ئه‌ڤرۆ نیوز، نه‌وزاد هلۆرى:
هوستایه‌كێ شێلادزێ بناڤێ (عه‌بدولخالق زێبارى) رابوویه ب چێكرنا نووترین مه‌قلا بژارتنا گوشتى، داهێنانه‌كا نوو ژى ل سه‌ر كریه، ئه‌و ژى ئه‌وه هه‌موو شیشكێن بژارتنا گوشتى پێكڤه ل سه‌ر زنجیره‌كێ گرێداینه، ب زڤراندنا ئیّك ژ وان شیشكان، هه‌موو شیشكێن دى بخوه دزڤرن، ب گوره‌ى ئاخفتنێن وى، مفایێ ئه‌ڤێ داهێنانێ د وێ یه‌كێ دایه ژبلى كو ده‌ستێ مرۆڤى ناسوژیت، دهه‌مان ده‌م دا گوشت هه‌موو وه‌كو ئیّك چێدبیت و ناسوژیت.
ئه‌ڤرۆ نیوز:
نڤیسینگه‌ها سه‌رۆكێ حوكمه‌تا هه‌رێما كوردستانێ د رۆهنكرنه‌كێ دا ده‌نگوباسه‌كێ نه‌راست یێ سایته‌كێ ئه‌مریكى ره‌ت دكه‌ت و رادگه‌هینیت كو دێ پێرابوونێن قانوونى به‌رامبه‌ر وێ جه‌واشه‌كاریێ گرینه به‌ر.
د وێ رۆهنكرنێ دا هاتیه” ل ڤان چه‌ند رۆژێن دووماهیێ، ده‌نگوباسه‌كێ نه راست ل سایته‌كێ ئه‌مریكى به‌لاڤبوویه و ب شێوه‌كێ نه‌ره‌وا، ناڤێ سه‌رۆكێ حوكمه‌تا هه‌رێما كوردستانێ ب بابه‌تێ كرینا ڤێلایه‌كێ هاتیه، مخابن هنده‌ك سایت و ده‌زگه‌هێن میدیا ناڤخوه ژى ب شێوه‌كێ جه‌واشه‌كارانه ئه‌و ده‌نگوباسێ نه‌راست به‌لاڤكریه”.
هه‌روه‌سا به‌لاڤكریه” ئه‌م ب ناڤێ نڤیسینگه‌ها سه‌رۆكێ حوكمه‌تێ، وى ده‌نگوباسى ره‌ت دكه‌ین و دێ پێرابوونێن قانوونى ژى به‌رامبه‌ر وان جه‌زاشه‌كاریان گرینه به‌ر”.
ئەڤرۆ نیوز،بارزان مزووری:
هێمن سلێمان، بەرپرسێ پەیوەندی و راگەهاندنا رێڤەبەریا پولیسێن پارێزگه‌ها دهۆكێ بۆ ئەڤرۆ نیوز راگه‌هاند، ئەڤرۆ پشتی نیڤرۆ بنگەهێ پولیسێن ناحیا کەلەکچی هاتنە ئاگەهدارکرن کۆ زارۆیەک ب ناڤێ”نه‌بیل جەمیل” ژیێ وى حەفت سالە د گومەکا ئاڤێ دا خەندقیە.
ناڤهاتی خویاکر پشتی کەفتیە د ناڤ گوما ئاڤێ دا تەرمێ وى هاته ده‌رئینان و بۆ نوشداریا داد ل باژێرێ دهۆكێ هاته رەوانەکرن.
گوت ژى” پەرێن ڤەکولینێ ل دۆر روودانێ هاتینه ڤه‌كرن و ڤه‌كۆلین یا بەردەوامە”.
ئه‌ڤرۆ نيوز، نيوار محه‌مه‌د سه‌ليم:
د خۆنيشاندانێن رۆژهه‌لاتێ كوردستانێ دا، 17 كه‌س هاتنه كوشتن و نێزيكى 100 كه‌سان ژى بريندار بووينه.
ب گۆره‌ى دووماهى پێزانين ل سه‌ر خۆنيشاندانێن ئيرانێ و رۆژهه‌لاتێ كوردستانێ هه‌تا نها نێزيكى 30 كه‌سان ب ته‌قه‌يێن هێزێن ئه‌منى هاتينه كوشتن و چه‌ندين كه‌س ژى بريندار بووينه.
مالپه‌رێ هه‌نگاو بۆ پرسێن مافێ مرۆڤى ل رۆژهه‌لاتێ كوردستانێ ئاشكه‌را كريه كو هه‌تا نها زێده‌ترى 11 خۆنيشانده‌ران ل رۆژهه‌لاتێ كوردستانێ ب ته‌قه‌يا هێزێن ئه‌منى گيانێ خوه ژ ده‌ست دايه و نێزيكى 100 كه‌سان ژى بريندار بووينه.
ب گۆره‌ى پێزانينان 10 كه‌س ل باژێرێن جوانتڕۆ، شه‌ش كه‌س ل مه‌ريوان و خۆنيشانده‌ره‌ك ژى ل باژێرێ سنه هاتينه كوشتن. خوه‌نيشاندانێن ئه‌ڤرۆ ژى ل پتريا باژێرێن ئيرانێ و رۆژهه‌لاتێ كوردستانێ د به‌رده‌وامن.
ئەڤرۆ نیوز، رێوار محەمەد رەشید:
ئەنجومەنێ لقێ دهۆک یێ سەندیکا نۆشدارێن ددانا ل کوردستانێ د بەیاننامەکێ دا پشتەڤانیا خوە بۆ وان نۆشدارێن ددانا یێن کو نەهاتینە دامەزراندنان دیار کر.
د هەمان بەیاننامەدا کو دانەیەک ژێ ب دەست ئەڤرۆ نیوز کەفتیە تێدا هاتیە، ئەم وەکو ئەنجومەنێ لقێ دهۆک یێ سەندیکا نۆشدارێن ددانا ل کوردستانێ پشتگێریا هەمی داخوازیێن رەوا یێن نۆشدارێن ددانا دکەین ئەوێن نەهاتینە دامەزراندن کو ئەڤە ژی کێمترین مافێ وان یێ قانوونی یەبهێنە دامەزراندن داکو بەردەوامیێ بدەنە تمامکرنا خزمەتا خوە یا پیشەیی یا کو وان دەست پێکری ب وەرگرتنا وێ باوەرنامێ کو ب قانوونێ ئاماژە پێ هاتیەدان ل هەرێما کوردستانێ و عیراقێ کو ئەڤ چینە ژ پێدڤیێن سەرەکی نە د پیشەیا ساخلەمیێ دا.
وەکو پالپشتیەک داخوازێ ژ هەمی نۆشدارێن ددانا یێن ل سنوورێ پارێزگەها دهۆکێ دکەین ل رۆژا چارشەمبی 20/11/2019 کلینیکێن خوە یێن تایبەت بگرن ب مەرەما خرڤەبوونەکێ ل پارکا بارزانیێ نەمر ل دەمژمێر 3:00 ئێڤاری.
ئه‌ڤرۆ نيوز، نيوار محه‌مه‌د سه‌ليم:
سه‌رۆكێ جڤاتا نوونه‌رێن عيراقێ پرۆژێ قانوونا هه‌لبژارتنێن جڤاتێن پارێزگه‌هان ره‌وانه‌ى لژنا قانوونى يا جڤاتا نوونه‌ران كر.
ب گۆره‌يى به‌لگه‌نامه‌كێ، محه‌مه‌د حه‌لبۆسى، سه‌رۆكێ جڤاتا نوونه‌رێن عيراقێ، پرۆژێ قانوونا هه‌لبژارتنێن جڤاتا پارێزگه‌هان دايه ده‌ست لژنا قانوونى يا جڤاتا نوونه‌ران، بۆ ئه‌داكرنا رێكارێن قانوونى و ئاماده‌كرنا پرۆژه‌يى دا كو د روونشتنا جڤاتێ دا گه‌نگه‌شێ ل سه‌ر بكه‌ن.
بڕيار بوو هه‌يڤا نيسانا سالا داهاتى، هه‌لبژارتنێن جڤاتێن پارێزگه‌هان ل عيراقێ هاتبانه كرن، به‌لێ بۆ ده‌مه‌كێ نه‌ديار هاتنه پاشخستن پشتى كو جڤاتێ پارێزگه‌هان ل عيراقێ نه‌ماين.
ئه‌ڤرۆ نيوز، نيوار محه‌مه‌د سه‌ليم:
رێبه‌رێ كۆمارا ئيسلامى يا ئيرانى هه‌لويستێ خوه ل سه‌ر بلندكرنا بهايێ پانزينێ راگه‌هاند و ئاشكه‌را كر كو ئه‌و پێشوازيێ ل وێ بڕيارێ دكه‌ت.
ئايه‌تولا عه‌لى خامه‌نه‌يى، رێبه‌رێ كۆمارا ئيسلامى يا ئيرانى، هه‌لويستێ خوه ده‌رباره‌ى روودانێن ئيرانێ ده‌ربڕى و گۆت: “سێ سه‌رۆكاتيێن ئيرانێ بڕيارا گرانكرنا پانزينێ ده‌ركريه، ئه‌ز ژى پێشوازيێ ل وێ بڕيارێ دكه‌ت و دڤێت بهێته بجهئينان.
وه‌لاتێ ئيرانێ بهايێ په‌نزينێ گران و ژ هزار تۆمه‌نان ئێكسه‌ر كره سێ هزار تۆمه‌ن و ب ڤێ چه‌ندێ ژى نه‌رازيبوونێن مه‌زن ل ده‌ف خه‌لكێ وى وه‌لاتى په‌يدا بوون و رژيانه سه‌ر جادده‌يان داخوازا كێمكرنا بهايێ په‌نزينێ دكرن.
ئه‌ڤرۆ نيوز:
د رۆژا جيهانى يا لێبۆرينێ دا، مه‌سرور بارزانى سه‌رۆكێ حوكمه‌تا هه‌رێما كوردستانێ پێشوازى ل شانده‌كێ پێكهاتێن ئايينى يێن هه‌رێما كوردستانێ كر.
شاندێ ناڤبرى ژ نوونه‌رێن ئايينێن ئيسلام، مه‌سيحى، ئێزدى، كاكه‌يى، زه‌رده‌شتى، سابيئێن مه‌ندائى و به‌هائى پێكهاتبوون و دانوستاندن ل دۆر پێشڤه‌برنا پێكڤه‌ژيانا ئايينى و لێبۆرينێ ل هه‌رێما كوردستانێ هاته كرن.
سه‌رۆكێ حوكمه‌تا هه‌رێما كوردستانێ ئاماژه كر كو ئايين تمامكه‌رێن هه‌ڤدونه و ئارمانجا وان رێ نيشاندانا مرۆڤى يه بۆ رێيا راست و گۆت” ئێك ژ روويێن گه‌شێن ئه‌زموونا هه‌رێما كوردستانێ كو به‌رده‌وام جهێ شانازيا مه‌يه و جهێ رێزێ يه ل ده‌ڤ جڤاكا نێڤده‌وله‌تى، ئه‌و پێكڤه‌ژيان و ته‌باييه كو د ناڤبه‌را پێكهاتێن ئايينى ل هه‌رێما كوردستانێ هه‌ى”.
مه‌سرور بارزانى دووپاتى ل وێ چه‌ندێ كر كو كوردستان نيشتمان و مالا مه هه‌موويانه و پێدڤيه ئه‌م هه‌موو كار ل سه‌ر گه‌شه‌پێدانا هزرا ميانره‌و و پێكڤه‌ژيانێ ل هه‌رێما كوردستانێ بكه‌ين و هه‌موو رۆژێن مه رۆژێن پێكڤه‌ژيان و لێبۆرينێ بن.
نيشاندان