ئه‌ڤرۆ نیوز:
ل دووڤ نڤیساره‌كا فه‌رمانگه‌ها كارگێرى و دارایى ل سه‌رۆكاتیا جڤاتا وه‌زیران كو ل 21/8/2019 ده‌رچووى، ئاماژه ب وێ چه‌ندێ هاتیه كرن كو ب مه‌ره‌ما ئه‌نجامدانا كاران و رێگریكرن ل شاشى و خه‌مساریێ بۆ مه‌ره‌ما هژمارتنا هه‌موو جۆرێن خزمه‌تێ، چه‌ند بریاره‌ك هاتینه ده‌ركرن.
بۆ هژمارتنا خزمه‌تا فه‌رمانبه‌رى، جڤاتا وه‌زیران بریار دایه كو دڤێت پۆختا راژه‌یێ په‌سه‌ندكرى و دروست و فه‌رمانا دامه‌زراندنێ یا فه‌رمانبه‌رى ل گه‌ل هه‌موو به‌راهیێن ره‌سه‌ن بۆ جڤاتا وه‌زیران بهێته هنارتن.
سه‌باره‌ت هژمارتنا خزمه‌تا ده‌مێ فه‌رمانبه‌رێ گرێبه‌ست، ب پێدڤى دانانا وێنێ ره‌سه‌نێ پۆختا راژه‌یا په‌سه‌ندكرى و گرێبه‌ست و فه‌رمانا رازیبوونا وه‌زاره‌تا دارایى د لیستا هه‌ڤپێچكرى دا هه‌بیت، كو بۆ جڤاتا وه‌زیران دهێته هنارتن.
دووپاتى ژى هاتیه كرن، بۆ هژمارتنا خزمه‌تا كه‌رتێ تایبه‌تێ ئه‌ندازیارى، پێدڤیه وێنێ ره‌سه‌نێ پۆختا راژه‌یێ په‌سه‌ندكرى وپشتگیریا جڤاتا سه‌ندیكایێ و پپشتگیریا كۆمپانیان و هه‌موو به‌راهیێن وان پرۆژێن كار ل سه‌ر كرى، بهێنه هنارتن.
سه‌باره‌ت هژمارتنا خزمه‌تا پارێزه‌ریێ، تێدا هاتیه” دڤێت وێنێ ره‌سه‌نێ پۆختا راژه‌یێ په‌سه‌ندكرى و پشتگیریا سه‌ندیكا پارێزه‌ران وهه‌موو به‌راهیێن تایبه‌ت ب وان داوایێن دادوه‌رى یێن كار ل سه‌ر كرى، بهێنه هنارتن”.
بۆ هژمارتنا خزمه‌تا رۆژنامه‌ڤانى ژى تاكو بچیته سه‌ر خزمه‌تا فه‌رمانبه‌ریێ، دڤێت وێنێ ره‌سه‌نێ پۆختا راژه‌یا په‌سه‌ندكرى و پشتگیریا سه‌ندیكا رۆژنامه‌ڤانان و ئه‌و ده‌زگه‌هێ كارێ رۆژنامه‌ڤانى لێ كرى، بهێته هنارتن”.
ل دۆر هژمارتنا خزمه‌تا كه‌رتێ تایبه‌ت، دووپات هاتیه كرن ب وى مه‌رجى دێ هێته دروستكرن كو وێنێ ره‌سه‌نێ به‌لگه‌ناما پێدڤى بۆ پشتگیریا تایبه‌ت ب وه‌رگرتنا پارێ ده‌سته‌به‌رێ جڤاكى بۆ جڤاتا وه‌زیران بهێته هنارتن.
سه‌باره‌ت هژمارتنا خزمه‌تا ئاواره‌یێا ئیرانێ، پێدڤیه ب رێیا وه‌زاره‌تا ناڤخوه، رێڤه‌به‌ریا كۆچ و كۆچبه‌ران، نڤیسارێن تایبه‌ت ب وى بابه‌تى ڤه بهێنه ئاراسته‌كرن.
هه‌روه‌سا بۆ هژمارتنا خزمه‌تا پێشمه‌رگایه‌تیێ، هاتیه كو پێدڤیه ژ وه‌زاره‌تا پێشمه‌رگه بهێته هنارتن ب وى مه‌رجى به‌راهیێن ره‌سه‌ن ژى د گه‌لدا بن.
سه‌باره‌ت وان فه‌رمانبه‌رێن پێشتر دۆسێیێن وان نه‌ماین، هاتیه كو ده‌مێ نڤیسار ئاراسته‌ى سه‌رۆكاتیا جڤاتا وه‌زیران دهێته كرن، پێدڤیه وێنێ ره‌سه‌نێ فۆرمێن ژناڤچووى و به‌لگه‌نامه و پێزانینێن تمام بهێنه هنارتن.
ڤه‌گوهاستنا وان راژه‌یان بۆ سه‌ر خزمه‌تا فه‌رمانبه‌رى، بۆ گوهۆرینا ناڤه‌نیشانى و زێده‌كرنا مووچه‌یه، هه‌روه‌سا بۆ خانه‌نشینیێ ژى مفا ژێ دهێته وه‌رگرتن.
نيشاندان
