ئەڤرۆ نیوز:
ل گۆر ئامارا ٢٤ دەمژمێرێن بۆری یا وەزارەتا ساخلەمیا هەرێما کوردستانێ ٩٥٥ کەسێن دی ل هەرێما کوردستانێ تووشی ڤایرۆسێ کۆرۆنایێ بووینە و هەروەسا ١٩ تووشبوو ژی مرینە، هەروەسا ٣٧٤ نەخوش ژی ب تەمامی باش بووینە.
ل پارێزگەها دهۆکێ ژی ٣٧٠ کەسێن دی تووشی ڤایرۆسێ کۆرۆنایێ بووینە و ٩ تووشبوو ژی مرینە.
ئەڤرۆ نیوز:
ئەڤرۆ ل بازارێن ئیرانێ بهایێ هەر دۆلارەکێ گەهشتە ٢٨ هزار تومەنێ ئیرانی و وەلاتی ژی بێزاربوونا خوە ل هەمبەر سیاسەتا ئیرانێ دیار دکەن.
بسپۆرێن ئابووری ژی دیار دکەن کو گرانبوونا دۆلاری کاریگەریا خوە ل سەر ژیانا وەلاتیان کریە چونکو بهایێ گەلەک پێدڤیاتێن سەرەکی یێن ژیانێ ژی ل ئیرانێ گران بووینە و نها ٣٥% ژ ئاکنجیێن ئیرانێ نەشێن گوشتێ سور بکڕن.
ئەڤرۆ نیوز:
سەما بەکداش پەیڤدارا پەیەدێ راگەهاند کو جێمز جێفری د هەڤدیتنا ل گەل ئالیێن کوردی یێن رۆژئاڤایێ کوردستانێ دیار کریە هەکە تورکیا هێرشی رۆژئاڤا بکەت دێ ئەمریکا ب توندی تورکیا سزا دەت و ناهێلیت تورکیا دەڤەرێن دی یێن رۆژئاڤایێ کوردستانێ دیار بکەت.
ژ ئالیێ خوە ڤە سلێمان ئۆسۆ ئەندامێ شاندێ دانوستاندنان یێ ئەنەکەسێ ل گەل تەڤدەمێ ژی راگەهاند وان دلگرانیا خوە ل هەمبەر هێرشێن تورکیا دیار کرینە و نوونەرێ ئەمریکا ژی ئەو پشتراست کرینە کو ناهێلن تورکیا هێرش بکەت و جێفری داخواز ژ هەر دو جڤاتێن کوردی کریە کو د زووترین دەم دا رێککەفتنا خوە راگەهینن.
ئه‌ڤرۆ نیوز:
بریارده‌رێ لژنا دارایی ل جڤاتا نوونه‌رێن عیراقێ راگه‌هاند حوكمه‌تا عیراقێ پرۆژه‌یێ یاسایا بودجا 2020 ره‌وانه‌ی جڤاتێ كر.
ئه‌حمه‌د سه‌فار بریارده‌رێ لژنا دارایی ل جڤاتا نوونه‌رین عیراقێ راگه‌هاند پشتی ره‌وانه‌كرنا بودجا 2020 ژلایێ حوكمه‌تا عیراقێ بۆ جڤاتا نوونه‌ران ل رۆژا 21 ئه‌ڤێ هه‌یڤێ، نوكه ئه‌و پرۆژه یاسایه ژلایێ حوكمه‌تا عیراقێ ڤه هاتیه ڤه‌كێشان بۆ ئه‌وێ چه‌ندێ ژماره‌یه‌كا گوهورینان تێدا بكه‌ن.
بریارده‌رێ لژنا دارایی ئه‌و چه‌نده ژی راگه‌هاند ڤه‌كێشانا پرۆژه یاسایا بودجێ بۆ ئه‌وێ چه‌ندێ یه كۆ هنده‌ك گوهورین د پشكا پارێزگه‌هان دا بهێته‌كرن، چ په‌یوه‌ندی ب پشكا هه‌رێما كوردستانێ ڤه نینه، چونكو پشكا هه‌رێما كوردستانی هاتیه جیگیركرن ل سه‌ر بنه‌مایێ ئه‌وێ رێكه‌تنا دناڤبه‌را حكومه‌تا به‌غدا و هه‌ولێرێ.
ناڤبری ئه‌و چه‌نده ژی دازانین پشتی گه‌هشتنا پرۆژه‌یێ یاسایێ، دێ هێته ره‌وانه‌كرن بۆ لژنا دارایی و پاشی خواندنا ئێكێ بۆ دهێته‌كرن و پاشی خواندنا دوێ پاشی لژنا دارایی كاركرن ل سه‌ر ته‌مام دبیت، پاشی رینشتنا تایبه‌ت بۆ په‌سندكرنا پرۆژه‌ی دهێته‌كرن، دهێته چاڤه‌رێكرن ل ده‌ستپێكا هه‌یڤا 10 تا نیڤا 10 پرۆژه ته‌مام بیت.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا کەسەک بریندار بوو.
ناڤهاتی زێدەتر گۆت: ل دەمژمێر (2:00) شەڤا بوری، ل سەر جادا سەرەکی یا دهۆک بۆ زاخۆ، ل نێزیکی تۆنێلا گەلیێ زاخۆ ترۆمبێلەکا تایبەت BMW یا رەنگ رەش ژ ئەگەرێ ب لەز هاژۆتنێ ترۆمبێل ل ژێر کوتنرۆلا شۆفێری دەرکەفتیە و خوە ل پەرژانێ جادێ دایە، د د ئەنجامدا کەسەک بریندار بوو، هەروەسا زیانێن مادی یێن مەزن ژی ب وێ ترۆمبێلێ کەفتینە.
ئه‌ڤرۆ نیوز:
حوكمه‌تا سعودیێ ته‌ئكید ل سه‌ر بكار ئینان و بجهكرنا رێكارێن خوه پارێزیێ كر، بریار دا رۆژا 4 تشرینا ئێكێ رێ و ره‌سمێن عه‌مرێ ده‌ست پێ بكه‌ن.
وه‌زاره‌تا ناڤخویا سعودیێ د راگه‌هاندنه‌كێ دا دیاركریه، بریار دایه قوناغ ب قوناغ رێك ب ئاسایكرنا رێ و ره‌سمێن عه‌مرێ بهێته‌دان و دێ ل رۆژا 4/10/2020 ده‌ست پێ كه‌ت، دپێخه‌مه‌تا پاراستنا ساخله‌میا گشتی و لبه‌رچاڤگرتنا مه‌ترسیێن ڤایرۆسێ كورونایێ، ئه‌و رێ و ره‌سم دێ ده‌ست پێ كه‌ن، قوناغا ئێكێ بتنێ رێك ب وه‌لاتیێن ناڤخویا سعودیێ دهێته‌دان پشكداریێ ل رێ و ره‌سمێن عه‌مرێ دا بكه‌ن، قوناغا دوێ رێك ب موسلمانێن وه‌لاتان ژی بهێته‌دان بۆ ئه‌وێ مه‌به‌ستێ سه‌ره‌دانا سعودیێ بكه‌ن.
ئه‌ڤرۆ نیوز:
ده‌سته‌یا نه‌زاهه‌یا عیراقێ دیاركر ل ده‌مێ سێ هه‌یڤێن بوری 97 ئوپراسیونێن ده‌سته‌سه‌ركرنێ ئه‌نجامداینه و زێده‌تری 85 تومه‌تبار ژی ب تاوانا گه‌نده‌لیێ و ب هه‌ده‌ردانا مالێ گشتی هاتینه گرتن.
رێڤه‌به‌راتیا ڤه‌كۆلینا ده‌سته‌یا نه‌زاهه‌یا عیراقێ د به‌یاننامه‌یه‌كێ دا راگه‌هاند ل ده‌مێ سێ هه‌یڤێن بوری بتنێ ل رێڤه‌به‌راتیا ڤه‌كۆلینێن به‌سرا 20 ئوپراسیون ئه‌نجامداینه و تێدا 110 مامه‌له‌یێن به‌لێنده‌راتیێ ده‌ست ب سه‌ردا هاتینه گرتن كۆ بهایێ وان پێنج ملیار دینارن.
ده‌سته‌یا نه‌زاهێ ئه‌و چه‌نده ژی دیاركریه كۆ 147 مامه‌له‌یێن خانه‌نشین بوونێن ساخته دا هاتیه‌گرتن و تایبه‌ت ل كه‌یسێن قوربانیێن تیرۆرێ كۆ بهایێ وێ گه‌هشتیه 10 ملیار دیناران و چه‌ندین مامه‌له‌یێن دانا قه‌ران ل نه‌جه‌ف هاتینه‌گرتن، كۆ دبنه 7 ملیار دینار و چه‌ندین جورێن قه‌رێن دی ژی كۆ دبنه 5 ملیار دینار.
ده‌سته‌یا نه‌زاهه‌یا عیراقی ئه‌و چه‌نده ژی دا زانین كۆ چه‌ندین كه‌یسێن گۆمانی و گه‌نده‌لێ هه‌یه ل نه‌خوشخانه‌یێن تایبه‌ت ب پشكنینا كورونایێ ب بهایێ 400 هزار ملیۆن دیناران.
ئه‌ڤرۆ نیوز:
رێڤه‌به‌رێ رێكخراوا ساخله‌میا جیهانی راگه‌هاند نێزیكی 200 جورێن ڤاكسینێن كورونایێ د قوناغا تاقیكرنێ دانه.
رێڤه‌به‌رێ ساخله‌میا جیهانی راگه‌هاند ته‌ڤایا تاقیكرنان دێ ب دوماهی ئێن، گرنتیا سه‌ركه‌فتنێ ژ چ ڤاكسینان ناكه‌ین.
سه‌رۆكێ تیما ئه‌مریكا بۆ پێشڤه‌برنا ڤاكسینێ كورونایێ راگه‌هاند به‌ری دوماهیا سالێ ل ئه‌مریكا ڤاكسینێ كورونایێ دێ ل به‌رده‌ست بیت.
ئه‌ڤرۆ نیوز:
سندۆقا دراڤ یا نێڤ ده‌وله‌تی پیرۆزباهیێ ل پارێزگارێ نوو یێ به‌نكا ناڤه‌ندا عیراقێ دكه‌ت به‌رهه‌ڤیا خوه ژی بۆ هه‌ڤكاریكرنا عیراقێ ده‌ربری.
به‌نكا ناڤه‌ندا عیراقێ د به‌یاننامه‌یه‌كێ دا راگه‌هاند مسته‌فا غالب پارێزگارێ به‌نكا ناڤه‌ندی ب شێوه‌یه‌كێ كونفرانس ڤیدیویی، ل گه‌ل سندۆقا دراڤ یا نێڤ ده‌وله‌تی كۆمبوو.
د ئه‌وێ كۆمبوونێ دا، لگۆری به‌یاننامه‌یا به‌نكا ناڤه‌ندا عیراقێ هاتیه، دانوستاندن ل سه‌ر ره‌وشا ئابووری و دارایی یا عیراقێ هاته‌كرن.
به‌نكا ناڤه‌ندا عیراقێ راگه‌هاند سندۆقا دراڤ یا نێڤ ده‌وله‌تی به‌رهه‌ڤیا خوه بۆ هه‌ڤكاریكرنا عیراقێ ب رێكا پێشكێشكرنا راوێژكاریا هونه‌ری هه‌ماهه‌نگی و سیاسه‌تا دارایی و دراڤی و پلانانا رێكخستنا دارایی نیشاندایه.
ب بریارا مسته‌فا كازمی سه‌رۆك وه‌زیرێ عیراقێ، گوهورین ل ژماره‌یه‌كا به‌رپرسێن بلندێن عیراقێ هاته‌كرن، كۆ ئێك ژ ئه‌وان گوهورینان دانانا مسته‌فا غالب ب پارێزگارێ نوو یێ به‌نكا نێڤ ده‌وله‌تی ل عیراقێ بوو.
نيشاندان