ئه‌ڤرۆ نيوز:
سه‌رۆك كۆمارا عيراقێ به‌رهه‌م سالح ئه‌ڤرۆ دوشه‌مبى 4/11/2019 گه‌هشته هه‌ولێرێ و ژ لايێ نێچيرڤان بارزانى سه‌رۆكێ هه‌رێما كوردستانێ و هژماره‌كا به‌رپرسێن هه‌رێمێ هاته پێشوازيكرن.
برياره د سه‌ره‌دانا خوه دا بۆ هه‌ولێرێ، به‌رهه‌م سالح ل گه‌ل هه‌رسێ سه‌رۆكايه‌تيێن هه‌رێما كوردستانێ و لايه‌نين سياسى كۆم ببيت بۆ به‌حسكرنا ره‌وشا عيراقێ و گوهۆرينين ده‌ڤه‌رێ.
ئه‌ڤرۆ نیوز:
بریاره سوباهى سێشه‌مبى 5/11/2019 هه‌ر ئێك ژ سه‌رۆكایه‌تیا هه‌رێما كوردستانێ و سه‌رۆكایه‌تیا حوكمه‌تێ و سه‌رۆكایه‌تیا په‌رله‌مانى بۆ به‌حسكرنا پرسێن هه‌رێما كوردستانێ و عیراقێ و په‌یوه‌ندیێن هه‌رێمێ و به‌غدا كۆم ببن.
پشتى كۆمبوونا سێ سه‌رۆكایه‌تیێن هه‌رێما كوردستانێ، كۆمبوونه‌كا دى یا به‌رفرهه ب پشكداریا به‌رهه‌م سالح سه‌رۆك كۆمارا عیراقێ و لایه‌نین سیاسى دێ هیته ئه‌نجامدان.
كۆمبوون د ده‌مه‌كى دایه، ل به‌غدا لژنه‌كا تایبه‌ت بۆ راستڤه‌كرنا دستوورێ به‌رده‌وامێ عیراقێ هاتیه دروستكرن و چاڤه‌رێ دهێته كرن عادل عه‌بدولمه‌هدى سه‌رۆك وه‌زیرێن عیراقێ گوهۆرینان د كابینا حوكمه‌تا خوه دا بكه‌ت.
هه‌ڤده‌م خوه‌نیشانده‌رین عیراقێ داخوازا ده‌ست ژ كاركێشانا سێ سه‌رۆكایه‌تیێن عیراقێ و ئه‌نجامدانا هه‌لبژارتنێن پێشوه‌خت دكه‌ن.
ئه‌ڤرۆ نيوز:
سه‌رۆكێ حوكمه‌تا هه‌رێما كوردستانێ، مه‌سرور بارزانى ئه‌ڤرۆ دوشه‌مبى 4/11/2019 پێشوازى ل شانده‌كێ جڤاتا بازرگانى عيراقى – بريتانى كر، ب سه‌رۆكاتيا ئێما نيكلسن نوونه‌را سه‌رۆك وه‌زيرێن بريتانيا بۆ كاروبارێن بازرگانيێ ل گه‌ل عيراقێ.
د كۆمبوونه‌كێ دا دانوستاندن ل دۆر گه‌شه‌پێدانا په‌يوه‌نديێن باڤرگانى د ناڤبه‌را بريتانيا و هه‌رێما كوردستانێ و عيراقێ هاتنه كرن.
ئێما نيكلسن ئاماژه دا كو حوكمه‌تا بريتانيا يا به‌رهه‌ڤه هاريكاريا حوكمه‌تا هه‌رێما كوردستانێ بكه‌ت د بجهئينانا كارناما خوه‌دا د وارێ هه‌مه‌جۆركرنا ئابوورى و پشت نه‌به‌ستن ب ئێك ژێده‌رى بۆ داهاتى.
سه‌رۆكێ حوكمه‌تا هه‌رێما كوردستانێ دووپاتى ل وێ چه‌ندێ كر كو ئێك ژ ئارمانجێن سه‌ره‌كى يێن كابينا نه‌هێ ئه‌وه، ب رێيا پێشخستنا شيانان و ديتنا بازارى بۆ به‌رهه‌مێن ناڤخوه، هه‌رێما كوردستانێ ژ جڤاكه‌كێ به‌كاربه‌ر بكه‌ته به‌رهه‌مئينه‌ر.
ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ دوشه‌مبى 4/11/2019 ل گه‌ل شانده‌كێ ناڤه‌ندا ديالۆكا رافيده‌ين كۆمبوو، كو ژ هژماره‌كا كه‌سايه‌تى و نوخبا ئه‌كاديمى و فه‌رهه‌نگى يا عيراقى پێكهاتبوو.
د وێ كۆمبوونێ دا كو ب مه‌ره‌ما گوهۆرينا بير و بۆچوونان ل دۆر خوه‌نيشادانێن وه‌لاتيان و ره‌وشا سياسى يا عيراقێ و پاشه‌رۆژا پرۆسا سياسى هاتبوو سازكرن، شاندێ مێهڤان سه‌رنجێن خوه ل دۆر ره‌وشێ به‌رچاڤكر و پلانا ناڤه‌ندا ديالۆكا رافيده‌ين بۆ ڤه‌كۆلينێ ژ ره‌وشا نوكه و به‌رچاڤكرنا پێشنيازێن خوه بۆ گاڤێن پێدڤى بۆ چاره‌سه‌ريێ، بۆ سه‌رۆك بارزانى شرۆڤه‌كر.
سه‌رۆك بارزانى سه‌ره‌راى ده‌ربرينا پشته‌ڤانيێ بۆ داخوازيێن ره‌وا يێن خه‌لكى، رۆهنكر كو مافێ خه‌لكى يه داخوازا ژيانه‌كا ئاسووده و سه‌ربه‌رزانه بكه‌ت و ئه‌و ره‌وشا بوويه ئه‌گه‌رێ نه‌رازيبوونا خه‌لكى ئه‌نجامێ سياسه‌تا شاش يا سالێن بۆرى يه و نابيت به‌رپرسياره‌تيا وێ ب ستوويێ سه‌رۆك وه‌زيرێن نوكه ب تنێ دابيت و هنده‌ك كو ئه‌و ب خوه ئه‌گه‌رێن كه‌م و كوتريان و شكه‌ستنێن سالێن بۆرى بوون، نوكه يێن سيارى پێلا نه‌رازيبوونا خه‌لكێ دبن.
سه‌رۆك بارزانى گۆت ژى” هه‌كه دستوورێ نوكه يێ عيراقێ وه‌كو خوه هاتبا بجهئينان، پتريا كێشان نه‌دهاته روودان و مافێن وه‌لاتيان دا هێته پاراستن، به‌لێ ژ ئه‌نجامێ پشتگوهاڤێتنا دستوورى و بزاڤێن تاكره‌ويێ و خوه‌سه‌پاندنێ، عيراق گه‌هشته ڤێ ره‌وشێ و چاره‌سه‌ركرنا وێ ژى پێدڤى ب نه‌هێلانا ئه‌گه‌ران هه‌يه”.
سه‌رۆك بارزانى رۆهنكر ژى كو دانوستاندنێن د ناڤبه‌را هه‌رێمێ و به‌غدا ب ئاراسته‌يا چاره‌سه‌ركرنا كێشان گاڤێن باش هاڤێتنه و د به‌رده‌وامن ژى، ب راشكاوانه ژى ب شاندێ مێهڤان راگه‌هاند كو ئه‌و داخوازيێن ب ناڤێ خوه‌نيشانده‌ران بۆ گوهۆرينا سيسته‌مێ حوكمى و ده‌ستكاريكرنا دستوورى دهێته به‌رچاڤكرن، هه‌تا وى راه‌ى د ره‌وا و قبوولكرى نه كو دژى مافێن دستوورى و شه‌رعى يێن گه‌لێ كوردستانێ نه‌بن و بنه‌مايێن ديموكراسى يێن ته‌وافوقێ و پێكڤه‌ژيانى يێن هه‌موو پێكهاتان بپارێزيت.
سه‌رۆك بارزانى پێشوازى ل ئارمانجێن ناڤه‌ندا ناڤبرى بۆ ديالۆكێ و گوهۆرينا بير و بۆچوونان و پێشنيازكرنا چاره‌سه‌ريا گونجاى بۆ كێشان كر و ب گاڤه‌كا گه‌له‌ك باش زانى بۆ لێكتێگه‌هشتن و گه‌هشتن ب ئه‌نجامێن ب مفا.
لژنا پێشه‌سازى و وزه و سامانێن سرۆشتى ل جڤاتا پارێزگه‌ها دهۆكێ سه‌ره‌دانا هه‌ر ئێك ژ سه‌رته‌نگێ و پێ بزنێ كرن دا ژ نێزيك هايدارى كوالێتيا گازا سپى و كۆژمێ وێ بن ئه‌وا بڕياره ل سه‌ر وه‌لاتيان بهێته به‌لاڤكرن.
عه‌بدولسه‌مه‌د تێلى، سه‌رۆكێ لژنا پێشه‌سازى و وزه و سامانێن سرۆشتى ل جڤاتا پارێزگه‌ها دهۆكێ د داخۆيانيه‌كێ دا راگه‌هاند كو لژنا وان ئه‌ڤرۆ رۆژا دوشه‌مبى رێكه‌فتى 4ى چريا دويێ 2019 سه‌ره‌دانا تاقيگه‌هێن پشكنينا به‌رهه‌مێن سۆته‌مه‌نيێ ل سه‌رته‌نگێ كرن ژبۆ پشت راست بوون ژ وێ گازا بڕياره ل سه‌ر وه‌لاتيان بهێته به‌لاڤكرن.
لژنا پێشه‌سازى و وزه و سامانێن سرۆشتى ل جڤاتا پارێزگه‌ها دهۆكێ ئاشكه‌را ژى كر كو هه‌ر ئه‌ڤرۆ ئه‌وان سه‌ره‌دانا عۆمبارێن سه‌ره‌كى يێن سۆته‌مه‌نيێ ل پێ بزنێ ژى كرن ژبۆ هايدار بوون ل سه‌ر وى كۆژمێ گازا سپى يا دێ رۆژانه گه‌هيته پارێزگه‌ها دهۆكێ و ئه‌وا دێ ل سه‌ر وه‌لاتيان هێته به‌لاڤكرن.
ئه‌ڤرو نیوز، ئێقبال عومه‌ر:
روژانه لیژنا چاڤدێریا بازرگانی ل ئامێدیێ ل سه‌ر دوكان و خارنگه‌ه و جهێن بازرگانی ل سنورێ قه‌زا ئامێدیێ د گه‌ریت ئارمانجا ڤێ لیژنێ ئه‌وه راببیت ژناڤبرنا كه‌لوپه‌لێن ماوه ب سه‌رڤه‌چوی و رێگرتن ل لادانێن ئابوری كو هنده‌ك تشت هه‌نه نابیت ل هه‌مو جهان بهێنه فروتن ئه‌وژی ژ به‌ر پاراستنا ساخله‌میا وه‌لاتیان و دیسان چاڤدێریا سه‌مونخانه و گوشت فروشان.
دكتور كامل ره‌شید رێڤه‌به‌رێ پشكا خوپارستنا ساخله‌میێ ل ئامێدیێ بو ئه‌ڤرو نیوز دا دیاركرن, لیژنا مه پێكهاتیه ژ تیمێن زێره‌ڤانیا ساخله‌میێ و قایمقامیی و ناحی و ئاسایشێ روژانه چاڤدێری و سه‌ره‌دانا دوكان و بازارێن باژێری و گوند و ناحی و كومه‌لگه‌هێن سه‌ر ب قه‌زا ئامێدیێ ڤه دكه‌ن داكو ئاگه‌هدار بكه‌ین و ل دوف رێنمایێن لیژنێ كار بكه‌ن و ئاگه‌هدار بن ل سه‌ر كه‌لو په‌لێن ب سه‌رڤه‌چویی و جورێن وان كه‌لوپه‌لان یێن دهێنه فروتن چونكه هنده‌ك تشت هه‌نه نابیت ل هه‌مو جهان بهێنه فروتن.
رێڤه‌به‌رێ پشكا خوپاراستنا ساخله‌مێ ل ئامێدیێ زێده‌تر گوت: سه‌ره‌دانێن مه ب تایبه‌تی وان خارنگه‌ه و كافتریا و دوكانان یێن پێتڤیێن روژانه یێن خه‌لكی دفروشن وه‌كو نان پێژی و هه‌روه‌سا گوشت فروشان ژی هنده‌ك جورێن گوشتی چێنابیت بهێته فروتن و ڤه‌خوارنین غازی ژی ب خوه‌ڤه دگریت, مه چاڤدێریه‌كا ته‌مام ل سه‌ر ڤان جیهان هه‌یه داكو ل دوڤ رێنمایێن لیژنا چاڤدێریێ كار بكه‌ن, ئه‌گه‌ر ل دیڤ رێنمایێن لێژنێ كار نه‌كه‌ن ئه‌و دوكانا كه‌لوپه‌لێن ب سه‌رڤه‌چوی كێمتربت ژ پێنج كیلوگرامان دێ هێنه ئاگه‌هداركرن و ئه‌گه‌ر پتربیت ژ پێنج كیلوگرامان دێ هێنه سزادان ب گوژمه‌كێ پاره‌ی و هه‌روه‌سا خارنگه‌ه و نانپێژ و كافیتریا و جهێن گه‌شت و گوزاری ژی ب هه‌مان شێوه‌ی ئه‌گه‌ر پێگیری رێنمایا نه‌بن دێ هێنه سزادان ب پاره‌ی و دائیخستنا جهی بو ماوه‌كێ دیاركری.
دكتوری زێده‌تر گوت: د ماوێ هه‌یڤه‌كێ دا مه ده‌ست ب سه‌ر پتر ژ سێ ته‌نه‌نێن كه‌لوپه‌لێن ماوه ب سه‌رڤه چوی ل سنورێ قه‌زا ئامێدیێ گرتینه و هاتینه ژناڤبرن, لیژنا چاڤدێریا بازرگانی بریار دا كو ب ئه‌گه‌رێ نه‌پێگیری كرنا رێنمتایێن لیژنێ چه‌ندین فروشیار هاتینه سزادان ب گوژمه‌كێ پاره‌ی و دوكان هاتینه دائێخستن.
ئه‌ڤرۆ نيوز:
د. ڤيان سه‌برى، سه‌رۆكا فراكسيۆنا پارتى ديموكراتى كوردستان ل به‌غدا بۆ K24 راگه‌هاند: سوبه‌هى رۆژا سێشه‌مبى لژنا راستڤه‌كرنا دستوورێ عيراقێ ل به‌غدا دێ كۆم بيت.
راگه‌هاند ژى كو لژنه ژ 18 كه‌سان پێك هاتيه و سێ كه‌س ژى د ناڤ دا كوردن و كه‌مينان ژى دێ نوونه‌رێن خوه هه‌بن.
ئاماژه ب وێ چه‌ندێ ژى كر كو ئه‌ڤرۆ شانده‌كێ هه‌رێما كوردستانێ به‌ر ب به‌غدا ب رێكه‌فتينه و بڕياره سوبه‌هى سپێدێ ل به‌غدا پشكداريێ د كۆمبوونا لژنێ دا بكه‌ن.
ئه‌ڤرۆ نيوز، نيوار محه‌مه‌د سه‌ليم:
سەرۆكێ زانكۆیا دهۆك پ. د. مصلح دهۆكی دیاركر كو ل رۆژا 7/11/2019 زانكۆیا دهۆك دێ ئاهەنگا دەرچوونا گەرا 24 یا قوتابیێن بەكالوریوسێ ل یاریگەها دهۆك یا وەرزشی گێریت.
پ. د. مصلح دهۆكی ئەو چەند ژی دیاركر كو ژ 18 كۆلیژان پتر ژ چار هزار قوتابیان ل سالا خواندنێ 2019-2018 ژ زانكۆیا دهۆك دەرچووینە و دێ د ئاهەنگا دەرچوونێ دا د پشكدار بن، ئەو چەند ژی دیاركر كو ئاهەنگا دەرچوونێ ل ڤی دەمی دێ گێرن دا قوتابیێن ل خولا دوویێ دەرچووین پشكداریێ د ئاهەنگێ دا بكەن.
ئه‌ڤرۆ نيوز:
خۆنيشانده‌ران ل كه‌ربه‌لا هێرش كره سه‌ر قونسليا ئيرانى و ئالايێ عيراقێ ل سه‌ر بلند كر.
شه‌ڤا بۆرى 3ى چريا دويێ 2019 خونيشانده‌ران ل كه‌ربه‌لا هێرش كره سه‌ر قونسليا ئيرانى ل وى باژێرى و ئالايێ عيراقێ ل سه‌ر بلند كر.
هه‌ر چه‌نده هێزێن ئه‌منى ب رێيا گازا رووندك رێژ بزاڤ كرن كو ره‌وشێ كونترۆل بكه‌ن و خۆنيشانده‌ران به‌لاڤ بكه‌ن، به‌لێ ئه‌و ل سه‌ر وێ كريارا خوه د به‌رده‌وام بوون و چو ژ ره‌وشێ نه‌هاته گوهۆڕين.
ئه‌ڤرۆ نيوز:
سه‌رۆكێ حوكمه‌تا هه‌رێما كوردستانێ، مه‌سرور بارزانى، ئه‌ڤرۆ ئێكشه‌مبى 3/11/2019 سه‌رپه‌رشتيا كۆمبوونا لژنا به‌رهه‌ڤكرنا پرۆێ قانوونا چاكسازيێ كر.
د كۆمبوونێ دا كو قوباد تاله‌بانى، جيگرێ سه‌رۆكێ حوكمه‌تێ به‌رهه‌ڤبووى، دانوستاندن ل دۆر ره‌هه‌ندێن گشتى يێن وێ قانوونێ و تايبه‌تمه‌نديێن قانوونى و كارگێرى هاته كرن، دووپاتى ل وێ چه‌ندێ هاته كرن كو پێدڤيه له‌ز د به‌رهه‌ڤكرنا پرۆژێ قانوونا چاكسازيێ بهێته كرن وه‌كو ئێك ژ كارێن به‌راهيێ يێن كارناما كابينا نه‌هێ يا حوكمه‌تا هه‌رێما كوردستانێ و هنارتنا وێ بۆ په‌رله‌مانێ كوردستانێ بۆ په‌سند كرنێ.
سه‌رۆكێ حوكمه‌تا هه‌رێما كوردستانێ دياركر، چاكسازى پرۆسه‌كا گه‌له‌ك گرنگه و پێدڤيه ب زووترين ده‌م پرۆژه قانوونا چاكسازيێ بهێته به‌رهه‌ڤكرن و ئاراسته‌ى په‌رله‌مانێ كوردستانێ بهێته كرن، گۆت ژى” پێدڤيه دادپه‌روه‌رى د چاكسازيێ دا هه‌بيت و نابيت هيچ كه‌سه‌كێ هه‌ژى مافێ وى بفه‌وتيت، به‌لێ د هه‌مان ده‌م دا رێ ژى ب كارێ نه قانوونى و نه‌ره‌وا ناهێته دان”.
لژنا به‌رهه‌ڤكرنا پرۆژێ قانوونا چاكسازيێ وه‌كو پشكه‌كا گرنگ يا هێلێن گشتى يێن كارناما كابينا نه‌هێ ب بريارا جڤاتا وه‌زيران و ب سه‌رۆكايه‌تيا وه‌زيرێ داد هاتيه پێكئينان.
نيشاندان