ئەڤرۆ نیوز:
ئەڤرۆ ل باژێرێ سلێمانیێ و ل ناڤەندا گشتی یا بزاڤا گۆڕان هەلبژارتنێن رێکخەرێ گشتی برێڤە چوون و تێدا عومەر سەید عەلی ب دەنگێ ٢٨ ئەندامێن پشکدارێ کۆمبوونێ جارەکا دی وەکو رێکخەرێ گشتی یێ بزاڤا گۆڕان هاتە هەلبژارتن.
هەژی ئاماژەپێدانێ یە کو پشتی وەفا نەوشیران مستەفا، عومەر سەید عەلی وەکو رێکخەرێ گشتی یێ بزاڤا گۆڕان هاتبوو هەلبژارتن و هەتا دەمێ هەلبژارتنێن ئەڤرۆکە ژی وەکو رێکخەرێ گشتی ل سەر ئەرکێ خوە بەردەوام بوو.
ئه‌ڤرۆ نیوز، عه‌لى حاجى :
د داخویانیه‌كێ دا هاریكارێ زانكویا زاخۆ بۆ ئه‌ڤرۆ نیوز دیار كر پشتى وه‌زاره‌تا خواندنا بلند بریارا قه‌ده‌غه‌كرنا خواندنا ئێڤاران ل زانكویان ده‌ركرى، د نووترین بریار دا وه‌زاره‌تێ رازیبون ل سه‌ر ڤه‌كرنا خواندنا ئێڤاران ل هنده‌ك پشكان دایه و بریاره ده‌ست ب وه‌رگرتنا قوتابیان بهێته كرن.
دكتور كاروان فه‌همى ئه‌و چه‌نده ژى گۆت : پشتى سه‌ره‌دانا وه‌زیرێ خواندنا بلند و ڤه‌كولینێن زانستى بۆ زاخۆ مه ئه‌و داخواز ژێ كر كو بۆ زانكویا زاخۆ رازیبون ل سه‌ر ڤه‌كرنا خواندنا ئێڤاران بۆ ئه‌ڤ ساله بهێته كرن، ژبه‌ر كو ل زاخۆ چو په‌یمانگه‌ه و زانكویێن ئه‌هلى نینن، ل دووڤرا ب رێیا سێ نڤێساران مه داخاز ژ وه‌زیرى كر رازى بیت ل سه‌ر ڤه‌كرنا خواندنا ئێڤاران، پشتى وان نڤێساران وه‌زیرێ ناڤبرى رازى بوو ل سه‌ر ڤه‌كرنا خواندنا ئێڤاران بۆ هه‌مى زانكویێن داخازا به‌رده‌وامى دانا خواندنا ئێڤاران كربوو،به‌لێ هه‌تا نوكه بتنێ رازیبون ل سه‌ر 11 پشكێن كولیژێن مروڤایه‌تى هاتیه كرن و ڤه‌كرنا پشكێن كولیژێن زانستى هاته ره‌تكرن، دنوكه دا هه‌مى كه‌سه‌ك دشێت ب رێیا ئونلاینێ فورمێن خوه پر بكه‌ت.
دا زانین ژى ب رێیا ئونیلانێ بتنێ دێ ئاریشه‌یه‌ك هه‌بیت كو ئه‌و كه‌سێن كونمرا وان ژ 60 كێمتر بیت چو پوینته‌ك دیار نابیت،به‌لێ پشتى سیسه‌مێ زانكولاین ب دوماهى دهێت دێ فورمان به‌لاڤ كه‌ین، و گوت ژى : دبیت وان كه‌سان ژى وه‌ربگرین یێ نمرێن وان ژ 60 كێمتر.
ناڤهاتى گوت ژى : ئه‌ڤ بریارا هاتیه ده‌ر كرن بۆ پرانیا وان زانكویان هاتیه دان ئه‌وێن پێشتر داخازا ڤه‌كرنا خواندنا ئێڤاران كرین دناڤ زانكویێ هه‌ر دیسان مه دو جاران داخازا ڤه‌كرنا پشكێن زانستى كرینه به‌لێ وه‌زیرى رازى نه‌بوو ل سه‌ر ڤه‌كرنا وان پشكان،پلانا وه‌رگرتنا قوتابیان ل ئێڤاران دێ ل دووڤ وێ چه‌ندێ بیت كو ل ده‌واما سپێده‌هیان چه‌ند قوتابى بهێنه وه‌رگرتن دێ ل ئێڤاران ژى هه‌ما رێژه‌یا قوتابیان هێته وه‌رگرتن،هه‌ر چه‌نده ئه‌و پارێ دهێته وه‌رگرتن نابیته داهاته‌ك بۆ زانكویێ ،ژبه‌ر كو ل دووڤ بریارا ئه‌نجومه‌نێ وه‌زیران پێدڤى یه هه‌مى داهاتێ زانكویان ڤه‌گه‌ریته وه‌زاره‌تا دارایى،به‌لێ ل وێ باوه‌رێ مه دێ حكومه‌ت پشكه‌كێ ژ وى پاره‌یى بۆ زانكویان ته‌رخان كه‌ت.
ئەڤرۆ نیوز، نیوار محەمەد سەلیم:
سەرۆکێ لژنا باژێرڤانی و خزمەتگۆزاریێن گشتی ل جڤاتا پارێزگەها دهۆکێ راگەهاند کو سوبەهی ئەو دێ مێڤانداریا لژنا تاپۆکرنا خانیێن زێدەگاڤ کەن ل جڤاتا پارێزگەهێ.
عەبدولکەریم چەمانکی، سەرۆکێ لژنا باژێرڤانی و خزمەتگۆزاریێن گشتی ل جڤاتا پارێزگەها دهۆکێ، گۆت: “سوبەهی لژنا تاپۆکرنا خانیێن زێدەگاڤ ل سنورێ پارێزگەها دهۆکێ دێ مێڤانا لژنا مە بیت و دێ گەنگەشە ل سەر کارێ وان هێتە کرن و ئەو ئاستەنگێن دکەڤنە بەر سینگێ لژنێ”.
زێدەتر گۆت: “ئەڤە نێزیکی چار سالایە لژنا مە کار ل سەر دکەت و نها یێ کەفتیە د وارێ بجهئینانێ دا و ب هزاران خێزان د مفادارن ژ ڤی پرۆژەیی کو ئەون یێن بەری سالا 2000ێ ئەڤ خانیە ئاڤاکرین کو ئەو ژی ب گۆرەی چەند رێنمایایە”.
ئاشکەرا ژی کر کو ئەو کەسێن خانیێن وان دهێنە تاپۆکرن ئەوێن یێن پێشتر پلێتا 120وەرگرتین و هەر مەترەک بۆ ب 500 دیناران دهێتە تاپۆکرن و گۆت: “یێ ئەو خانی ل سەر ناڤی هاتەتاپۆکرن دبیتە مفادار، بەلێ هەر ئەندامەکێ خێزانێ دشێت ل سەر ناڤێ خۆ تاپۆ بکەت”.
ئەڤرۆ نیوز ، زنار تۆڤی:
ئەڤرۆ شەمبیێ 14 ئیلۆنا 2019 ل دەمژمێر 11 سپێدێ ب بەرهەڤبوونا چەندین هونەرمەند و سینەماکارێن کورد پانێلێ پەروەردا سینەمایێ ل هەرێما کوردستانێ ل هۆلا کۆنفرانسان هاتە پێشکێشکرن.
پانێلێ ژ ئالیێ هەلکەت ئیدریس عابدی ڤە بەرپرسێ راگەهاندنا فلمە فیستەڤالا دهۆکێ ڤە هاتە برێڤە برن.
ل دەستپێکێ شەهرام قادر مامۆستایێ پشکا سینەمایێ ل زانکۆیا سەلاحەدین گۆت: دڤێت گرنگی ب وارێ سینەمایێ بهێته دان و بازار کرن د وارێ سینەمایێ دا بهێتە چێکرن، مە ل کوردستانێ ب سەدان دەزگەهێن راگەهاندنێ هەنە، لەوما دڤێت حوکمەتا هەرێمێ هەماهەنگیێ دناڤبەرا پشکێن سینەمایێ و کەنالێن راگەهاندنێ دا بکەت، دەرچوویێن پشکا سینەمایێ دابمەزرینیت، ژ پێخەمەت دەلیڤێن کاری بۆ وان پەیدا بکەت، داکو ئەو ژی بشێن کارێن باشتر د وارێ سینەمایێ پێشکێش بکەن، دیسان د وارێ درامایێ ژی چ گوهۆرینێن باش چێنەبووینە ل کوردستانێ و زێدەهی تێدا هەیە و د وارێ تەکنیکێ دا گەلەک بێ سەروبەر هاتینە چێکرن، هەروەسا ل هەرێمێ مە سینەمارێن باش هەنە و شیاینە کارێن باش ئەنجام بدەن، لێ هەتا نوکە دەرهێنەرێن کورد نەشیاینە د وارێ مێژوویێ دا بەحسێ کوردستانی بکەن، لێ ژبەرکو فلمسازێن مە سەر ب حزبان ڤەنە، لەوما نەشیاینە ب رەنگەکێ سەربەخۆ کارێ سینەمایێ بکەن، چونکی هێشتا فلمسازێن مە یان حزبینە یان حکومی، ڤێ ژی وەکریە کو سینەما وەکو پێدڤی کار بکەن، گەلەک جاران هێرشێن هندێ دکەن، کو کۆلیژ و پەیمانگەهێن هونەری بهێنە گرتن، کو ئەڤێ ژی کارتێکرنەکا خراب کریە سەر وارێ سێنەمایێ ل کوردستانێ.
د. عامر سەباح حەسەن نوری سەرۆکێ کۆلیژا هونەرێن جوان ل زانکۆیا بابل دیار کر: جۆداهیەکا مەزن د پرۆگرامێن خواندنا قۆتابیان هەیە، ئەڤە ژی ئاریشەکا مەزنە بۆ وان، لەوما دڤێت ئێدی پرۆگرامێن خواندنێ بهێنە نووکرن، داکو ئەم ژی بشێین ل گەل زانستا سەردەمانە برێڤە بچین، کادرەکێ باش یێ سینەمایێ بەرهەم بینین، دیسان پرانیا زانکۆیێن مە گرنگیێ ب وارێن زانستی ددەن، لێ دڤێت گرنگی ب ڤان پشکان بهێتە دان، چونکی مە پێدڤیەکا باش ب سینەمایێ هەیە.
گۆت ژی: کادرێ وارێ سینەمایێ ل عیراقێ، ئەرێ مامۆستایێن زانکۆیێ گرنگیێ ب مژارێن رەخنێ و سینەمایێ ددەن، گەلەک دەرهێنەر ل زانکۆیا کار دکەن، لێ چ فلم چێنەکرینە، لەوما ئەڤە نەشێت چ پێشکێشی قوتابیا و سینەمایێ بکەت، لەوما ب تنێ کارێ گەلەک ژ وان ب تنێ وانە گۆتنە و هزر و بیرێن وان ژی د کەڤنن و چ تشتێ نوو پێشکێشی قوتابیان ناکەن.
دیارکر ژی: 60% یا قوتابیان بۆ هندێ دخوینن داکو بهێنە دامەزراندن ل کەنالەکێ، لێ نەخودان شیانن، لەوما زانکۆیێن مە ئاریشە ل گەل قوتابیان هەنە، لەوما دەمێ دەردچن، نەشێن وەکو پێدڤی خزمەتا هونەڕی بکەن، دڤێت هندەک رێنما بهێنە دانان، ژ بۆ وەرگرتنا قوتابیان، لەوما قوتابیێن مە نەشێن چ پێشکێش بکەن، دەمێ دەرچوونێ، دیسان نوکە کەسێن نە ئەکادیمی پتر د وارێ هونەری و سینەمایێ دا کار دکەن.
ل دوماهیا پانێلێ بەرهەڤبوویان چەندین پرسیار پێشکێشی پانێلیستان کرن و دانوستاندن ل سەر چەندین تەوەران هاتە کرن.
ئه‌ڤرۆ نیوز، نه‌وزاد هلۆرى:
ئه‌ڤرۆ دچارچوڤێ گه‌را حه‌فت یا فلمه ڤیسته‌ڤالا دهۆك یا نیڤده‌ولى دێ هژماره‌كا فلمام هێنه نیشاندان و چه‌ند په‌له‌نه‌ل ژى هێنه ئه‌نجام دان ل ده‌م و جهێن ژێكجودا ل هولێن سینه‌ماكس ل دهۆك مول هێنه نیشاندان، كو ئه‌و ژى 12 كورته فلم و 13 فلمێن درێژ ل گه‌ل هنده‌ك فلمێن به‌لگه‌نامه‌ى نه.
ل ده‌مژمێر 11:00ێ سپێدێ دێ په‌نه‌له‌ك بناڤ و نیشانێن په‌روه‌ردا سینه‌مایى ل هه‌رێما كوردستانێ، ب پشكداریا هه‌ر ئێك ژ شه‌هرام قادر، د.یه‌لماز ازدیل، توماس كوسلر، ئیبراهیم سلێمان و محه‌مه‌د شایكو دانوستاندن لسه‌ر هێته‌كرن.
هه‌ر دیسان ل ده‌مژمێر 11:00ێ سپێدێ ل هولا سینه‌ماكس ئێك ل دهوك مول هژماره‌كا كورته فلمان هێنه نیشاندان ژ وانان فلمێ (غلوكوما) یێ ده‌رهێنه‌رێ ئیرانى ره‌زڤان خودانى، فلمێ (DEAD PEOPLE DO NOT EAT SWEETS) ژ نڤیسینا حه‌سه‌ن خالد، فلمێ (GET OFF) ژ نڤیسینا ته‌یمور غه‌دیرى، فلمێ (HIGH DIVE by Donya Zandi) ژ نڤیسینا دنیا زندى، فلمێ (RETURN) ژ نڤیسینا سلێمان دینیز كو فلمه‌كێ توركی یه هێته نیشاندان، فلمێ (GETTING BACK) ژ نڤیسینا خدر محه‌مه‌د كو فلمه‌كێ عیراقى یه هێته نیشاندان، هه‌ردیسان ل هولا سینه‌ماكس دوو ژى دێ هژماره‌كا فلمان هێنه نیشاندان، ژ وانان ، فلمێ (TRIANGLE) ژ نڤیسینا دنیا كاموسى، فلمێ ئه‌ز چاڤه‌رێ مه ژ نڤیسینا محه‌مه‌د شێروانى، فلمێ (SLAUGHTER) ژلایێ حسێن بور و ئاكو زندكریمى، فلمێ باوه‌رنامه ژلایێ كامیران بێتاسى، فلمێ (THE HEAVY BURDEN) ژلایێ یه‌لماز ئوزدیل، فلمێ هیڤى ژ ده‌رهێنانا محه‌مه‌د شایكو هێنه‌نیشاندان،
ل ده‌مژمێر 3:00ێ ئێڤارى هه‌ر ل هولا سینه‌ماكس ئێك فلمه‌كێ به‌لگه‌نامه‌یێن كوردى هێته‌نیشاندان، ل هولا سینه‌ماكس دوو ژى چه‌ند فلمه‌ك هێنه‌نیشاندان ژ وان فلمان، فلمه‌كێ توركى بناڤێ كریارێن بێده‌نگ ژلایێ ئه‌نتونیو لوكتیش، ل هولا سینه‌ماكس سێ ژى فلمه‌كێ به‌لگه‌نامه‌یێ بیانى هێته نیشاندان بناڤێ (كاركرن ل باژێرێ خوینێ)، ژ ده‌رهینانا مایا نیوویل، ل هولا سینه‌ماكس دوو ژى د چارچوڤێ به‌ریكانا فلمێن بیانى فلمه‌ك بناڤێ (توره‌ى) ژده‌رهێنانا سیرجیو تریفوت هێنه‌نیشاندان.
ل ده‌مژمێر 5:00ێ ئێڤارى ل هولا سینه‌ماكس سێ دچارچوڤێ به‌ریكانا فلمێن به‌لگه‌نامه‌یى یێن بیانى دێ چه‌ند فلم هێنه نیشاندان، فلمێ (GODS OF MOLENBEEK) ژ ده‌رهێنانا ریتا هوتانان هێته نیشاندان، هه‌ر ل ده‌مژمێر 5:00ێ ئێڤارى ل هولا سینه‌ماكس ئێك دێ چه‌ند فلم هێنه نیشاندان، فلمێ (NOWHERE TO HIDE) ژ ده‌رهێنه‌ر زارداشت ئه‌حمه‌د هێته‌نیشاندان، ل هولا سینه‌ماكس دوو ژى فلمێ (نوڤمبه‌را سار) ژ ده‌رهێنانا عسمه‌ت سجارینا هێته نیشاندان.
ل ده‌مژمێر 7:00ێ ئێڤارى ل هولا سینه‌ماكس سێ ژى فلمه‌كێ به‌لگه‌نامه‌یى هێته‌نیشاندان بناڤێ وه‌رزێ زڤستانێ ژ نڤیسینا سیدسى تورستولم لارسن، ستورلا بیلسكوغ.
ل ده‌مژمێر 9:00ێ ب شه‌ڤ ژى ل هولا سینه‌ماكس ئێك فلمێ شه‌ڤ ژ ده‌رهێنانا محه‌مه‌د ملس هێته نیشاندان، دیسان ل هولا سینه‌ماكس سێ ژى فلمێ (BORN IN EVIN) ژلایێ مریه‌م زارى هێته‌نیشاندان، دیسان ل هولا سینه‌ماكس سێ ژى فلمه‌كێ به‌لگه‌نامه‌ى بناڤێ DREAMAWAY ژ نڤیسینا جودهانا دومك و مه‌روان عمار هێته نیشاندان، ل پاركا ئازادى ژى فلمه‌كێ توركى بناڤێ (AT DAWN) ژده‌رهێنانا سالم سالافاتى هێته نیشاندان.
ئەڤرۆ نیوز،بارزان مزووری:
فیراس یاسین،بەرپرسێ پەیوەندی و راگەهاندنا بەرگریا شارستانی ل قەزا ئاكرێ بۆ ئەڤرۆ نیوز دياركر ئەڤرۆ مەغرەب ل رووبارێ زێ بچووك نێزیك گوندێ چەمەی سەر ب ناحیا رۆڤیا وەلاتیەك بناڤێ”عبدالقادر سلێمان فەتاح” د ژیێ 50 سالی دا د ناڤ رووبارى دا خەندقی هەتا مەغرەبیەكا درەنگ تیمێن مە بەردەوام بوون ل سەر لێگەریانا تەرمێ وی به‌لێ نەهاتیە دیتن و تیمێن مە دێ سوباهى سپێدێ دوباره دەست ب لێگەریانێ كەن.
خویاكر ژى” ئەو كەسێ خەندقی پێشمەرگەیە د دەواما خودایە ل دەوروبەرێن رووبارێ زێ بچووك ژبۆ مەرەما مەلەڤانیكرنێ چویە سەر رووبارى ژبەر نەشاره‌زاييا وی د خەندقیت”.
گوت ژى” ئه‌و كه‌سێ خه‌ندقى ئاكنجيێ كه‌له‌كێ بوو”.
ئەڤرۆ نیوز، نەوزاد هلوری:
لاوین محەمەد، گەنجەکێ باژێرێ دهۆکێ یە، ب مەرەما پشکداریکرن د جوانکرنا سەر و سیمایێ دهۆکێ، سەرنجراکێشانا مێهڤان و گەشتیاران پتری 13 تەنێن فێقی د دوکانا خوەڤه هەلاویستینە، د خوازیت ل ئایندە کارێ خوە بەرفرەهتر بکەت. وەکو ئەو ددەت دیاکرن رۆژانە هژمارەکا زۆرا خەلکی قەستا جهێ وی دکەن ب مەرەما گرتنا دیمەنان، ژ وان ژی بوک و زاڤا.
ئه‌ڤرۆ نیوز، نه‌وزاد هلۆرى:
ده‌مه‌كێ كێم به‌رى نوكه ئاگر ب دو خیڤه‌تێن ناڤا كه‌مپا كه‌به‌رتوو ئێک كه‌فت و ب تمامى هاتنه سوتن، ئاواره‌كێ ئه‌وێ كه‌مپێ ژى دیاركر كو ئه‌گه‌راێ به‌ربوونا ئاگرى يێ ديار نينه و ئه‌ڤه چه‌ندین جاران روودانێن ئاگرى دوباره بوون.
باسم شنگالى، شاهدحال و ئاواره‌یێ كه‌مپا كه‌به‌رتوو بۆ ئه‌ڤرۆ نیوز گۆت” ده‌مه‌كێ كێم به‌رى نوكه ئاگر به‌ربوویه دو خیڤه‌تێن ناڤا كه‌مپا (كه‌به‌رتوو ئێک) و هه‌ردو خیڤه‌ت ژى ب تمامى سوتن”.
زێده‌تر گۆت”خودانێن هه‌ردو خیڤه‌تان د ناڤ بیستانێن خوه دا كاردكر و ل مال نه‌بوون، هه‌تا نوكه ئه‌گه‌رێ روودانێ يێ ديار نينه، ئه‌ڤه چه‌ندین جاران ئاگر ل كه‌مپا كه‌به‌رتوو دووباره بوو و هه‌تا نوكه هژماره‌كا زۆرا خیڤه‌تان هاتینه سوتن).
شنگالى دیاركر ژى كو ئاگر ژلایێ جیرانێن وان هاتیه كونترولكرن، به‌لێ زیانێن زورێن مادى به‌ر وان هه‌ردوو خیڤه‌تان كه‌فتیه.
ئه‌ڤرۆ نیوز، نه‌وزاد هلۆرى:
به‌رى ده‌مه‌كێ كێم حه‌فت ترومبێلان ل سه‌ر رێیا گشتى د ناڤبه‌را ئیمینكێ و بێسرێ لێكدا.به‌رپرسێ راگه‌هاندنا هاتنووچۆنا دهۆكێ ژى دیاركر كو چو زیانێن گیانى نینن.
ئازاد ته‌ها، به‌رپرسێ راگه‌هاندنا رێڤه‌به‌ریا هاتنوچوونا پارێزگه‌ها دهۆكێ بۆ ئه‌ڤرۆ نیوز گۆت “ده‌مه‌كێ كێم به‌رى نوكه حه‌فت ترومبێلان ل سه‌ر رێیا گشتى د ناڤبه‌را ئیمینكێ و بێسرێ ل نێزیك سه‌نته‌رێ باژێرێ دهۆكێ لێكدا”.
زێده‌تر گۆت” كه‌سان گیانێ خوه ژ ده‌ست نه‌دایه، به‌لێ چه‌ند كه‌سه‌ك يێن برینداربووين وزيانێن دراڤى يێن مه‌زن ب ترومبێلان كه‌فتینه، پولیسێن هاتنووچۆنێ ل جهێ روودانێ به‌رهه‌ڤن و ڤه‌كولینێ ل سه‌ر روودانێ دكه‌ن).
ئەڤرۆ نیوز ، زنار تۆڤی:
ئەڤرۆ ئەینیێ 13 ئیلۆنا 2019 ل دەمژمێر 11 سپێدێ ب بەرهەڤبوونا چەندین هونەرمەند و سینەماکارێن کورد پانێلێ بازارێ سینەمایی یێن فلمێن کوردی ل هۆلا کۆنفرانسان هاتە پێشکێشکرن.
پانێل ژ ئالیێ مەهمەت ئاکتاش ڤە هاتە برێڤە برن. ل دەستپێکێ محەمەد محسن وەکو بەرهەمهێنەڕەکێ فلمان ل دهۆکێ بۆ ئەڤرۆ نیوز گۆت: دڤێت گرنگی ب سینەمایێ بهێتە دان و حوکمەتا هەرێمێ پتر هاریکاریا سینەماکاران بکەت، هەروەسا هەتانوکە ب تنێ فلم دهێنە چێکرن، ژ بۆ وەرگرتنا خەلاتان و بۆ هندێ ناهێنە چێکرن، کو پتر خزمەتا سینەما کوردی بکەن، دڤێت گرنگی ب دراما خۆمالی بهێتە دان و بەرهەمێن نافخۆیی بهێنە چێکرن، باشترە کۆنفرانسەکێ سینەمایی ل دهۆکێ بهێتە رێکخستن، ژ بۆ باشترکرنا رەوشا سینەما کوردی ل کوردستانێ.
کامەران حسێن دیار کر: دڤێت ئەم بزانین بینەرێ کوردی پێدڤێ ب چو هەیە، ئەم وان فلمان بەرهەم بینین، هەروەسا هێشتا سینەما نەبوویە ئێک ژ پێدڤیێن خەلکێ مە، دیسان هەکە بێژین حوکمەت هەموو کاران بکەت ژ بۆ بازارکرنا فلمان ئەڤە ژی هزرەکا خەلەتە، لێ دڤێت ئەم ل وان خالان بگەرین یێن کو چاڤێ بینەری تژی دکەن، دڤێت هەستێ فلمان ل گەل هەستێ بینەری نێزیک بکەن، دیسان هژمارا فلمێن کوردی د کێمن، مە کۆمەکا کێماسیان د بازارکرنا فلمان دا هەیە.
سینەماکار مەسعود عارف گۆت: رەوشا سیاسی یا کوردستانێ کاریگەری ل هەموو وارێن ژیانێ کریە، هەر چەندە مە سینەما کوردی نینە، لێ مە فلمێن کوردی یێن هەین، هەروەسا دڤێت پرۆژە قانوونەک بهێتە دانان بۆ چێکرن و بازارکرنا فلمان ل کوردستانێ، دیسان تانوکە دەولەمەندێ مە هزر نەکریە خزمەتێ د وارێ هونەری دا بکەت، لەوما هەتانوکە مە بازارێ نەتەوەیی یێ سینەما کوردی نینە، دیسان دڤێت لدووڤ هندەک مەرجان فلم بهێنە دروستکرن، دڤێت ئەم کەلتۆرێ خوە ب رێیا سینەمایێ پارێزین و دڤێت ئەم بازارەکێ نافخۆیی چێکەین، هونەر بوویە ئێک ژ پێدڤیێن رۆژانە یێن خەلکێ ل جیهانێ، لێ هێشتا ئەڤە ل کودستانێ پەیدا نەبوویە، لێ مە هیڤیێن گەش هەنە، کو دێ سینەما کوردی بەرەف باشڤە چیت، دیسان دڤێت تیڤیێن کوردی بەرهەمێن نافخۆیی پەخش بکەن. لدوماهیا پانێلێ بەرهەڤبوویان چەندین پرسیار پێشکێشی پانێلیستان کرن و دانوستاندن ل سەر چەندین تەوەران هاتە کرن.
نيشاندان