ئه‌ڤرۆ نیوز:

وه‌زاره‌تا ناڤخوه‌ ل هه‌رێما كوردستانێ رۆهنكرنه‌ك ل دۆر نڤیساره‌كا خوه‌ به‌لاڤكر كو ئاراسته‌ى پارێزگه‌ها دهۆكێ هاتیه‌ كرن و یا تایبه‌ته‌ ب مه‌زاختیێن حه‌فته‌مین فلمه‌ فیسته‌ڤالا دهۆك یا نێڤده‌وله‌تى یه‌.

د رۆهنكرنا وه‌زاره‌تا ناڤخوه‌ دا هاتیه‌” پارێزگا ب رێیا وه‌زاره‌تا ناڤخوه‌ نڤیساران ئاراسته‌ى وه‌زاره‌تان دكه‌ن، ئه‌ڤ نڤیساره‌ ژى یا سه‌رده‌مێ كابینا هه‌شتێ یه‌ كو پارێزگه‌ها دهۆكێ داخوازا رازیبوونێ ژ وه‌زاره‌تا دارایى كربوو و وه‌زیرێ به‌رێ یێ دارایى ژى داخواز كربوو ل سه‌ر بودجا پارێزگه‌هێ بهێته‌ مه‌زاخیتن، به‌لێ پارێزگه‌ها دهۆكێ به‌رسڤا نڤیسارێ دابوو كو بودجا پێدڤى نینه‌، له‌وما پاشى ژ لایێ وه‌زاره‌تا دارایى ڤه‌ رازیبوون هاته‌ وه‌رگرتن و ب رێیا وه‌زاره‌تا ناڤخوه‌ پارێزگه‌ها دهۆكێ ژ ل دۆر رازیبوونێ هاته‌ ئاگه‌هداركرن”.

ل دووڤ وێ رۆهنكرنێ ژى، وه‌زاره‌تا ناڤخوه‌ ئه‌و پاره‌ نه‌ مه‌زاختیه‌، به‌لكو تنێ پارێزگه‌ها دهۆكێ ژ رازیبوونێ ئاگه‌هدار كریه‌.

ئەڤرۆ نیوز، نیوار محەمەد سەلیم:

ئه‌ڤرۆ رۆژا ئێكشه‌مبى رێكه‌فتى 15ى ئيلۆنا 2019ێ لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ مێڤانداريا لژنا سه‌رپه‌رشتيكرنا پرۆسێسا تاپۆكرنا خانيێن زێده‌گاڤيێن خودان پسۆلا 120 كر و تێدا گه‌نگه‌شه‌ ل سه‌ر ئه‌گه‌رێن گيرۆبوونا تاپۆكرنا وان كرن.

عه‌بدولكه‌ريم چه‌مانكى، سه‌رۆكێ لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ گۆت: “ئه‌ڤرۆ مه‌ مێڤانداريا لژنا سه‌رپه‌رشتيكرنا پرۆسێسا تاپۆكرنا خانيێن زێده‌گاڤيێن خودان پسۆلا 120 كر و تێدا گه‌نگه‌شه‌ ل سه‌ر ئه‌گه‌رێن گيرۆبوونا تاپۆكرنا وان كرن”.

زێده‌تر گۆت: “گه‌له‌ك ئه‌گه‌ر يێن هه‌ين كو هه‌موو خانى نه‌هاتينه‌ تاپۆكرن و به‌رچاڤترين ئه‌گه‌ر ژى ئه‌ون كو هنده‌ك وه‌لاتيان نه‌ڤێت مفادار بن و هنده‌ك ژى يێن هه‌ين د مفاداران ل سه‌ر ناڤێ وان ناهێنه‌ تاپۆكرن”.

ئاشكه‌ر ژى كر كو ئه‌گه‌ره‌كێ دژى ئه‌وه‌ كو گه‌له‌ك خانى دكه‌ڤنه‌ به‌ر خزمه‌تگۆزاريێن باژێرڤانيێ و باژێرڤانيێ سۆز دايێ كو دێ ب پارچه‌كا ئه‌ردى هێنه‌ قه‌ره‌بووكرن ل جهێ وێ هه‌رده‌مێ هاتنه‌ به‌لاڤكرن، به‌لێ ژ به‌ر نه‌بوونا ئه‌ردى ژ لايێ باژێرڤانيێ ڤه‌ ئه‌ڤ پرۆسه‌ گيرۆ بوويه‌.

نه‌ڤه‌شارت ژى كو هنده‌ك ژ وان خانيان ژى زێده‌گاڤى نه‌ ل سه‌ر ئه‌ردێن هنده‌ك جهێن دى وه‌كو ئه‌وقاف و چاندن و … هتد و گۆت: “ئه‌گه‌ره‌كێ دژى يێ هه‌ى كو هنده‌ك ژ وان خانيان يێن به‌رى سالا 2000ێ، به‌لێ پسۆلا 120ى پێ نينه‌”.

بڕياره‌ ئه‌و هه‌موو خانيێن زێده‌گاڤى يێن سنورێ قه‌زا دهۆكێ يێن به‌رى 2000ێ و پسۆلا 120ى هه‌ين بهێنه‌ تاپۆكرن كو ژمارا وان دگه‌هيته‌ حه‌فت هزار و 700 خانيان، به‌لێ ژ به‌ر ئه‌گه‌رێن ل سه‌ر دياركرى هه‌تا نها پێنج هزار و 437 خانى هاتينه‌ تاپۆكرن و يێن دى ماينه‌.

عه‌بدولكه‌ريم چه‌مانكى گۆت: “دێ ل گه‌ل لژنا په‌يوه‌نديدار يا په‌رله‌مانێ كوردستانێ روونين دا ژ لايێ خوه‌ ڤه‌ ئه‌و ل گه‌ل وه‌زاره‌تێن شوله‌ژێ ب روونن و ڤان ئاريشان چاره‌ بكه‌ين”.

ب ره‌نگه‌كێ گشتى ل سنورێ قه‌زا دهۆكێ 21 هزار و 500 خانيێن زێده‌گاڤ هه‌نه‌ كو شه‌ش هزار و 400 ژى نه‌ گرێدايى ڤى بابه‌تى نه‌ و حه‌فت هزار ژى ئه‌و خانى نه‌ يێن ل ده‌وروبه‌رى دهۆكێ هاتينه‌ ئاڤاكرن و نوكه‌ كه‌فتينه‌ د ناڤ خزمه‌تێن باژێرڤانيێ دا وه‌كو قه‌سارا و بێتاسێ و بێسرێ و ئێمينكێ و ئێتيتێ و ئه‌ڤريكێ.