ئەڤرۆ نیوز:
دۆنالد ترامپ سەرۆکێ ئەمریکا ئەڤرۆ راگەهاند کو ژ بۆ هێرشکرنا ل سەر ئیرانێ ئەز پێدڤی ب رزامەندیا کۆنگریسێ ئەمریکا نینم و قانوونێن ئەمریکا ئەو دەستهەلاتە دایە من کو فەرمانا هێرشا سەربازی ل دژی ئیرانێ بدەم.
ترامپی ئەو یەک ژی دیار کر کو بەری نها من گۆتیە جارێ مە نەڤێت شەرێ ئیرانێ بکەین و مە دڤێت ئیرانێ نەچار بکەین کو هەلویستێ خوە بگوهۆریت و بۆ دانوستاندنان بەرهەڤ بیت، بەرۆڤاژی هندێ ئەز دشێم بێی رزامەندیا کۆنگرێسی ژی فەرمانا شەری بدەم.
ئەڤرۆ نیوز:
ئەڤرۆ مەسرور بارزانی راسپاردی بۆ پێکئینانا کابینا نوو یا حوکمەتا هەرێما کوردستانێ پێشوازی ل شاندەکێ بازرگانی یێ ئەمریکا ب سەرۆکاتیا ستیڤ لوتەس جێگرێ سەرۆکێ ژوورا بازرگانی یا ئەمریکا کر.
د هەڤدیتنێ دا مەسرور بارزانی کەیفخوەشیا خوە ل هەمبەر سەرەدانا شاندێ ئەمریکی دیار کر و راگەهاند کو ئەو یەک پێنگاڤەکا گرنگە بۆ پێشڤەچوونا پەیوەندیێن ئابووری د ناڤبەرا ئەمریکا و هەرێما کوردستانێ دا. کۆمپانیێن ئەمریکا دشێن کارێن مەزن د بیاڤێ وەبەرهێنانێ ل هەرێما کوردستانێ بکەن.
شاندێ ئەمریکی ژی سوپاسیا مەسرور بارزانی کر و هێڤیا سەرکەفتنێ بۆ وی خواستن و دیار کرن کو هێڤیدارین پەیوەندیێن ئابووری یێن هەرێما کوردستانێ و ئەمریکا باشتر لێ بهێن.
ئەڤرۆ نیوز:
جان ئێف لودریان وەزیرێ دەرڤە یێ فرەنسا راگەهاند کو دڤێت ئیران پێگیریێ ب رێککەفتنا ئەتۆمی بکەت و رێککەفتنێ پێشیل نەکەت. چونکو ئەو یەک دێ بیتە ئەگەرێ مەترسیەکا دی یا مەزن ل سەر ئیرانێ و د بەرژەوەندیا وی وەلاتی دا نینە.
وەزیرێ دەرڤە یێ فرەنسا هۆشداری ژی دا ئیرانێ کو دەست ب کارەکێ نەکەت کو ببیتە ئەگەرێ هندێ بەرەیەکێ بهێز ل دژی وی وەلاتی دروست ببیت.
ئەڤرۆ نیوز:
کای بایلی نوونەرا ئەمریکا ل ناتۆیێ راگەهاند کو دەمێ تورکیا سیستەمێ مۆشەکی ژ روسیا بکڕیت دێ وی وەلاتی ژ بەرنامێ فرۆکێن ف٣٥ دەرخینین و ب چو رەنگەکێ مافێ تورکیا نابیت وان فرۆکان بکڕیت.
ناڤهاتیێ راگەهاند تورکیا ئەندامەکا ئەکتیف یا ناتۆیێ یە و نابیت چەکێن روسی بکڕیت، مە بەری نها هۆشداری دابوو تورکیا لێ مخابن هەتا نها ژی تورکیا ل سەر هەلویستێ خوە بەردەوامە.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 25ى خزيرانا 2019ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 100 دولارێ ئه‌مريكى | 120.300 دينار |
| 100 يۆرۆيێ ئه‌ورۆپى | 135.000 دينار |
| 100 ليرێ توركى | 20.500 دينار |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئەڤرۆ نیوز، عەلی حاجی:
ئەڤرۆ رۆژا سێشەمبێ رێکەڤتی ۲۵ى خزيرانا ۲۰۱۹ ل دەمژمێر ۸:۳۰ی سپێدێ ل سەر رێیا ئیبراھیم خەلیل، ترۆمبێلەکێ خوە ل دو کەسان دا، کەسەکێ گیانێ خوە ژدەست دا و کەسەک ژى بریندار بوو.
ل دۆر ڤێ چەندێ ئەمیر عەلی، بەرپرسێ راگەھاندنا ساخلەمیا زاخۆ بۆ ئەڤرۆ نیوز ئاشکەرا کر كو ئەڤ روودانە ل دەمژمێر ۸:۳۰ى سپێدەھیا ئەڤرۆ ل سەر رێیا ئیبراھیم خەلیل روودایە، دەما ترۆمبێلەکێ خوە ل کچەکێ و دایکا وێ دايى، د وێ روودانێ دا کچێ گیانێ خوە ژ دەست دا و دایکا وێ ژی بریندار بوو، پشتی ئەو ژن بۆ نەخوشخانێ هاتيه ڤەگوھاستن رەوشا وێ بەرەڤ باش بوونێ ڤە چوویە و د نها دا ل بن چاڤدێریا نوشداران دایە.
ب گورەی پێزانینان ژی ل رۆژا ئێکشەمبى رێکەڤتی ۲۳ى خزيرانا ۲۰۱۹ ل سەرێیا گرشینێ ژ ئەگەرێ لێکدانێ د ناڤبەرا ترۆمبێلەکا بارھەلگر پیک ئاپەکێ کەسەکى گیانێ خوە ژ دەست دا و کەسەکێ دی ب گرانی بریندر ببوو.
ئه‌ڤرۆ نيوز:
د روودانه‌كا هاتنوچوونێ دا، ئه‌بۆ كاروان، ئه‌ندامێ كۆميتا ناڤه‌ندى يا حزبا شيوعى يا كوردستانێ بريندار بوو.
ئه‌بۆ كاروان ئه‌ندامێ به‌رێ يێ په‌رله‌مانێ كوردستانێ د رێيا گشتى يا ناڤبه‌را هه‌ولێر – سلێمانيێ و ل نێزيك به‌نداڤا سماقوولى تووشى روودانه‌كا هاتنوچوونێ بوو و ترۆمبێلا وى وه‌رگه‌ريا.
شوانه حه‌سه‌ن، ئه‌ندامێ كۆميتا ناڤه‌ندى يا حزبا شيوعى يا كوردستانێ ده‌رباره‌ى روودانێ بۆ كوردستان 24 راگه‌هانديه كو ئه‌بۆ كاروان يێ بريندار و ره‌وانه‌ى نه‌خۆشخانا سلێمانيێ كريه و ره‌وشا وى يا ساخله‌ميێ يا بنه‌جهه.
ئه‌ڤرۆ نيوز، نيوار محه‌مه‌د سه‌ليم:
دادگه‌ها تاوانان ل دهۆكێ بڕيارا سێداره‌دانێ ئه‌ڤرۆ رۆژا سێشه‌مبى 25ى خزيرانا 2019ێ بۆ بكۆژێ دلين وه‌ليد ده‌رخست و بڕيارا برايێ وێ ژى دێ ب ره‌نگه‌كێ دى بيت.
زنار زوبێر، په‌يامنێرێ ئه‌ڤرۆ نيوز ل دادگه‌ها تاوانان ل دهۆكێ دياركر كو ئه‌ڤرۆ دادگه‌ها تاوانان ل دهۆكێ ب گۆره‌يى ماددێ 406 يا قانوونا سزايێن عيراقێ، بڕيارا سێداره‌دانێ بۆ بكوژێ دلين وه‌ليد ده‌رخست.
زنار زوبێر دا زانين ژى كو تاوانبارى ل به‌رامبه‌ر دادگه‌هێ و پێشتر ژى ل هه‌مبه‌ر دادوه‌رێ ڤه‌كۆلينێ دانپێدان ب تاوانا خوه كريه و ئاشكه‌را كريه كو يێ سه‌رخۆش بوويه و ئاگه‌هـ ژ خۆ نه‌مايه، به‌لێ دادوه‌رى ئه‌و چه‌نده ره‌تكر ب به‌هانه‌يا وێ چه‌ندێ كو كه‌سه‌كێ سه‌رخۆش نه‌شێت وه‌سان ژينگه‌هه‌كا باش ب هه‌لبژێريت و كاره‌كێ وه‌سان ژ دوورى هه‌موويان ئه‌نجام بده‌ت.
ده‌رباره‌يى روودانا برايێ وى ژى كو ئاگه‌هـ ژ تاوانێ هه‌بوويه و خوه بێ ده‌نگ كريه ل سه‌ر تاوانێ، زنار زوبێر ئاشكه‌را كر كو ئه‌وى ئاشكه‌را كر كو گه‌فێن كوشتنێ لێ هاتينه كرن دا كو وێ چه‌ندێ ئاشكه‌را نه‌كه‌ت، به‌لێ د دانپێدانێن خوه دا، بكوژێ دلينێ گۆت: “من گه‌فێن كوشتنێ ل برايێ خوه نه‌كرينه”.
هێشتا يا ديار نينه، كا دێ چ سزا بۆ برايێ بكوژى ده‌ركه‌ڤيت، به‌لێ ب گۆره‌ى قانوونێ، نابيت ئه‌و كه‌س بهێته ئازاد كرن ژ به‌ر كو ڤه‌شارتنا تاوانێ ژى تاوانه.
دلين وه‌ليد يا 10 سالى، ئێڤاريا رۆژا 5ى خزيرانا 2019ێ ل نێزيك مالا خوه ل سه‌نته‌رێ باژێرێ دهۆكێ به‌رزه ببوو، پشتى سێ رۆژان ته‌رمێ وێ د ناڤ باغه‌كى دا ل نێزيك ياريگه‌ها دهۆك هاته ديتن و پاشان ژى پۆليسان كه‌سه‌ك ب تۆمه‌تا كوشتنا وێ ده‌سته‌سه‌ركربوو.
لاشێ دلينێ ب ره‌نگه‌كێ هاتبوو تێكدان، چار رۆژان ته‌رمێ وێ ل نوشداريا داد يا دهۆكێ بوو، پاشان ژى ل 12ى خزيرانا 2019ێ راده‌ستى خێزانا وێ هاته كرن.
هه‌ر چه‌نده گۆمانا وێ چه‌ندێ دهاته كرن كو ده‌ستدرێژيا سكسى كربيته سه‌ر وێ زارۆيێ، به‌لێ تاوانبارى ئه‌و چه‌نده ره‌تكر و ئاشكه‌را كر كو ئه‌وى بزاڤێن وێ چه‌ندێ كرن، به‌لێ نه‌هێلا و ژ ترسا ئاشكه‌را بوونێ ب داره‌كى ژ په‌رژانێ باغى كوشت كو ب ره‌نگه‌كى بزاڤا سه‌رژێكرنا وێ كرببوو.
ئه‌ڤرۆ نيوز:
ئه‌ڤرۆ ل باژێرێ ڤییه‌نا ل وه‌لاتێ نهمسا، د.شه‌ونم ئه‌حمه‌د وه‌یس، نوشدارا تایبه‌تمه‌ند یا نه‌خۆشیێن ژنان و زارۆبوونێ وه‌غه‌ر كر.
د.شه‌نم ئه‌حمه‌د وه‌یس، ل سالا 1965 ێ ل باژێرێ به‌غدا ژدایكبوویه و ل سالا 1988 باوه‌رناما به‌كالوریوس ب نوشداریا گشتی ل زاكۆیا مووسل ب ده‌ستڤه‌ئینابوو.
ئێكه‌م دامه‌زراندنا وێ وه‌كو نوشدار ل سه‌ر میلاكێ رێڤه‌به‌ریا گشتی یا ساخله‌میا پارێزگه‌ها كه‌ركووكێ بوویه و پاش ل سالا 1997ێ هاتیه ڤه‌گوهاستن بو پارێزگه‌ها دهۆكێ وه‌كو ماموستا ل كولیژا پزیشكی یا زانكۆیا دهۆك و نوشدارا تایبه‌تمه‌ند یا نه‌خۆشیێن ژنان و زارۆبوونێ ل نه‌خۆشخانا ئازادی یا گشتی یا فێركرنێ و پشكێن نه‌خۆشیێن ژنان و زارۆبوونێ درێژی ب خزمه‌تا خوه دایه و خزمه‌ته‌كا مه‌زن پێشكێشی نه‌خۆشێن ژن ل پارێزگه‌هێ ب گشتی كریه.
پشتی ژلایێ كۆمه‌لا جیهانی یا نه‌خۆشیێن ژنان و زارۆبوونێ هاتیه داخوازكرن بو پشكداریكرنێ د كونفرانسه‌كێ نێڤده‌وله‌تی دا ل وه‌لاتێ نهمسا، ئه‌ڤرۆ سپێدێ ب مخابنیڤه ژ نشكه‌كێڤه گیانێ خوه ژده‌ست دده‌ت.
ژێده‌ر: نوش نيوز
نيشاندان