ئەڤرۆ نیوز:بارزان مزووری
ئازاد تاها،بەرپرسێ پەیوەندی و راگەهاندنا رێڤەبەریا پولیسێن هاتنوچوونا پارێزگەها دهۆكێ بۆ ئەڤرۆ نیوز گوت: ئه‌ڤرۆ ل ده‌مێ مه‌غره‌ب ل سەر رێکا سەرەکى ياا بەردەرەش بۆ شێخان ل نێزیک پرا حسێنيێ روودانه‌كا لێكدانێ د ناڤبەرا ترۆمبێلەكا شوفرلێت تایبەت ئوپترا و ترومبێلەکا ژ جورێ هوندا ئەلنترا روودا كو د ئەنجام دا کەسەکی گیانێ خوه ژ دەست دا و چار کەسێن دی بریندار بوون.
زاخۆ،عەلی حاجی:
ئه‌ڤرۆ دو شەمبێ ١٤/١٠/٢٠١٩ د ده‌مێ کارکرنێ دا، دو کرێکارێن خەلکێ باژێرێ دهوکێ د ئاڤاهیەکێ (نیو زاخۆ) ل باژێرێ زاخۆ دا دکەڤن و ئێکسەر گیانێ خوە ژدەست دده‌ن.
سەگڤان عەمەر، سەروکێ لژنا زاخۆ يا سەندیکا کرێکارێن کوردستانێ بۆ ئەڤرۆ نيوز دیار کر ئەو روودان ئه‌ڤرۆ ئێڤارى دروست بوو دەما دو کرێکارێن خەلکێ دهوکێ ژ ئەگەرێ بویاغکرنا شوقەیەکا (نیو زاخۆ) ل باژێرێ زاخۆ کو ئیسکەلەیا کاری باش دروست نەکربوو ل قاتێ حەفتێ دا دکەڤن و ئێکسەر گیانێ خوە ژدەست ددەن.دوێ روودانێ چو کەس بریندار نەبوویە تنی دو کرێکاران گیانێ خوە ژدەست دايه كو ئێکسەر هاتنە رەوانەکرن بۆنوشداريا داد ل زاخۆ ل دووف را ژی بو باژێری دهوکێ هاتنە رەوانە کرن”.
زێدەتر گوت : مە لژنەک پێکئینایە بۆ دووفچونا بابەتی بو وێ چەندێ لایەنێ خه‌مسار بهێتە سزادان و مافێ وان کرێکاران ژی بەرزە نەبیت،ئەڤە دووەم روودانا گیان ژدەست دانا کرێکارایە ل نیو زاخۆ روودەت دەما ل سالا ٢٠١٧ ژئەگەرێ ئاڤاهیەکێ ل نیو زاخۆ کرێکارەکێ گیانێ خوە ژدەست دا و پێنچ کرێکار ژی بریندار بوون.
ئه‌ڤرۆ نيوز:
ئه‌ڤرۆ دوشه‌مبى 180 په‌نابه‌رێن رۆژئاڤايێ كوردستانێ، پشتى شه‌ش رۆژان ژ ده‌ستپێكرنا هێرشا له‌شكرێ توركى و رۆژه‌كێ ژى پشتى به‌لاڤكرنا هێزێن رژێما به‌شار ئه‌سه‌د ل رۆژئاڤا، گه‌هشتنه هه‌رێما كوردستانێ.
ناڤه‌ندا هه‌ماهه‌نگيا به‌رهنگاريا قه‌يرانان يا سه‌ر ب وه‌زاره‌تا ناڤخوه يا هه‌رێما كوردستانێ راگه‌هاند كو ئه‌ڤرۆ ئێكه‌م كاروانێ په‌نابه‌رێن سوورى گه‌هشته هه‌رێما كوردستانێ كو هژمارا وان 180 كه‌سن.
ئاماژه كر ژى كو چاڤه‌رێ دهێته كرن هژمارا په‌نابه‌رێن رۆژئاڤا ل حه‌فتيێن داهاتى زێده‌تر ببيت.
هه‌روه‌سا راگه‌هاند كو هاريكاريێن دارايى و پێداويستيێن سه‌ره‌كى گه‌له‌ك د پێدڤى نه بۆ وێ چه‌ندێ بشێن هاريكاريا وان په‌نابه‌ران بكه‌ن.
ئه‌ڤرۆ نيوز:
سه‌رۆكێ توركى ره‌جه‌ب ته‌يب ئه‌ردۆگان، د كۆنگره‌ىكێ رۆژنامه‌ڤانى دا راگه‌هاند، داخوازێ ژ وه‌لاتێن ئه‌ندام د ناتۆى دا دكه‌ين هاريكاريا مه بكه‌ن د هێرشێن مه دا ل سه‌ر سووريێ.
گۆت ژى”ل دووڤ قانوونێن ناتۆى، پێدڤيه ئه‌ندامێن د ناڤ ناتۆى دا پشته‌ڤانيێ ل هێرشێن توركيا ل سه‌ر سووريێ بكه‌ن”.
ل دۆر ڤه‌كێشانا هێزێن ئه‌مريكا ژ رۆژئاڤايێ كوردستانێ، گۆت” ڤه‌كێشانا هێزێن ئه‌مريكى ب كاره‌كێ ئه‌رێنى دبينم”.
دياركر ژى” مه ل گه‌ل ئه‌مريكا ل دۆر مه‌نبجى كێشه نينه وكارێ ل به‌راهيا مه كونترۆلكرنا مه‌نبجێ يه و ناراوه‌ستين هه‌تاكو ئارمانجێن خوه بجهبينين”.
ئه‌ڤرۆ نيوز:
ئه‌ڤرۆ دوشه‌مبى 14/10/2019 كۆنفرانسه‌كێ دو رۆژى ل بن ناڤونيشانێ ( هه‌رێما كوردستانێ و ئه‌مريكا، هه‌ڤپشكى بۆ ئاشتيێ و سه‌قامگيريێ) ل هه‌ولێرێ ده‌ستپێكر.
د وى كۆنفرانسى دا جێگرێ سه‌رۆك وه‌زيرێن هه‌رێما كوردستانێ و وه‌زيرێ باژێرڤانيان و گه‌شتوگوزارێ و به‌رپرسێ په‌يوه‌نديێن ده‌رڤه يێن هه‌رێمێ و هه‌روه‌سا وه‌زيرێ دارايى يێ عيراقێ و هژماره‌كا دى ژ وه‌زير و به‌رپرسێن حكومى باليۆزێ ئه‌مريكى ل عيراقێ و سورۆكێ ژۆرێن بازرگانى ل هه‌رێما كوردستانێ پشكدار بوون.
فوئاد حسێن، وه‌زيرێ دارايێ عيراقێ د وى كۆنفرانسى دا گۆتاره‌ك پێشكێشكر و راگه‌هاند” ئابوورێ هه‌رێما كوردستانێ پێدڤى ب حوكمه‌تا ناڤه‌ندى يه، وه‌كو چاوان حوكمه‌تا ناڤه‌ندى ژى پێدڤى ب حوكمه‌تا هه‌رێمێ يه، ئه‌و چه‌نده ژى پێدڤى ب رێككه‌فتنه‌كێ هه‌يه د ناڤبه‌را هه‌ردو لايه‌نان دا”.
گۆت ژى” نوكه ئه‌و نيه‌ت و ئارمانجه ل حوكمه‌تا عيراقێ هه‌بوونا خوه يا هه‌ى و پێدڤيه رێيه‌كێ ببينين كا چاوان بگه‌هينه رێككه‌فتنێ و ئه‌و رێككه‌فتن ژى تنێ ل سه‌ر بودجه‌ى و مووچه‌ى نه‌بيت، به‌لكو ل سه‌ر هه‌موو كێشان بيت”.
وه‌زيرێ دارايێ عيراقێ به‌حسێ بودجا گشتى يا عيراقێ بۆ سالا 2020 كر و گۆت” ژ ئه‌گه‌رێ وان بريارێن ژ حوكمه‌ت و جڤاتا نوونه‌رێن عيراقێ هاتينه ده‌ركرن بۆ ڤه‌گه‌راندن و دامه‌زراندنا 200 هزار كه‌سان دناڤ ده‌زگه‌هێن ئه‌منى و له‌شكرى دا، كو ئه‌و چه‌نده ژى دێ بارگرانيه‌كا مه‌زن ئێخيته سه‌ر بودجه‌ى و زێده‌تر ژ 44 ترليۆن ديناران ژ بودجا سالا داهاتى دێ بۆ مووچه‌ى چيت، له‌وما ئارمانجا حوكمه‌تێ ڤه‌ژاندنا كه‌رتێ چاندنێ و گه‌شتيارى يه”.
ئه‌ڤرۆ نيوز:
به‌رپرسێ نوونه‌راتيا حوكمه‌تا هه‌رێما كوردستانێ ل به‌غدا فارس عيسا راگه‌هاند ئه‌ڤرۆ يان سوباهى سێشه‌مبى دێ بودجا خه‌ملاندى يا هه‌رێمێ بۆ سالا 2020 هێته راده‌ستكرن بۆ حوكمه‌تا عيراقێ.
ناڤبرى زێده‌تر بۆ رووداو گۆت” چه‌ند رۆژه بودجا خه‌ملاندى گه‌هشتيه ده‌ستێ مه، ئه‌م ژى ئه‌ڤرۆ يان سوباهى سێشه‌مبى دێ راده‌ستى حوكمه‌تا عيراقێ كه‌ين، د بودجا خه‌ملاندى دا هه‌موو هوورده‌كاريێن مه‌زاختى و داهاتێن جۆرا و جۆر تێدانه”.
به‌رپرسێ نوونه‌راتيا حوكمه‌تا هه‌رێما كوردستانێ ل به‌غدا گۆت ژى” پێشتر به‌رپرسێن به‌غدا به‌حس ل وێ چه‌ندێ دكر كو ژ بلى داهاتێ په‌ترۆلێ، داهاتێن دى يێن هه‌رێما كوردستانێ د رۆهن نينن، به‌لێ د ڤێ بودجا خه‌ملاندى دا هوورده‌كاريێن هه‌موو داهاتان تێدايه”.
راگه‌هاند ژى كو ره‌وانه‌كرنا وێ بودجا خه‌ملاندى دێ ئاسانكارى بيت بۆ شاندێ هه‌رێما كوردستانێ كو بۆ دانوستاندنێن په‌ترۆلێ و بودجه‌ى دێ سه‌ره‌دانا به‌غدا كه‌ت.
ئه‌ڤرۆ نیوز:
ل ڤان سالێن دووماهیێ دا چه‌ندین نمرێن مه‌زن هاتنه توماركرن بوو ڤه‌گوهاستنا یاریزانان ژ یانه‌كێ بوو یانه‌كا دى و ل هێلا به‌ره‌ڤانیێ دا ژى هژماره‌كا یاریزانان شیاینه نمره‌كا مه‌زن توماربكه‌ن دڤێ راپورتێ دا بوو ئه‌وه 11 گرانترین به‌ره‌ڤان ل سه‌ر ئاستێ جیهانێ ده‌ینه نیاسین كو دناڤا ئه‌وان دا 4 یاریزانێن ئنگلیزى نه ل گه‌ل سێ ژ فره‌نسا و دو ژ به‌رازیل و دو ژ هوله‌ندا.
11 گرانترین یاریزان ل هێلا به‌ره‌ڤانیێ د مێژویا ته‌پا پێ دا.
ماگوایر یێ ئنگلیزى ژ ئیڤه‌رتون ⬅ مان یونایتد (87 ملیون €)
دی لیگت یێ هوله‌ندى ژ ئه‌جاكس ئه‌مستردام ⬅ یوفنتوس (85.5 ملیون €)
لوكاس هیرناندیز یێ فره‌نسى ژ ئه‌تله‌تیكو مه‌درید ⬅ بایرن میونیخ (85 ملیون €)
فان دایك یێ هوله‌ندى ژ ساوتهامتون ⬅ لیڤه‌رپول (85 ملیون €)
جون ستونز یێ ئنگلیزى ژ ئیڤه‌رتون ⬅ مان سیتى (66 ملیون €)
ئیمریك لاپورت یێ فره‌نسى ژ ئه‌تله‌تیكو بلباو ⬅ مان سیتى (65 ملیون €)
بێنجامین میندى یێ فره‌نسى ژ موناكو ⬅ مان سیتى (58 ملیون €)
ئارون وان بیساكا یێ ئنگلیزى ژ كریستال پالاس ⬅ مان یونایتد(55 ملیون €)
كایل ووكر یێ ئنگلیزى ژ توتنهام ⬅ مان سیتى (53 ملیون €)
میلیتاو یێ به‌رازیلى ژ پورتو ⬅ ریال مدرید (50 ملیون €)
دڤید لویز یێ به‌رازیلى ژ پاریس سانجێرمان ⬅ چێلسى (49.5 ملیون €)
ئەڤرۆ نیوز:
لیندسی گراهام سیناتورێ کۆماریخوازان ل ئەمریکا راگەهاند کا چاوا وان شیان ب سزایێن گران دربێن مەزن ل ئیرانێ بدەن دێ وەسا ژی دەست ب سزادانا تورکیا کەن و گۆت: (رێ نادەین تورکیا هەڤپەیمانێن مە یێن سەرەکی ل سووریێ بکەتە ئارمانجا هێرشێن خوە و ل هەمبەر تورکیا بێدەنگ نابین و دێ سزایێن گرانتر ژ یێن ئیرانێ ل سەر تورکیا سەپینین).
نيشاندان