ئەڤرۆ نیوز:
دادگەها بلند یا مافێ مرۆڤی ل ئورۆپا ئەڤرۆ د روونشتنا خوە دا بریارەک ل دۆر سەلاحەدین دەمیرتاش هەڤسەرۆکێ بەرێ یێ هەدەپێ دا و راگەهاند کو مافێ دەمیرتاشی هاتیە بنپێکرن و دڤێت تورکیا دەمیرتاشی قەرەبۆ بکەت.
ئەو یەک د دەمەکێ دایە کو بەری نها دادگەها ئورۆپا بریارا ئازادکرنا دەمیرتاشی دابوو لێ ژ ئالیێ تورکیا ڤە هاتبوو رەتکرن.
ئەڤرۆ نیوز:
جڤاتا ئاسایشا هەرێما کوردستانێ د راگەهاندنەکێ دا دیار کریە کو هندەک دەزگەهێن راگەهاندنا سەر ب پەکەکێ وەسا دیار کرینە کو جڤاتا ئاسایشا هەرێما کوردستانێ دەست د کوشتنا هندەک سەرکردێن پەکەکێ دا هەبوویە، ئەم ڤێ یەکێ ب توندی رەت دکەین و دیار دکەین کو چو راستی بۆ هندێ نینن.
د بەردەوامیا داخۆیانیێ دا ئاماژە ب هندێ ژی هاتیە کرن کو دەزگەهێن ئێمناهیێ یێن هەرێما کوردستانێ بەرپرسیارن ژ دابینکرنا ئاسایشێ بۆ وەلاتیان و کوردستانا ئازاد پێدڤی ب هندێ نینە کو جارەکا دی بهێتە ئازادکرن.
هەر د راگەهاندنا جڤاتا ئاسایشێ دا داخواز ژ پەکەکێ ژی هاتیە کرن کو هەرێما کوردستانێ نەکەتە مەیدانا شەرێ خوە ل گەل تورکیا دا زیان نەگەهیتە وەلاتیێن هەرێما کوردستانێ.
ئەڤرۆ نیوز، رێوار مزیری:
بەرپرسێ پشکا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ دیار کر کو چار کەس د روودانەکا هاتنوچوونێ دا ل شەڤا ۸ ل سەر ۹/۷/۲۰۱۹ ل سەر جادا کومەلگەها باگێرا برینداربوون.
موقەدمێ مافپەروەر ئازاد تەها، بەرپرسێ پشکا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز ئاشکرا کر کو ژ ئەگەرێ پەیدابوونا روودانەکا هاتنوچوونێ دناڤبەرا دو ترۆمبێلان دا ژ جورێن (هوندای تکسون) و (شۆفرلێت ئوبترا) ل سەر جادا کومەلگەها باگێرا چار کەس برینداربوون و بۆ نەخۆشخانا تەنگاڤیان ل دهۆکێ هاتنە ڤەگوهاستن.
ئه‌ڤرۆ نیوز:
وه‌زاره‌تا په‌روه‌ردێ ل هه‌رێما كوردستانێ راگه‌هاند، بۆ ب ده‌ستڤه‌ئینانا سیسته‌مه‌كێ هاریكار بۆ بریاردان وب هیزكرنا چاوانى وچه‌ندایه‌تیا خواندنێ ل هه‌رێما كوردستانێ، دێ ب رێیا سیسته‌مێ parwardaـ e چار هزار قوتابخانه هێنه ئه‌لكترۆنیكرن.
ئاماژه‌كر ژى كو سیسته‌مێ نوو دێ پشكێن (مامۆستایان وفه‌رمانبه‌ران، قوتابیان، قوتابخانه، مووچه، گۆكا، ده‌رچوو و هاتوو) ڤه‌گریت.
ل دووڤ رۆهنكرنه‌كا وه‌زاره‌تا په‌روه‌ردێ، ژ 12/6/2019 هه‌تا 27/6/2019 فه‌رمانبه‌رێن وه‌زاره‌تێ وپه‌روه‌ردێن پارێزگه‌هان وپه‌روه‌ردێن قه‌زایان پشك\دار بوون د خۆلا راهێنانێ ل سه‌ر ڤى سیسته‌مى ول 30/6/2019 ده‌ست ب خۆلێن راهێنانێ بۆ قوتابخانان هاتیه كرن كو هه‌ر قوتابخانه‌یه‌ك بۆ ده‌مێ 8 رۆژان دێ پشكداریێ د خۆلێ دا كه‌ت كو تاكو 7/8/2019 دێ به‌رده‌وامبیت.
ئه‌ڤرۆ نیوز:
ژبه‌ر وه‌رگرتنا وان بۆ پۆستێن وه‌زارى د كابینا نوو یا حوكمه‌تا هه‌رێما كوردستانێ دا، چه‌ند ئه‌ندامێن په‌رله‌مانێ كوردستانێ ژ فراكسیۆنێن جودا دێ ده‌ست ژ كارێ په‌رله‌مانتاریێ كێشن وهنده‌ك كه‌سێن دى كو پێشتر به‌ربژار بوون دێ ل شوونا وان بنه په‌رله‌مانتار.
هه‌ر ئێك ژ له‌نجه دزه‌یى ژ فراكسیۆنا پارتى دێ چیته شوونا ڤالا فه‌رید وشیرین یونس ژ فراكسیۆنا ئێكه‌تیێ دێ چیته شوونا بێگه‌رد تاله‌بانى، هه‌روه‌سا هیمداد سه‌باح ژ فراكسیۆنا به‌ره‌یێ توركمانى دێ بیته په‌رله‌مانتار ل شوونا ئایدن مه‌عرووف وباپیر كامه‌لا ژ لیستا سه‌رده‌م دێ چته جهێ عه‌بدولا مه‌حموود.
ئه‌ڤرۆ نیوز ، مه‌حمود نهێلى:
قاره‌مانه‌كى جیهانى یێ له‌شجوانیێ خه‌لاتێ خوه یێ نیڤده‌وله‌تى پێشكێشی پێشمه‌رگه‌یه‌كى بریندارێ شه‌رێ داعشێ كر، كو د شه‌ره‌كێ دا هه‌ر دو پێن خوه ژ ده‌ست دابوون.
د رێ و ره‌سمه‌كى دا ، ئه‌ڤرۆ دوشه‌مبى 8/7/2019 ل ناوه‌ندا وه‌رزش و لاوێن دێره‌لۆك و ب به‌رهه‌ڤبوونا هه‌ژماره‌كا به‌رپرس و خه‌لكێ ده‌ڤه‌ێ، قاره‌مانێ له‌شجوانیێ حه‌جى رێكانى ، خه‌لاتێ خوه یێ نیڤده‌وله‌تى پێشكێشى پێشمه‌رگه‌یێ بریندار سه‌فر نێروه‌ى كر ودیاركر ئه‌ڤه وه‌ك بچووكترین دیاریه پێشكیشى پێشمه‌رگه‌یان كرى و گۆت” هه‌ر ل سه‌ر ده‌سپێكا شوره‌شێن كوردى تا شه‌رێ داعشێ و نوكه ژى پێشمه‌رگه‌ى خووین و گیانێ خوه قوربانى ئاخ و نیشتیمان و خه‌لكێ كوردستانێ كریه و ئه‌ڤى پێشمه‌رگه‌ى ژى هه‌ر دو پێن خوه به‌خشینه ئاخ و وه‌لاتێ خوه وخوه كریه قوربان ژ پێخه‌مه‌ت پاراستنا گیان و كه‌رامه‌تا مه”.
ئاماژه كر ژى كو هه‌ر ئه‌ڤه بوویه پالده‌ر بۆ وى، ئه‌و خه‌لاتێ خوه یێ نیڤده‌وله‌تى پێشكێشى ڤى پێشمه‌رگه‌ى بكه‌ت ، هه‌روه‌كو پێشكیشى هه‌موو پێشمه‌رگه‌یێن قاره‌مان كرى.
حه‌جى رێكانى د به‌ریكانا له‌شجوانیێ یا سالا 2019 كو ل وه‌لاتێ هندستانێ هاتبوو ئه‌نجامدان ب ده‌رچویێ چارێ ل سه‌ر ئاستێ جیهانێ هاته هه‌لبژارتن و هه‌روه‌سا بریاره پشكداریێ به‌ریكانه‌كا دى یا جیهانى بكه‌ت كو دێ ل دووماهیا ڤێ هه‌یڤێ ل وه‌لاتێ چینێ ل سه‌ر ئاستێ وه‌لاتێن ئاسیا هێته ئه‌نجامدان.
ئەڤرۆنیۆز هەرهین محەمەد:
رێڤەبەریا هونەرێ شێوەكاری/ گەلەریا دهۆكێ ئه‌ڤرۆ دوشه‌مبى 8/7/2019 پیشانگەهەكا شێوەكاری یا تایبەت بۆ هونەرمەندێ شێوەكار(بەدیع محەمەد تاها) ل هولا گەلەریا دهۆكێ ڤه‌كر و بۆ دەمێ 11 رۆژان دێ یا بەردەوام بیت.
هونەرمەندێ شێوەكار بەدیع محەمەد تاها بۆ ئەڤرۆ نیۆز دیاركركو ئەڤە پیشانگەها وی یا شەشێ یاتایبە تە و ژ 118 كەڤالان پێكهاتیە و پتریا كەڤالێن ڤێ پیشانگەهێ ژی دەربرینێ ژسرۆشتێ جوانێ كوردستانێ دكەن زێدەترژی گۆت: كەڤالێن ڤێ پیشانگەهی ب فرچەی نەهاتینە چێكرن و ئەڤە دبیتە پیشانگەها ئێكێ ل دهۆكێ كو كەڤالێن وی ب فرچەی نە هێنە چێكرن ودبێژنە ڤی جوری هونه‌رێ ته‌كنیكى.
ئه‌ڤرۆ نیوز:
سه‌رۆكا فراكسیۆنا پارتى دیموكراتى كوردستان ل په‌رله‌مانێ عیراقێ راگه‌هاند، ئه‌ڤرۆ راستڤه‌كرنا بودجا گشتى یا عیراقێ هاته كرن ول وێ برگا به‌حسێ پلێن تایبه‌ت دكر، ده‌مێ وێ بۆ دو هه‌یڤێن دى هاته درێژكرن وبزاڤ هاته كرن برینا شایستێن دارایى یێن هه‌رێما كوردستانێ بچیته د ناڤ به‌رنامێ كارى دا، به‌لێ ده‌نگێن پێدڤى نه‌ئینان وشكه‌ستن ئینا.
ڤیان سه‌برى، سه‌رۆكا فراكسیۆنا پارتى دیموكراتى كوردستان ل په‌رله‌مانێ عیراقێ گۆت” د كۆمبوونا ئه‌ڤرۆ یا په‌رله‌مانێ عیراقێ دا قانوونا بودجێ، برگا تایبه‌تب پلێن تایبه‌ت هاته راستڤه‌كرن وده‌مێ دو هه‌یڤان بۆ هاته درێژكرن، چونكى 30/6/2019 دووماهى ده‌مێ كاركرنا وان بوو، ئه‌ڤ چه‌نده ژى بۆ وێ ئێكێ بوو تاكو لایه‌نێن سیاسى د ڤى ده‌مى دا ل سه‌ر وان پۆستان بگه‌هنه رێككه‌فتنێ”.
ڤیانێ زێده‌تر بۆ مالپه‌رێ فه‌رمى یێ پارتى گۆت” د كۆمبوونا په‌رله‌مانى دا ل سه‌ر داخوازا په‌رله‌مانتاره‌كى داخواز هاته كرن كو برینا شایستێن دارایى یێن هه‌رێما كوردستانێ بهێته زێده‌كرن د به‌رنامێ كارى دا وئه‌و داخوازیه چو ده‌نگدانێ وژ سه‌رجه‌مێ 208 ده‌نگان تنێ 49 ده‌نگ بده‌ستڤه‌ئینان له‌وما ئه‌و بزاڤا هاتیه كرن بۆ برینا شایستێن دارایى یێن كوردستانێ شكه‌ستن ئینا”.
ئەڤرۆ نیوز ، عەلی حاجی :
جەلال ئێك ژچایچیێن دەڤەرا زاخۆیە ، زێدەتری 12 سالایە چو پەیالە نەشكاندینە و چایەكا تایبەت دورتس دكەت ، ژبەر ڤێ چەندێ پتریا كەسێن چایا وى ڤەدخون ، داخازا چایەكا دی دكەن.
ئەڤرۆ نیوز ، عەلی حاجی :
رێڤەبەریا كەمپا (بێرسڤێ دو) رابو ب ڤەكرنا پەرتوكخانەیەكێ بۆ ئاوارەێن د ناڤ كەمپا بێرسڤێ دو دا ل باژێرێ زاخۆ ، كو تێدا زێدەتری هزار پەرتوكان ب چەندین زمانان ب خوەڤە دگریت.
ماهر مشو ، رێڤەبەرێ كەمپا بێرسڤێ دو بۆ ئەڤرۆ نیوز گۆت” پەرتوكخانا گشتی یا بێرسڤێ 2 بناڤێ ئەمیرا شنگالی هاتیە بناڤ كرن كو پشتی كچەكا خوە بەخش د ناڤ كەمپا مە دا هزر ل دانانا پەرتوكخانەیەكا ب ڤی رەنگی كر ، لەورا وەكو رێڤەبەریا كەمپێ مە پشتەڤانی ل ڤێ هزرێ كر و رابوین ب ڤەكرنا پەرتوكخانا ناڤبری دناڤ كەمپێ دا و ئەو پەرتوكخانە هەر ب ناڤێ وێ كچێ هاتە بناڤكرن”.
گۆت ژى” دناڤ پەرتوكخانێ دا زێدەتری 1400 پەرتوكان یێن هه‌ین و ئەو پەرتوك ب سێ زمانان هەنە، مە ئەڤ پێنگاڤە ژبەر وێ چەندێ هاڤێژت گەلەك جاران ئاوارەیێن كەمپێ بۆ كرینا په‌رتوكەكێ دا قەستا زاخۆ كەن ، بەلێ د نوكە دا دشێن پەرتوكێ دناڤ كەمپێ ب دەست خوەڤە بینن”.
خویاكر” بۆ ئێكەم جارە دناڤ كەمپێن ئاوارەیان دا ل باژێرێ زاخۆ پەرتوكخانەیەكا گشتی بهێتە ڤەكرن ، كچەكا خوەبەخش دناڤ كەمپێ دا دێ رابیت ب رێڤەبرنا وێ پەرتوكخانێ ، پەرتوك دێ بێ بەرامبەر ب خواندەڤانا هێتە دان و جهەكێ تایبەت ژی بۆ خواندنێ هاتیە تەرخان كرن و خواندەڤان هەتا دشێن پەرتوكێ دگلە خوە بەنە مالێ “.
نيشاندان