ئەڤرۆ نیوز، عەلی حاجی :
بەرپرسێ راگەهاندنا رێڤەبەریا هاتنوچوونا پارێزگەها دهوکێ دیار کر ل سەر رێیا سەرەکی یا باتیفا بۆ گوندێ سیرکوتکێ ژ ئەگەرێ روودانەکا ترافیکی چار کەس بریندار بوون.
زێدەتر مقەدەمێ مافپەروەر ئازاد تاها گۆت : ئەو روودان ل دەمژمێر ٨:١٥ خولەکی شەڤ ل سەر جاددەیا سەرەکی یا ناحیا باتیفا بۆ گوندێ سیرکوتکێ دناڤبەرا ترومبێلەکا لێکسس و تەکسیەکێ دا چار کەس بریندار دبن و زیانێن مەزنێن ماددی ژی بەر ب وان دوو ترومبێلان کەڤتن .
ئەڤرۆ نیوز:
ئەڤرۆ سێشەمبی، پەرلەمانێ کوردستانێ ب دەنگێن ٧٠ پەرلەمانتاران قانوونا ماف و ئەرکێن نەخۆشی پەسەند کر.
ئەو قانوونە ژ ١٧ مادان پێکھاتیە و چەندین مافێن سەرەکی ددەتە نەخۆشی.
ئەندامەکێ لژنا ساخلەمیێ ل پەرلەمانێ کوردستانێ ژی دیار کریە: کو ئارمانجا وان د وێ قانوونێ دا ئەوە مافێن نەخۆشی ب رەنگەکێ قانوونی دابین بکەن، دیسان ئەو قانوونە دێ رژدیێ ل سەر پاراستنا مافێن نەخۆشی کەت، ھەروەسا دڤێت مافێن نۆژشداران و کارمەندێن ساخلەمیێ ژی ب باشترین شێوە بهێنە پاراستن.
ئەڤرۆ نیوز:
حوکمەتا ئەلمانیا دیار کر: كو هەر ئێك ژ ئەنگێلا مێركل شیرەتكارا ئەلمانیا و هورست زیهوڤەر وەزیرێ ناڤخۆ ل سەر وێ چەندێ رێككەفتینە، کو دەرگەهێ وەرگرتنێ بۆ 1500 پەنابەرێن ل گزیرتێن یونان ماینە ئاسێ بهێتە ڤەكرن.
پشتی ئاگر بەربوویە كەمپەكا پەنابەران ل گزیرتا لیسبوس ل یۆنانێ، پتر ژ 12 هزار پەنابەران كو پرانیا وان خەلكێ سوریێ و ئەفغانستانێ و ئەفریقیانە، ماینە بێی جهێن ئاكنجیبوونێ و د رەوشەكا خراب و ئالۆز دا دژین، ژبەر ڤێ چەندێ شیرەتكارا ئەلمانیا رازەمەندی دەربریە بۆ وەرگرتنا وان پەنابەرێن ل پێشوەخت داخوازا مافێ پەنابەریێ ژ ئەلمانیا كرین.
ئەڤرۆ نیوز:
رێكخراوا جڤاكێ نێڤدەولەتی، كو ناڤەندا وێ دكەڤیتە باژێرێ جنێڤ ل سویسرا ئاشكرا كریە: هەر ژ هەیڤا ئادارێ هەتا نوكە نێزیكی 366 رۆژنامەڤانان ل سەرانسەری جیهانێ ژ ئەگەرێ كۆرۆنایێ وەغەرکریە.
د کڤانێ روونشتنێن خولا 45 یا جڤاتا مافێ مرۆڤی یا سەر ب نەتەوێن ئێكگرتی ڤە، كو ل باژێرێ جنێڤ هاتیە سازكرن، بلایسی لیمپین سكرتێرێ گشتی یێ ڕێكخراوێ گوتارەك پێشكێشكر و تێدا خۆیا كر، كو هژمارا وان رۆژنامەڤانێن ژ ئەگەرێ كۆرۆنایێ وەغەر کرین، زێدە دبن، ب تایبەتی ل وەلاتێ هندستانێ.<br>
هەروەسا بلایسی بانگەوازەك ئاراستەی 47 وەلاتێن ئەندام دجڤاتا مافێ مرۆڤیدا كر و داخواز ژێكر، بریارێن گونجای دەربێخن بۆ پاراستنا گیانێ رۆژنامەڤانان ل جیهانێ.
ئەڤرۆ نیوز:
شارەزایێن وارێ ساخلەمیێ ددەنە دیار کرن: ئێک ژ پێنج گەنجێن قەلەو مەترسیا توشبوونێ ب نەخۆشیا چەوریا مێلاکێ هەیە.
مالپەرێ The Sun یێ بریتانی د بابەتەکێ ساخلەمیێ دا ئاماژە ب ڤەکۆلینەکا شارەزایێن زانکۆیا بریستلی یا بریتانی دایە و تێدا دەرکەفتیە، هەموو گەنجێن قەلەو یێن ژیێ وان پتر ژ ٢٠ سالیێ، ئەگەر هەیە تووشی نەخۆشیا چەوریا مێلاکێ ببیت، هەکە سیستەمێ خوارنا خوە رێک نەئێخیت.
هەروەسا وان ڤەکۆلەران ڤەکۆلین ل سەر ٤٠٢١ کەسان کریە، کو تێکرایا ژیێ وان ٢٤ سال بووینە و د قەلەو بووینە، هەموو ئەو گەنجێن کو مادێن کحولی ڤەخوارینە جۆداکرینە، پشکنین بۆ یێن دی کرینە، بۆ وانا دەرکەفتیە ٦٨٠ ژ وان کەسان نەخۆشیا چەوریا مێلاکێ هەبووینە، بێی کو چ مادێن کحولی ڤەخۆن.
ئەڤرۆ نیوز:
وەزارەتا ساخلەمی و ژینگەها عیراقێ راگەھاند: د ٢٤ دەمژمێرێن بوری دا، چار ھزار و ٢٢٤ حالەتێن نوو یێن کۆرۆنایێ و هەروەسا چار ھزار و ٢١٤ حالەتێن باشبوونێ و ٨٠ حالەتێن وەغەرکرنێ ل سەرانسەری عیراقێ ھاتینە تۆمار کرن.
ھەتا نوکە ٢٩٨ ھزار و ٧٠٢ کەس ل عیراقێ تووشی کۆرۆنایێ بووینە، ژ وێ ھژمارێ ژی هەتا نوکە هەشت ھزار و ١٦٦ کەسان وەغەرکریە، دیسان ٢٣٣ ھزار و ٣٤٦ کەس ژی باشبووینە.
ئەڤرۆ نیوز، عەلی حاجی :
بەرپرسێ راگەهاندنا ساخلەمیا زاخۆ بۆ ئەڤرۆ نیوز دیار كر رەوشا كورونایێ ل زاخۆ بەرەڤ خرابتر بوونێ ڤە چوویە و روژانە ژی چەندین حالەت دهێنە تومار كرن سەرەرای هندێ ژی هەتا نوكە وەكو پێدڤی وەلاتی خوە ناپارێزن ژ وی ڤایروسی .
زێدەتر ئەمیر عەلی گۆت: (هەر ژ دەستپێكا هاتنا كورونایێ هەتا نوكە 858 كەس ل زاخۆ توشی كورونایێ بووینە و ژ وان ژی 43 كارمەندێن كەرتێ ساخلەمیێ نە و نەه كەسان ژی گیانێ خوە ژدەست دایە،ئەڤ ژمارەیا ل بەر دەست وەسا دیار دكەت كو رەوش بەرەڤ قوناغەكا مەترسیدار ڤە چوویە ژبەر كو روژانە حالەت دهێنە تومار كرن و هەتا نوكە ژی وەكو پێدڤی وەلاتی خوە ناپارێزن ژبەر وێ چەندێ مەترسیا زێدەتر بەلاڤ بونا كورونایێ هەیە ئەڤجا باشترە وەلاتیێ مە زێدەتر خوە پارێزیت دا كو توشی وی ڤایروسی نەبن، وەكو رێڤەبەریا ساخلەمیا زاخۆ ب هەڤكاری دگەل رێڤەبەریا گشتی یا ساخلەمیا پارێزگەها دهوكێ بۆ دەما حەفتیەكێ یە هەوەكا هوشیار كرنا وەلاتیان ل دور چاوانیا خوە پاراستنێ ژ كورونایێ دەست پێكرینە و ئەو هەوا بەرفرەه ژی دناڤ بازار و رێڤەبەریێن حكومی و جهێن گەشتیاری) .
ناڤهاتی ئەو یەک ژی دیار کر بۆ وێ هەوێ ژی پێنچ تیم هاتینە بەرهەڤ كرن و بەردەوام ژی ب رێیا پوستەر و نامیلەكەیان هوشیاریا خوە پاراستنێ ژ كورونایێ دهێتە بەلاڤ كرن دا كو وەلاتی زێدەتر هەست ب خوە پاراستنێ بكەن .
ئەڤرۆ نیوز:
سەرۆک مەسعود بارزانی پێشوازی ل جینین پلاسخارت نوونەرا سکرتیرێ گشتی یێ نەتەوێن ئێکگرتی ل عیراقێ کر و بەحسێ رەوشا عیراقێ و پەیوەندیێن د ناڤبەرا هەرێمێ و بەغدا هاتە کرن.
د هەڤدیتنێ دا بەحسێ گرنگیا سەرەدانا سەرۆک وەزیرێن عیراقێ بۆ هەرێما کوردستانێ هاتە کرن و نوونەرا سکرتێرێ گشتی یێ نەتەوێن ئێکگرتی راگەهاند وان دڤێت هەرێما کوردستانێ و عیراق ئاریشێن د ناڤبەرا خوە دا چارەسەر بکەن چونکو ئەو یەک د بەرژەوەندیا عیراقێ و هەرێما کوردستانێ دایە.
سەرۆک بارزانی ژی بەحسێ هەلبژارتنێن پێشوەخت ل عیراقێ کر و داخواز کر کو نەتەوێن ئێکگرتی رۆلەکێ کاریگەر بۆ هەلبژارتنان و قۆاناغا داهاتی ل عیراقێ هەبیت.
ئەڤرۆ نیوز:
ئاژانسا فەرمی یا رژێما سووریێ راگەهاند کو ئەڤرۆ کۆپتەرەکا سەربازی یا ئەمریکا ل پارێزگەها حەسەکێ کەفتیە خوارێ.
هەتا نها ل دۆر ئەگەرێن کەفتنا وێ کۆپتەرێ و زیانێن وێ چو زانیاری نەهاتینە بەلاڤکرن.
ئەمریکا چەندین بنگەهێن مەزن یێن سەربازی ل رۆژئاڤایێ کوردستانێ ب تایبەتی ژی ل پارێزگەها حەسەکێ ئاڤا کرینە.
نيشاندان