ئه‌ڤرۆ نيوز، نيوار محه‌مه‌د سه‌ليم:

لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ سه‌ره‌دانا باژێرڤانيا دهۆكێ دا و ل گه‌ل سه‌رۆكێ باژێرڤانى چه‌ندين گازنده‌ و داخوازيێن وه‌لاتيان گه‌هاندنێ.

نازك محه‌مه‌د، جێگرا لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ بۆ مالپه‌رێ ئه‌ڤرۆ نيوز ئاشكه‌را كر كو ژ پێخه‌مه‌ت گه‌هاندنا داخوازى و گازندێن وه‌لاتيان، لژنا وان ل گه‌ل سه‌رۆكاتيا باژێرڤانيا دهۆكێ كۆمبوو.

ئاشكه‌را ژى كر كو د وێ كۆمبوونێ دا، چه‌ندين ته‌وه‌ر هاتنه‌ به‌حسكرن كو گرێدايى داخۆازى و ئاريشێن وه‌لاتيان بووين يێن كو وان چو ب نامه‌ و چو ژى ب هاتنا وان بۆ جڤاتێ گه‌هاندينه‌ لژنێ.

نازك محه‌مه‌د گۆت: “ل ده‌سپێكێ مه‌ به‌حس ل داهاتێن وان كر و ئه‌و پرۆژێن ئه‌و دروست دكه‌ن ب وان داهاتان چو ژ رێژا گشتى يا بوودجێ بيت يان ژى يێ گه‌شه‌پێدانا پارێزگه‌هان يان ژى ئه‌وێن ژ رێكخراوێن نێڤده‌وله‌تى دهێت”.

جێگرا لژنا باژێرڤانى به‌حس ل وێ چه‌ندێ ژى كر كو د روونشتنا وان دا ل گه‌ل سه‌رۆكێ باژێرڤانيێ، به‌حس ل په‌يمانگه‌ها خواندنێن ئيسلامى ژى هاته‌ كرن و ئه‌گه‌رێن پشت گوهـ خستنا وێ.

گۆتژى: “به‌حس ب ره‌نگه‌كى گشتى ل گۆره‌پانا پرا شوره‌ش و ده‌وروبه‌رێن وێ هاته‌ كرن كو وه‌لاتيێن وێ ده‌ڤه‌رێ گه‌له‌ك گازندان دكه‌ن ب به‌هانه‌يا كۆمبوونا گلێشى و ئاڤا پيس و بێنه‌كا گه‌له‌ك نه‌خۆش ژ وان جهان دهێت”.

نازك خانێ نه‌ڤه‌شارت ژى كو ته‌وه‌ره‌كێ دى يێ كۆمبوونا وان ژى به‌حسكرن بوو ل سه‌ر چێكرنا جادده‌كا پياده‌ د ناڤ نه‌مامگه‌هێن دهۆكێ دا، دا كو وه‌لاتى بۆ ب رێڤه‌چوون و راهێنان و غاردانێ مفاى ژێ ببينن و گۆت: “مه‌ داخواز ژى ژ باژێرڤانيێ كر كو ياريێن بچووكان د ناڤ پاركێن گشتى دا بدانن و يێن هه‌يين و خراب ژى بووين، نووژه‌ن بكه‌ن، دا كو ل ده‌مێ سه‌ره‌دانێن وه‌لاتيان مفا ژێ بهێته‌ وه‌رگرتن”.

ئاماژه‌ ب وێ چه‌ندێ ژى كر كو گازنده‌ گه‌هشتبوونه‌ وان ژ لايێ ئه‌و وه‌لاتيێن رزكا يێن نێزيكى مه‌يدانكا ئه‌ينيان كو گه‌له‌ك ل وێرێ دبيته‌ قه‌ره‌بالغ و گلێش دو سێ رۆژان دمينيت و ناهێت راكرن و گۆت: “مه‌ داخواز ژێ كر كو ئێكا ژ وى ره‌نگى ل رۆژهه‌لاتێ باژێرى ژى بهێته‌ چێكرن، هه‌ر يێن وى لايى ژى دێ شێن مفاى ژێ وه‌رگرن و هه‌ر قه‌ره‌بالغ ژى دێ ل سه‌ر يا رۆژئاڤايێ باژێرى ل زركا كێم بيت”.

“مه‌ داخواز ژ باژێرڤانيێ كر ژى كو جادده‌يێن ناڤ پێشانگه‌هێن ترۆمبێلان يێن مايين بهێنه‌ ته‌مامكرن”، نازك محه‌مه‌د گۆت و دا زانين ژى كو وان گڤاشتن ل سه‌ر كريه‌ كو رێنمايا گرێدايى ئاڤاهيێن مه‌زن و پاركان بكه‌ڤيته‌ د وارێ بجهئينانێ دا كو ده‌ستووريا ئاڤاهيێن مه‌زن نه‌هێته‌ دان هه‌تا جهێ پاركا راوه‌ستيانا ترۆمبێلان ده‌ست نيشان نه‌كه‌ن يان ژى د ناڤ دا نه‌دانن، “ژ به‌ر كو ئه‌ڤ ئاڤاهيێن به‌فره‌هـ و مه‌زن قه‌ره‌بالغه‌كا زێده‌ دروست دكه‌ن”.

ئه‌ڤرۆ نیوز، عه‌لی حاجی:

ئه‌ندامه‌كێ‌ لنژا دیفچوونێ‌ ل زاخۆ د داخویانیه‌كێ‌ دا بۆ ئه‌ڤرۆ نیوز دیار كر ژ ئه‌گه‌رێ‌ نه‌پێگریا دو كارگه‌هێن داگرتنا ئاهێن خوارنێ‌ ب رێنمایێن ساخله‌میێ‌ بۆ ماوه‌یێ‌ حه‌فتیه‌كێ‌ دائێخستن و ب كوژمه‌یه‌كێ‌ پاره‌یی ژی سزا دان و هه‌تا ئه‌و كارگه‌هه‌ رێنمایێن لژنا دیفچوونێ‌ بجه نه‌ئینن ناهێته‌ ڤه‌كرن .

زێده‌تر وه‌لات هه‌جه‌ر گوت: ئه‌ڤرۆ ل روژا ئێك شه‌مبێ‌ پشتی پێزانین گه‌هشتنیه‌ مه‌ ل دور دو كارگه‌هان ل زاخۆ پشتی سه‌ره‌دانه‌كا مه‌ دا بۆ كارگه‌هه‌كێ‌ ، كارگه‌هه‌ك ب ناڤێ‌ لوكس لایك یا داگرتنا توفچایێ‌ و چه‌ره‌زاتان ژبه‌ر كو پێگیر نه‌بوو ب چو مه‌رجێن ساخله‌میێ‌ ئه‌م نه‌چار بوین وێ‌ كارگێ‌ بۆ ماوه‌یێ‌ حه‌فتیه‌كێ‌ دائێخین و هه‌ر دیسان ب كوژمێ‌ 500 هزار دیناران سزا بده‌ین و هه‌ر دیسان كارگه‌هه‌كا دیتر ب ناڤێ‌ ده‌ڤران كو یا تایبه‌ت بوو ب داگرتنا ئاهێن خوارنێ‌ ژبه‌ر نه‌پێگریا وێ‌ ب رێنمایێن ساخله‌میێ‌ هاته‌ دائێخستن بۆ ماوه‌یێ‌ حه‌فت روژان و ب كوژمێ‌ 500 هزار دیناران هاته‌ سزادان و هه‌تا هه‌ردو كارگه‌ه مه‌رجێن پێدڤی جێبه‌جێ‌ نه‌كه‌ت كلیلێن وێ‌ كارگه‌هێ‌ ب خودانێ‌ وێ‌ واهێته‌ دان و مه‌ بۆ وان دیار كری یه‌ ژی هه‌ر ده‌ما ئه‌ڤ كاره‌ دوباره‌ بوو دێ‌ ب توندترین شێوه‌ هێنه‌ سزادان .

ناڤهاتی ئه‌و چه‌نده‌ ژی گوت : دنوكه‌ دا نوونه‌ره‌ك ژ رێڤه‌به‌ریا پولیسێن زاخۆ و ئاسایشا ئیبراهیم خه‌لیل دناڤ لنه‌ژیا مه‌دا هاتینه‌ زێده‌ كرن و دێ‌ ب شێوه‌یه‌كێ‌ به‌رفره‌ه چاڤدێریێ‌ ل هه‌می جهێن بازرگانی كه‌ین و هه‌ر ده‌ما پێزانینه‌ك بگه‌هیته‌ به‌ر ده‌ستێن مه‌ ئێك سه‌ر دێ‌ دووفچونا وان جهان كه‌ین.