رێما كوردستانێ‌ دێ‌ حه‌فتیا به‌رهه‌نگاربوونا توندوتیژیا دژی ئافره‌تان راگه‌هینن و دێ‌ ده‌ست ب ئه‌نجامدانا چالاكیان هێته‌كرن.

ناڤهاتیێ‌ خویا كر كو هه‌ڤشێوه‌یێ‌ سالێن بۆری چالاكی ئه‌ڤ ساله‌ ژی دێ‌ ب هاریكاریا رێكخراوێن ئافره‌تان هێنه‌ ئه‌نجامدان.

سالانه‌ ل هه‌رێما كوردستانێ‌ ل رۆژا 25 نوڤه‌مبه‌رێ‌ كو ب هه‌لكه‌فتا رۆژا جیهانیا به‌رهه‌نگاربوونا توندوتیژیا به‌رامبه‌ر ئافره‌تان چالاكی دهێنه‌ ئه‌نجامدان و حه‌فتیا به‌رهه‌نگاربوونا توندوتیژیا دژی ئافره‌تان دهێته‌ راگه‌هاندن.