ئەڤرۆ نیوز:
ئەڤرۆ عەبدولرەحمان مستەفا پارێزگارێ بەرێ یێ کەرکووکێ وەکو سەرۆکێ لیستا هەڤپەیمانیا کوردستانی بۆ هەلبژارتنێن جڤاتا پارێزگەهێن عیراقێ هاتە هەلبژارتن.
سەرۆکێ لیستا هەڤپەیمانیا کوردستانی راگەهاند کو ئێکەتیا هەموو هێز و ئالیێن سیاسی یێن کوردستانی دێ سەرکەفتنا مە گەرەنتی کەت و هێڤی خواست هەلویستێ نها یێ هەموو ئالیێن کوردستانی بۆ دەڤەرێن کوردستانی یێن دەرڤەی ئیدارا هەرێما کوردستانێ بەردەوام بیت.
ئه‌ڤرۆ نیوز، مه‌حمود نهێلی:
رێكخراوه‌كا ئیتالى دێ هوله‌كا نشته‌گه‌ریان ل سه‌ر بنه‌مایێن زانستى یێن مودێرن و نوو و پێشكه‌فتى ل ئامێدیێ ڤه‌كه‌ت و پارێ پێدڤى ژى بۆ ته‌رخانكریه. ئیسماعیل موسته‌فا ره‌شید قایمقامێ قه‌زا ئامێدیێ بۆ ئه‌ڤرۆ نیوز دیاركر، كو وان پێشوازى ل شانده‌كى ساخله‌میا پارێزگه‌ها دهوكێ كری، كو پێكهات بوون ژ رێڤه‌به‌رێ گشتى یێ ساخله‌میا پارێزگه‌ها دهوكێ و شاندنه‌كى ئێكه‌تیا ئه‌ورپا و رێكخراوا ( AISPO) یا ئیتالى .
ناڤهاتى دیاركر، كو مه‌ره‌ما سه‌ره‌دانا ڤێ شاندنێ دیاركرنا رازیبوونا خوه بوویه ل سه‌ر چێكرنا هوله‌كا پێشكه‌فتى و مودێرن یا نه‌شته‌گه‌ریان ل نه‌خوشخانا ئامێدیێ و گۆت: ( ژبلى كو ئه‌ڤ هولا نه‌شته‌رگه‌ریان دێ ژلایێ ڤێ رێكخراوێ ڤه هێته چێكرن هه‌موو ئامیره و كه‌ره‌سته‌یێن پێدڤى یێن ڤێ هولێ دێ ژلایێ هه‌مان رێكخراوا ڤه هێنه دابینكرن.
دیاركر، كو ل دووڤ پێشبینى و گۆتنێن كارمه‌ندێن ڤێ رێكخراوێ چێدبیت ل ده‌سپێكا سالا بهێت ده‌ست ب چێكرنا ڤێ هولێ بهێته كرن و گۆت: (ئه‌ڤ كارێ ئێكه‌تیا ئه‌ورپا و رێكخراوێن بیانى پێنگاڤه‌كا باشه د بوارێ ساخله‌میێ دا ل ده‌ڤه‌رێ هاڤێژتى و هیڤیا به‌ردوامیا خوه‌ست كو ئه‌ڤ رێكخراوه ل ده‌ڤه‌رێ كارێن باشتر و پرۆژێن گرنگ ئه‌نجام بده‌ن.
ئه‌ڤرۆ نيوز:
ب مه‌ره‌ما ره‌تكرنا قانوونا ژماره 14 يا سالا 2019ێ يا قانوونا راستڤه‌كرى يا ئێكێ يا قانوونا هه‌لبژارتنێن جڤاتێن پارێزگه‌هان ل وان پارێزگه‌هـ و قه‌زايێن ناڤ هه‌رێمێ دا هاتينه رێكخستن، وه‌زيرێ داد ل هه‌رێما كوردستانێ سكالايه‌ك ل دژى محه‌مه‌د حه‌لبۆسى سه‌رۆكێ په‌رله‌مانێ عيراقێ تۆماركر.
فه‌رسه‌ت ئه‌حمه‌د، وه‌زيرێ داد يێ هه‌رێما كوردستانێ سكالايه‌ك ل رۆژا 24ى ئيلۆنا 2019ێ د رێيا بريكارێ خوه يێ قانوونى دا ره‌وانه‌ى دادگه‌ها بلندا فيدرال ل به‌غدا كريه.
د سكالايێ دا وه‌زيرێ داد ئاماژه ب وێ چه‌ندێ كريه كو ئه‌و راستڤه‌كرن يا به‌تاله، چونكو سه‌رۆكێ جڤاتا نوونه‌رێن عيراقێ قانوونا ژماره (14) يا سالا 2019ێ دانايه كو ماددێ وێ قانوونێ دژى ئێكن ل گه‌ل حوكمێن دستوورى و بنه‌مايێن هه‌لبژارتنێن گشتى و بنه‌مايێن ديموكراتى و ئه‌و مافێن بنجينه‌يى يێن د دستوورى دا هاتينه ناگۆنجن، ئه‌ڤه ژى دبيته ئه‌گه‌ر كو قانوونا راستڤه‌كرى يا ژماره (14) يا سالا 2019ێ به‌تال ببيت و ره‌تكرن ببيته كاره‌كێ پێدڤى ب گۆره‌يى حوكمێن ماددێ 12ێ يێ دستوورى.
د به‌ر رووناهيا وى ماددێ دستوورى دا، وه‌زيرێ داد يێ هه‌رێما كوردستانێ د هه‌شت خالان دا به‌لگه‌يێن قانوونى بۆ دستوورينه‌بوون و قانوونينه‌بوونا وێ قانوونا راستڤه‌كرى خستينه به‌رچاڤ.
ئه‌ڤرۆ نیوز:
هێرشبه‌رێ گابونى و یانا ئه‌رسینال پییر ئایمریك ئوبامیانگ ب توماركرنا گوله‌كێ ل یاریا دوهى ل سه‌ر یانا مانچێسته‌ر یوناید شیا نمرا پیڤاى یا ستێرا به‌رێ یا هوله‌ندى و یانا ئه‌رسینال بیركامپ دوباره بكه‌ت.
مالپه‌رێ ئوپتا یێ تایبه‌ت ب ئامارێن وه‌رزشى ڤه دیاركر ئوبامیانگ بوو یاریزانێ دوێ د مێژویا یانا ئه‌رسینال دا بشێت ل حه‌فت یاریێن ده‌ستپێكێ ژ خۆلا ئنگلته‌را حه‌فت گولا توماربكه‌ت كو به‌رى نوكه ستێرا هوله‌ندى دینیس بیركامپ ل وه‌رزێ 1997-1998 ل گه‌ل وێ یانێ شیابوو حه‌فت گولان توماربكه‌ت ل حه‌فت یاریێن ده‌ستپێكێ.
ئه‌ڤرۆ نیوز، عه‌لی حاجی:
د داخویانیه‌كێ دا رێڤه‌به‌رێ ئه‌وقافا زاخۆ بۆ ئه‌ڤرۆ نیوز دیار كر ژبه‌ر شه‌رێ به‌رده‌وامێ هێزێن په‌كه‌كێ و توركیا زیانه‌كا مه‌زن به‌ر ب مزگه‌ڤتێن سه‌ر ب رێڤه‌به‌ریا مه كه‌ڤتینه و هه‌ژماره‌كا وان ژی هاتینه چول كرن .
زێده‌تر مه‌لا سه‌عید عه‌بدولره‌حمان گۆت: ل سنورێ رێڤه‌به‌ریا مه هه‌ر ژ ناحیا كانی ماسێ هه‌تا باژێرێ زاخۆ ژئه‌گه‌رێ شه‌رێ به‌رده‌وامێ د ناڤبه‌را سوپایێ توركیا و هێزێن په‌كه‌كێ دا 30 مزگه‌فتێن سه‌ر ب رێڤه‌به‌ریا مه ڤه هاتینه چول كرن و هیچ كه‌سه‌ك نه‌شێت نڤێژێن خوه تێدا ئه‌نجام بده‌ت،ل سنورێ ده‌ڤه‌را زاخۆ 202 مزگه‌ڤت هه‌نه كو ژ وان مزگه‌ڤتان ژی بتنێ ل 120 مزگه‌ڤتان گوتار ل روژانێن ئه‌ینیێ دا تێدا دهێنه خواندن و پشكا مایی ژمزگه‌ڤتان ل روژانێن ئه‌ینیێ گوتار تێدا ناهێنه خواندن ژبه‌ر كێمیا میلاكێ رێڤه‌به‌ریا مه وسه‌رجه‌مێ گشتیێ فه‌رمانبه‌ر و گوتار خوین و پێش نڤێژ و پاقژكه‌ر و بانگده‌ران بتنێ 227 كه‌سن و ئه‌ڤه ژی رێژه‌یه‌كا كێمه ل سنورێ رێڤه‌به‌ریا مه .
گۆتژی: ب تنێ 27 پێش نڤێژ و گوتارخوین ب شێوێ دامه‌زراندی ل ده‌ڤ مه هه‌نه و هه‌ر دیسان 93 كه‌سێن دیتر گوتاران پێشكێش دكه نكو پرانیا وان خوه به‌خش و یان ژی هنده‌ك ژ وان به‌رامبه‌ر 50 هزار دیناران ل روژانێن ئه‌ینیان دا گوتاران پێشكێش دكه‌ن ،هه‌كه میلاكه‌كێ پێدڤی ل به‌ر ده‌ست هه‌بایه دا ل مزگه‌ڤتێن مایی ژی گوتار تێدا هێنه خواندن .
ئه‌ڤرۆ نیۆز، ئه‌میر ئه‌ترووشی
به‌رپرسێ پشكا ره‌وشه‌نبیری ل بنگه‌هێ لالش ل دهۆكێ راگه‌هاند، مه دووڤچوون ل سه‌ر كێشا كێمیا پرتووكێن بابه‌تێ ئێزدیاتیێ كر و بریار هاته دان پرتووكێن ئێزدیاتیێ بۆ سالا نوو یا خووندنێ (2019_2020)ێ بهێنه چاپكرن.
شه‌مۆ قاسم، به‌رپرسێ پشكا ره‌وشه‌نبیری ل بنگه‌هێ لالش ل دهۆكێ بۆ ئه‌ڤرۆ نیۆز دیاركر: “د پلانا وه‌زاره‌تا په‌روه‌ردا حكومه‌تا هه‌رێما كوردستانێ دا نه‌بوویه پرتووكێن ئێزدیاتیێ بهێته چاپكرن، ئه‌م ناچار بووین هانا خۆ بگه‌هیننه به‌رێز “شێخ شامۆ” راوێژكارێ سه‌رۆكێ حكومه‌تا هه‌رێمێ بۆ كاروبارێن ئێزدیان و سه‌رۆكێ بنگه‌هێ لالش و پشتی بابه‌ت گه‌هشتیه به‌رده‌ستێ وی په‌یوه‌ندی ب وه‌زاره‌تا په‌روه‌ردێ كر و رازه‌مه‌ندی وه‌رگرت كو چ پێویسته بهێته كرن و ئیسال كێشا كێمیا پرتووكێن بابه‌تێ ئێزدیاتیێ ل قۆناغێن خواندنێ بهێته چاره‌كرن و ئیعاز هاته دان بۆ چاپكرنێ”.
شه‌مۆ دیار كر ژی “ل بنگه‌هێ لالش ل دهۆكێ كۆمبوونه‌ك ژ بۆ چاره‌كرنا كێشا نه‌بوونا پرتووكێن بابه‌تێ پرۆگرامێ ئێزدیاتیێ بۆ هه‌موو قۆناغێن خواندنێ دگه‌ل سه‌رپه‌رشتێن ئێزدیاتیێ ل قۆناغا ئاماده‌یی و بنه‌ره‌ت ل په‌روه‌ردێن سێمێل و شێخان و شنگال و تلكێفێ هاته ئه‌نجام دان”.
ئەڤرۆ نیوز،بارزان مزووی:
د رێورەسمەکێ دا ئەڤرۆ 30/9/2019 ل ژێر چاڤدێریا”سردار یحیی عبدالعزیز”قایمقامێ قەزا شێخان بنگەهەکێ ساخلەمیێ ل کەمپا گەرماڤان یا ئاواران ل قەزا شێخان هات ڤەکرن.
سردار شێخ یحیی،قائیمقامێ قەزا شێخان بۆ ئەڤرۆ نیوز گوت:ڤەکرنا ڤی بنگەهی دێ خزمەتا باش د وارێ ساخلەمیێ دا گەهینتە ئاوارێن دناڤ کەمپێ دا ژبەرکۆ هەموو چارەسەریێن دەستپێکێ دناڤ ڤی بنگەهی دا دهێنە کرن بۆ نەخوشیێن ئاوارە، ئەو ئاوارێن بەری نها بۆ چارەسەریا نەخوشیا خۆ چونە دەرڤەی کەمپێ دنها دا دێ چارەسەریا وان دناڤ کەمپێ دا هێت کرن هەر وەختەکێ چارەسەریا نەخۆشی نەهات کرن ب رێکا ڤی بنگەهی هێت ڤەگوهاستن بۆ نەخۆشخانێن شێخان و دهوک،
ناڤهاتی خویاکر ئەڤ بنگەهە ژلایێ کەرتێ ساخلەمیا شێخان ب هەفکاری دگەل رێکخراوە SEMA ڤە هاتیە جێ بەجێ کرن دگەل ستافەکێ چالاک یێن کارمەندێن ساخلەمیێ، ناڤهاتی گوت ساخلەمیا پارێزگەها دهوک دەورەکێ بالا هەبویە بەرامبەری ئاوارێن هاتینەهەرێما کوردستانێ تایبەت یێن قەزا شێخان
ئەڤرۆ نیۆز، هەرهین محەمەد:
رێڤەبەریا هونەرێ مۆزیكێ ل رێڤەبەریا گشتی یا رەوشەنبیری و هونەری ل دهۆكێ سوباهی سێ شەمبی ل رێكەفتی 1/10/2019 ل مالان دانعەمران دێ رۆژا جیهانی یا مۆزیكێ ب مۆزیكێ دێ هێتە ساخكرن، هه‌روه‌سا ل دانێ ئێڤاری ل پاركا نەوروز ب مۆزیك ئەڤ رۆژە دێ هێتە ساخكرن.
سەمەدار مایی، رێڤەبەرێ هونەرێ مۆزیكێ ل دهۆكێ بۆ ئەڤرۆ نیۆز گۆت: ئەڤ رۆژە یا هاتیە دەستنیشانكرن ژلایێ رێكخراوا نەتەوێن ئێكگرتی ڤەن چونكو خەلك پتر بیرا خوە ل هونەرێ مۆزیكێ دئینت و دڤێ رۆژێ ژی دا مرۆڤێن دانعەمرو پیرۆ كال پەیاما خوە دگەهینە خەلكی كو نەهێنە ژبیركرن و هەبوونا ڤان رۆژان ژی رامان ژبۆ هەیە نە بتنێ مۆزیك بهێتە ژەنین و دەمەكێ خوەش بورینن، بەلكو مەرەم ژێ ئەوە ئەو جهێن ڤالا ژ مۆزیكێ بهێنه پركرن ژدەنگێن مۆزیكێ.
زێدەتر گۆت: هەر د رۆژا جیهانی یا مۆزیكێ دا دێ سەرەدانا مالا دانعەمرا هێتە كرن و مۆزیك دێ بۆ وان ژەنین و پێكڤە دێ دەمەكێ خوەش بورینن و ل دەمێ ئێڤاری ژی دێ چەندین چالاكێن مۆزیكێ ل پاركا نەوروز هێنە كرن ب مەرەما ساخكرنا روژا جیهانیا مۆزیكێ
ئەڤرۆ نیوز، نەوزاد هلوری:
زارۆیه‌كێ بناڤێ (رێبەر حسێن) د ژیێ پێنج سالیێ دا، ئەڤرۆ ئێڤاری د ناڤا پارکا نەورۆز دا ل دهۆکێ، پێشانگەهەکا شێوەکاری ڤەکر کو تێدا پتری 80 وێنان بخوڤە دگرتن. پێشانگەهـ ژی ب هاریکاریا هەرئێک ژ رێکحراوا مندالپارێزی کوردستان و پشکا نەخه‌وشیا خوێنێ یا سەر ب سەرۆکاتیا ساخلەمیا دهۆکێ هاتە ڤەکرن.
ئەڤرۆ نیوز ، زنار تۆڤی:
ل ده‌رگه‌هێ سەرزێری یێ سنورى ل ناحیا كانی ماسێ یا سەر ب قەزا ئامێدیێ ڤە، یاكو دكەڤیتە د ناڤبەرا هەرێما كوردستانێ و باكورێ كوردستانێ دا، سوبەهی 1/ چریا ئێكێ یا 2019 دەمژمێرەك دێ هێتە كێمكرن بۆ هاتنوچوونا رێڤنگان د ڤی دەرگەهی را و ئەڤ بریارە دێ هەتا 31/3/2020 یا بەردەوام بیت.
عرفان سلێمان عەبدوللا، رێڤەبەرێ ده‌رگه‌هێ سەرزێری یێ سنورى بۆ ئەڤرۆ نیوز دیار كر: ل دووڤ وێ پرۆتوكولا هاتیە موركرن د ناڤبەرا رێڤەبەریا كۆمەلگەها ده‌رگه‌هێ سەرزێری یێ سنورى و رێڤەبەرێ گۆمركا ئوزوملۆ و ب بەرهەڤبوونا قایمقامێ قەزا ئامێدیێ و قەزا چەلێ، ژ سوبەهی 1 چریا ئێكێ و پێدا دێ دەواما فەرمی ل ژ دەمژمێر 8:30 سپبَدێ هەتا پبَنجی ئێڤارێ بیت، ژبەركو دەڤەرا مە دەڤەەركا چیایی یە و ل وەرزێ زڤستانێ رۆژ كورت دبن، لەوما وان ئەڤ بریارە دایه كو هه‌تا 31/3/2019 دێ كار پێ هێته كرن.
هەروەسا گۆت ژی: هێشتا ده‌رگه‌هێ سەرزێری نەبوویە 24 دەمژمێری، هەر چەندە مە گەلەك بزاڤ كرینە كو ئەڤ دەروازە ببیتە دەروازەكێ فەرمی و ببیتە 24 دەمژمێری ژی.
نيشاندان