ئەڤرۆ نیوز،بارزان مزووری:
بوتان شمس الدین، بەرپرسێ‌ راگەهاندنا قایمقامیا قەزا بەردەرەش بۆ ئەڤرۆ نیوز دیار كر ئەڤرۆ دوشه‌مبى 18/11/2019 لژنا ئابوری یا قایمقامیا بەردەرەش ب هەماهەنگی دگەل ئاسایش و پولیسان 16 تەنێن روینێ‌ ژ جورێ‌ (زێر) دناڤ بازاری دا دەستەسەكرن كو پێك دهاتن 1406 تەنەكێن روینی.

ناڤهاتی خویاكر پشتی پشكنین بۆ وی جورێ‌ روینی هاتیە ئەنجامدان دیاربوو كۆ ئەڤ جورێ‌ روینی بكێر خوارنێ‌ ناهێت وپێدڤیە نەهێته‌ فرۆتن وئێكسەر ده‌ست ب سه‌ردا هاته‌ گرتن ژلایێ‌ تیمەكا تایبەت وبۆ جهەكێ‌ دوور ژ باژێری هاته‌ ڤەگوهاستن بێ‌ كو زیان ب خەلكی بكەڤن وهاته‌ سوتن .

 گوت ژى” لژنا ئابوری یا بەردەوامە ل سه‌رده‌ست ب سه‌رداگرتنا وی جورێ‌ روینی د نها دا بتنێ‌ دناڤ سەنتەری باژێرى لێگەریاینە و ل رۆژێن بهێت تیمێن مە دێ‌ ل دەرڤەی سەنتەری گەريێن ودهێتە پێشبینی كرن ژی 15 تەنێن دی ژى ده‌ست ب سه‌ردا بهێته‌ گرتن ژبه‌ركو پێزانین گەهشتینە مە كو ل دەرڤەی باژێری ژی دهێته‌ فروتن”.

ئه‌ڤرۆ نيوز، نيوار محه‌مه‌د سه‌ليم:

مه‌كته‌با سياسى يا پارتى ديموكراتى كوردستان روونكرنه‌ك ل دۆر تۆمه‌تباركرنا پێشمه‌رگه‌ى ل دژى خوه‌نيشاندانان به‌لاڤكر و ئاشكه‌را كر كو پێشمه‌رگه‌ زۆر ژ هندێ يێ دووره‌ كو ب هه‌ڤدژى وژدان و خواستێن نشتيمانى ناڤ و رێبازا خوه‌ له‌نگدار بكه‌ت.

مه‌كته‌با سياسى يا پارتى ديموكراتى كوردستان د روونكرنه‌كێ دا كو دانه‌ك ب ده‌ست ئه‌ڤرۆ نيوز كه‌فتيه‌ دياركر كو ئه‌وان وه‌كو پارتى ديموكراتى كوردستان رێز و پێزانين بۆ هه‌موو بزاڤ و تێكوشينێن جه‌ماوه‌رى يێن ئاشتيخواز يێن هه‌موو ته‌خ و چينان كو ل گۆره‌پانێن خوه‌نيشاندانن هه‌يه‌ و ل گه‌ل كۆم بووينه‌، مه‌ ب پێدڤى دزانى بۆچوونا خووشك و برايێن خوه‌ يێن خودان مافێن دستوورى رابكێشين دا كو ئاگه‌هدارى بزاڤێن هنده‌ك خه‌لكێ سه‌ر لێ شێويايى و تێكده‌ر بن كو بۆ ژناڤبرن و تێكدانا ئاشتيا جڤاكى و دروستكرنا مه‌ترسيێ بۆ سه‌ر سلامه‌تيا نشتيمانى، ل دژى پێشمه‌رگه‌ى پرۆپاگندێن ژه‌هراوى به‌لاڤ دكه‌ن، ئه‌و ژى د رێيا تێكه‌لكرنا ناڤێ پێشمه‌رگه‌ى ل گه‌ل به‌رپرساتيا ژ وان بابه‌تێن د ناڤ خوه‌نيشانده‌ران دا رووداين.

دا زانين ژى كو پێشمه‌رگه‌ى كو ب مێژوويا دوور و درێژ يا نشتيمانى خوه‌ بۆ هه‌موو عيراقيان قه‌لغان بوويه‌ و هه‌موو پاراستينه‌ و ب شه‌هيدێن سه‌ربلندێن خوه‌ قوربانى و وه‌فادارى پێشكێش كريه‌ بۆ وێ چه‌ندێ گه‌لێ عيراقێ ب هه‌موو پێكهاتێن خوه‌ ڤه‌ د پێشه‌نگا گه‌لێن ئازاديخواز و پێشكه‌فتيخوار دا بيت، هێزا پێشمه‌رگه‌ى پشكه‌كه‌ ژ سيسته‌مێ به‌رگريێ عيراقێ و برايێن هه‌وه‌نه‌، پێشمه‌رگه‌ زۆر ژ هندێ يێ دووره‌ كو ب هه‌ڤدژى وژدان و خواستێن نشتيمانى ناڤ و رێبازا خوه‌ له‌نگدار بكه‌ت.

ل دووماهيێ ژى ئاماژه‌ ب وێ چه‌ندێ كر كو دوژمنێن ئێكرێزيا نشتيمانى ب مه‌ره‌ما گوهۆڕينا رێيا روودانان و بۆ خزمه‌تا به‌رژه‌وه‌نديێن گۆماناوى، بزاڤا به‌خشينا تۆمه‌تێن دره‌و دده‌ن. ئه‌م ژى په‌يمانێ دده‌ين كو گه‌لێ مه‌ ب هه‌موو هێزێن خوه‌ بۆ روو ب روو بوونا هه‌موو ئه‌وێن بزاڤێن تێكدانا ئێكرێزيا نشتيمانى دده‌ن، د ئاماده‌باشيێ دابيت.

ده‌قێ روونكرنا مه‌كته‌با سياسى يا پارتى ديموكراتى كوردستان

پشكه‌ك ژ كورێن گه‌لێ عيراقێ، ب خوه‌نيشاندان و داخوازكرنا مافێن خوه‌ د چارچۆڤێ ناسناما وه‌لاتيبوون و د پێناڤ باشتركرنا هه‌لومه‌رجێن نها يێن عيراقێ دا، مافه‌كى په‌يره‌و دكه‌ن كو دستوور پشت گوهـ هاڤێتيه‌.

مه‌ وه‌كو پارتى ديموكراتى كوردستان رێز و پێزانين بۆ هه‌موو بزاڤ و تێكوشينێن جه‌ماوه‌رى يێن ئاشتيخواز يێن هه‌موو ته‌خ و چينان كو ل گۆره‌پانێن خوه‌نيشاندانن هه‌يه‌ و ل گه‌ل كۆم بووينه‌، مه‌ ب پێدڤى دزانى بۆچوونا خووشك و برايێن خوه‌ يێن خودان مافێن دستوورى رابكێشين دا كو ئاگه‌هدارى بزاڤێن هنده‌ك خه‌لكێ سه‌ر لێ شێويايى و تێكده‌ر بن كو بۆ ژناڤبرن و تێكدانا ئاشتيا جڤاكى و دروستكرنا مه‌ترسيێ بۆ سه‌ر سلامه‌تيا نشتيمانى، ل دژى پێشمه‌رگه‌ى پرۆپاگندێن ژه‌هراوى به‌لاڤ دكه‌ن، ئه‌و ژى د رێيا تێكه‌لكرنا ناڤێ پێشمه‌رگه‌ى ل گه‌ل به‌رپرساتيا ژ وان بابه‌تێن د ناڤ خوه‌نيشانده‌ران دا رووداين.

پێشمه‌رگه‌ى كو ب مێژوويا دوور و درێژ يا نشتيمانى خوه‌ بۆ هه‌موو عيراقيان قه‌لغان بوويه‌ و هه‌موو پاراستينه‌ و ب شه‌هيدێن سه‌ربلندێن خوه‌ قوربانى و وه‌فادارى پێشكێش كريه‌ بۆ وێ چه‌ندێ گه‌لێ عيراقێ ب هه‌موو پێكهاتێن خوه‌ ڤه‌ د پێشه‌نگا گه‌لێن ئازاديخواز و پێشكه‌فتيخوار دا بيت، هێزا پێشمه‌رگه‌ى پشكه‌كه‌ ژ سيسته‌مێ به‌رگريێ عيراقێ و برايێن هه‌وه‌نه‌، پێشمه‌رگه‌ زۆر ژ هندێ يێ دووره‌ كو ب هه‌ڤدژى وژدان و خواستێن نشتيمانى ناڤ و رێبازا خوه‌ له‌نگدار بكه‌ت.

ژ به‌ر هندێ دوژمنێن ئێكرێزيا نشتيمانى ب مه‌ره‌ما گوهۆڕينا رێيا روودانان و بۆ خزمه‌تا به‌رژه‌وه‌نديێن گۆماناوى، بزاڤا به‌خشينا تۆمه‌تێن دره‌و دده‌ن. ئه‌م ژى په‌يمانێ دده‌ين كو گه‌لێ مه‌ ب هه‌موو هێزێن خوه‌ بۆ روو ب روو بوونا هه‌موو ئه‌وێن بزاڤێن تێكدانا ئێكرێزيا نشتيمانى دده‌ن، د ئاماده‌باشيێ دابيت.

مه‌كته‌با سياسى يا پارتى ديموكراتى كوردستان

18/11/2019 هه‌ولێر