ئه‌ڤرۆ نيوز:
نوونه‌راتیا حوكمه‌تا هه‌رێما كوردستانێ‌ ل به‌غدا هاته‌ كاراكرن  و كه‌سه‌كێ‌ نوو بۆ وى پۆستى هاته‌ دیاركرن، هه‌بوونا وێ‌ نوونه‌راتیێ‌ ل به‌غدا، بۆ هه‌رێما كوردستانێ‌ گرنگیا خوه‌ هه‌یه‌، ودێ‌ بیته‌ ئه‌گه‌رێ‌ هندێ‌ په‌یوه‌ندیێن د ناڤبه‌را هه‌ردو ئالیان پتر گرنگیا خوه‌ هه‌بیت.
سه‌رۆكا فراكسيۆنا پارتی دیموكراتی كوردستان ل په‌رله‌مانێ‌ عیراقێ‌ ڤیان سه‌بری راگه‌هاند، نوونه‌راتیا حوكمه‌تا هه‌رێما كوردستانێ‌ به‌ری نوكه‌ ل به‌غدا هه‌ر هه‌بوو، به‌لێ‌ نوكه‌ حوكمه‌تا هه‌رێمێ‌ ئه‌و نوونه‌راتی كاراكر و به‌رپرسه‌كێ‌ نوو ب ناڤێ‌ ( فارس عیسا) بۆ وى پۆستێ‌ هاتیه‌ دیاركرن، نوكه‌ ده‌ست ب كارێ خوه‌ ژی كریه‌، كو ئه‌و ب خوه‌ خه‌لكێ‌ پارێزگه‌ها دهوكێ‌ یه‌.
ڤیان سه‌بری گۆت ژى: هه‌بوونا وێ‌ نوونه‌راتیێ‌ بۆ هه‌رێما كوردستانێ‌ گه‌له‌ك یا گرنگه‌، چونكی پره‌كا په‌یوه‌ندیان د ناڤبه‌را هه‌رێما كوردستانێ‌ و به‌غدا دروست دكه‌ت، ودێ‌ بیته‌ ئه‌گه‌رێ‌ هندێ‌ ئه‌و په‌یوه‌ندیێن د ناڤبه‌را هه‌ردو ئالیاندا پتر پێشڤه‌برنێ‌ ب خوه‌ ڤه‌ ببینن و گرنگيه‌كا پتر پێ‌ بهێته‌ دان.

ئه‌ڤرۆ نيوز:

سه‌قاناسه‌كێ عيراقى پێشبينيێ دكه‌ت پاييزا ئه‌ڤ ساله‌ پترين رێژا بارانێ ل عيراقێ وده‌ڤه‌رێ ب گشتى بباريت وپێشبينيێ دكه‌ت ل هه‌مان وه‌رز هشكه‌سالى بيت ل ناڤه‌راست ورۆژئاڤايێ ئورۆپا.

سادق عه‌تيه‌، سه‌قاناسێ ناڤدارێ عيراقى د پۆسته‌كێ دا ل به‌رپه‌رێ خوه‌ يێ فه‌يسبووكى پێشبينيێ دكه‌ت پاييزا ئه‌ڤ ساله‌ رێژه‌كا مه‌زن يا بارانێ عيراقێ وده‌ڤه‌رێ ڤه‌گريت.

عه‌تيه‌ دبێژيت” نوكه‌ ره‌وشا سه‌قاى ل باكوورێ ئه‌تله‌سى د بارۆده‌خه‌كێ نێگه‌تيڤ دايه‌ وپێشبينى دهێته‌ كرن ئه‌و ره‌وشه‌ ل وه‌رزێ پاييزێ ژى به‌رده‌وام بيت، ئه‌ڤه‌ ژى رامانا وێ ئه‌وه‌ ل ناڤه‌راست ورۆژئاڤايێ ئورۆپا هشكه‌سالى بيت، ل باشوورێ وى كێشوه‌رى ژى رێژا شه‌هێ دێ بلند بيت، به‌لێ ژ به‌ر زالبوونا بلنداهيێن (بلۆك) كو پێك دهێن ژ چيايێن ئه‌تله‌سى كو ب (ئه‌زوورى) د به‌رنياسن ود كه‌ڤنه‌ ناڤه‌راست ورۆژئاڤايێ ئورۆپا، نزمه‌ پاله‌پستۆيه‌ك دێ به‌ر ب ده‌ڤه‌را مه‌ ڤه‌ هێت”.

وى سه‌قاناسێ عيراقى گۆت ژى” هه‌كه‌ ئه‌و سيناريۆيه‌ به‌رده‌وام بيت، دێ ده‌ڤه‌را مه‌ كه‌ڤيته‌ د ناڤ پاييزه‌كا پر باران دا”.

ئه‌ڤرۆ نیوز:

رێڤه‌به‌رێ فه‌رمانگه‌ها كۆمسیۆنا هه‌لبژارتن وراپرسى ل پارێزگه‌ها هه‌ولێرێ راگه‌هاند، كۆمسیۆن ب رێیا چه‌ند لژنێن خوه‌ڤه‌ ل پارێزگه‌هان مژوولى رێكخستن وپێداچوونا لیستێن تۆمارا گشتى یا ده‌نگده‌رانه‌، چه‌ند كۆمبوون یێن هاتینه‌ ئه‌نجامدان وبۆچوون وپێشنیازێن گرنگ هاتینه‌ به‌رچاڤكرن، كو د قۆناغا داهاتى دا دێ هه‌لسه‌نگاندنێ  بۆ پێشنیازان كه‌ین.

ئارام برادۆستى، رێڤه‌به‌رێ فه‌رمانگه‌ها كۆمسیۆنا هه‌لبژارتن وراپرسی ل هه‌ولێرێ زێده‌تر بۆ مالپه‌ری فه‌رمیێ پارتى گۆت” كۆمسیۆن یا هووربینیێ وڤه‌كۆلینێ بۆ چار بژارده‌یان دكه‌ت بۆ وێ چه‌ندێ بگه‌هن بۆ تۆماره‌كا پاقژ ودروست ودوور ژ هه‌موو جۆره‌ كێشه‌ وگرفته‌كا ته‌كنیكى ومه‌یدانى، ئه‌و بژارده‌ ژى پێك دهێن ژ، پشت به‌ستنێ ب كارتا نیشتمانى یا عیراقى، سیسته‌مێ بایۆمه‌تریێ مووچێن فه‌رمانبه‌رێن هه‌رێمێ، تۆمارا گشتیێ ده‌نگده‌رێن عیراقێ، یان ژى سه‌ر ژنوو دروستكرنا تۆماره‌كا دى یا ده‌نگده‌ران بۆ هه‌لبژارتنێن داهاتى، ئه‌ڤه‌ ژى پێدڤى ب بودجه‌كا مه‌زن ولایه‌نێ ته‌كنیكى یا هه‌ى، دبیت د ده‌مێ پێدڤى دا به‌رهه‌ڤ نه‌بیت”.

گۆت ژى” بۆ هه‌ر هه‌لبژارتنه‌كێ ل هه‌رێما كوردستانێ، كۆمسیۆنێ پێدڤى ب شه‌ش هه‌یڤێن به‌رهه‌ڤیێ هه‌یه‌، بۆ وێ چه‌ندێ ژ هه‌موو روویه‌كى ڤه‌ كۆمسیۆن ب باشى یا به‌رهه‌ڤ بیت”.

دیاركر” د بزاڤێ داینه‌ كو كۆمسیۆنا بلند یا هه‌رێمێ ببیته‌ خودان تۆماره‌كا بێ گرفت وجهێ رازیبوونا هه‌موو لایه‌نێن سیاسى وهه‌موو خه‌كێ هه‌ریما كوردستانێ بیت”.

ئاماژه‌ كر ژى”مه‌ پلان یا هه‌ى سیسته‌مێ هه‌لبژارتنێن هه‌رێما كوردستانێ هه‌ڤشێوێ وه‌لاتێن پێشكه‌فتى، به‌لكو زێده‌تر ژى بلند بكه‌ین وسیسته‌مێ ئه‌لكترۆنى بكاربینین و پێشبینیێ دكه‌ین سالا 2026 هه‌لبژارتنێن هه‌رێما كوردستانێ ب سیسته‌مێ ئه‌لكترۆنى یێ پێشكه‌فتى بهێنه‌ ئه‌نجامدان”.