شازده‌ سالێن پرى كار و خزمه‌تا راگه‌هاندنێ و رۆشه‌نبیرى و زمان وكه‌لتۆرێ ده‌ڤه‌رێ ژلایێ خه‌باتكارێن رۆژناما ئه‌ڤرۆ ڤه‌ پیروز دكه‌ین و ده‌ستى وان هه‌موو هه‌ڤالان دگڤێشین كو دڤان سالان دا بێ ماندیبوون وه‌كو پێشمه‌رگه‌ به‌رپه‌رێن رۆژنامێ زه‌نگین كرین ب نڤیسین و وێنه‌ ونه‌خشێن خوه‌یێن پر بها، سوپاس بو وان خه‌باتكاران چو د به‌رده‌وامبن یان ژى ژ هه‌ر ئه‌گه‌ره‌كى نها دگه‌ل مه‌دا نه‌ مابن.

ل بیره‌وه‌ریا هه‌لكرنا مۆما 17ێ یا كارێ رۆژناما ئه‌ڤرۆ كو به‌رده‌وامیا (10) سالێن خه‌باتا هه‌فتیناما په‌یمان بویه‌ ، پێ نه‌ڤێت باس ل كار و خزمه‌تا بۆرى بكه‌ین، به‌لكو یا فه‌ره‌ نێرینه‌كا كورت ل سه‌ر نها وپاشه‌رۆژێ بكه‌ین ب تایبه‌ت د كاودانه‌كى دا كو رۆلێ رۆژناما كاغه‌زى د مه‌یدانا راگه‌هاندنێ دا به‌رف پاش چوویه‌ وپتر رۆژنامه‌گه‌ریا ئه‌لكترونى هاتیه‌ مه‌یدانێ.

نه‌ یا ڤه‌شارتى یه‌ كو تیراژێ رۆژنامێ د ڤان سالاندا كێم بوویه‌ وه‌كو چاپكریا كاغه‌زى، لێ دیسان به‌لاڤرنا (2000) دانه‌ رۆژانه‌ و گه‌هشتنا وێ بۆ پرانیا مال وجهێن كارى ل سه‌رانسه‌رى ده‌ڤه‌رێ وه‌كو تاكه‌ رۆژناما رۆژانه‌ ب كرمانجى و دناڤ ڤێ قه‌یرانا داراى وكاودانێن دژوار دا ب خوه‌راگریا ستاف و نڤیسه‌رێن رۆژنامێ بوویه‌ و نیشانا گرێدانا خه‌لك و رۆشه‌نبیرانه‌ ب وان ئه‌ركێن رۆژناما ئه‌ڤرۆ پێشكێش دكه‌ت، له‌ورا به‌رده‌وامى بوون پركرنا ڤالاتیه‌كێ یه‌ كو كوردستان ب گشتى و ده‌ڤه‌را به‌هدینان ب تایبه‌ت ژێ دنالن، له‌ورا به‌رده‌وامى بوون ئه‌رك وحه‌ز وهیڤیا مه‌یه‌.

د ناڤ ڤێ هه‌ڤركیا گه‌هاندنا پێزانیان دا كو ته‌كنولوجیایێ شێواز و كه‌توار گوهارتیه‌ ژمه‌ ژى دهێت خاستن نووكرنا و به‌رهه‌ڤیێن هه‌ژى بكه‌ین له‌ورا ئه‌م ب ئومێدین رۆژناما ئه‌ڤرۆ چ وه‌كو ناڤه‌رۆك یان ژى شێوازێ گه‌هاندنێ ل ئاستى َ ته‌كنكیا نوو و هه‌ڤركیا راگه‌هاندنا بله‌ز بیت، ژ بووى ڤێ چه‌ندێ زێده‌بارى به‌رده‌وامیا ده‌ركه‌فتنا رۆژناما كاغه‌زى ئه‌م دێ كار كه‌ین ل سه‌ر به‌رده‌ست كرنا پێزانینێن رۆژنامێ ب شێوازێن ئه‌لكترونى ل سه‌ر سایت ومالپه‌رێن ئه‌لكترونى كو ب زووترین ده‌م و جوانترین شێواز د خزمه‌تا خانده‌ڤایێ خوه‌یێ هێژا دا بین.

رێبه‌ر فتاح، سه‌رنڤيسكارێ رۆژناما ئه‌ڤرۆ

ئەڤرۆ نیوز، عەلی حاجی:‏

پشتی زێدەتری سالەکێ ب رێیا نڤێساران ھەرێمداریا زاخۆ، داخازا ڤەکرنا رێڤەبەریەکا پاسەپورتان دکر، ‏ب شێوەیەکێ فەرمی ب رێیا وەزارەتا ناڤخو رازیبون ل سەر ڤەکرنا رێڤەبەریا ناڤبری ل باژێرێ زاخۆ ھاتە ‏دەر کرن .‏

دیدندار حسێن، ژ ھەرێمداریا زاخۆ بۆ ئەڤرۆ نیز دیار کر زێدەترە ژ سالەکێ ھەرێمدارێ زاخۆ داخاز کر ‏بوو ، رێڤەبەریا پاسەپورتان ل باژێرێ زاخۆ بھێتە ڤەکرن ، ئەڤرۆ ل روژا سێ شەمبێ دپەیوەندیەکا ‏تەلەفزنی دا رێڤەبەریا گشتی یا پاسەپورتان ل پارێزگەھا دھوکێ دیار کر ، رێڤەبەرێ گشتیێ ناسنامە ‏و پاسەپورتان ل وەزارەتا ناڤخویا حکومەتا ھەرێما کوردستانێ رەزامەندی ل سەر وەرگرتنا ڤەکرنا ‏رێڤەبەریا پاسەپورتان وەرگرتیە ، پێدڤی یە ددەمەکێ نێزیک دا ئەو رێڤەبەری ل باژێرێ زاخۆ بھێتە ‏ڤەکرن و ئێدی ھاولاتیێن دەڤەرێ قەستا باژیٍَرێ دھوکێ نەکەن بۆ دەرئینانا پاسەپورتان.‏

ناڤھاتی گوت ژی : دنوکە دا ئاڤاھیەک ژلایێ ھەرێمدارێ زاخۆڤە بوتان محسن ھاتیە دەست نیشان کرن ‏بۆ رێڤەبەریا پاسەپورتان،دنوکە دا دێ کار ل سەر نووژەنکرنا وی ئاڤاھی ھێتەکرن ، ئەڤ ئاڤاھیە دێ ب ‏شێوەیەکێ دەمکی بیت ، ھەتا کو ل گورەی رێنمایێن وەزارەتا ناڤخویا عێراقێ ئاڤاھیەکێ نوو بۆ وێ ‏رێڤەبەریێ بھێتە ئاڤا کرن کو پشتی رەزامەندی ل سەر ئاڤاکرنا ئاڤاھیێ رێڤەبەریا پاسەپورتان بھێتە دان ‏و ڤەکرنا رێڤەبەریا ناڤبری ژی ب ھەول و دیفچوونا بەردەواما ھەرێمدارێ زاخۆ بویە و بەردەوام دیفچوونا ‏بابەتی دکر.‏

ئه‌ڤرۆ نیوز:

ده‌مه‌كێ كێم به‌رى نوكه‌ فروكێن شه‌رى یێن توركیا دوو ترومبێلێن گه‌ریلایێن پارتا كرێكارێن كوردستانێ “په‌كه‌كێ” كرنه‌ ئارمانج و ب دژوارى بوردومانكرن، ب گوره‌ى پێزانینێن ئه‌ڤرۆ نیوز ترومبێله‌ك سوتیه‌ و ئێك ژى ژكارئێخستیه‌.

ژێده‌ره‌كێ ل نێزیك روودانێ بۆ ئه‌ڤرۆ نیوز گۆت: (ده‌مه‌كێ كێم به‌رى نوكه‌ فروكێن شه‌رى یێن توركیا بو ئێكه‌مجار گوندێ پیروزانا یا سه‌ر ب سه‌نته‌رێ قه‌زا ئامێدیێ بردومانكر و بوردومانكرنا وێ ژى ب ئارمانجگرتنا ترومبێلێن په‌كه‌كێ بو).

زێده‌تر گۆت: (د وێ بوردومانێ دا دوو ترومبێلێن په‌كه‌كێ كه‌فتینه‌ به‌ر بوردومانێ و ترومبێله‌ك سوتیه‌ و ئێك ژى ژ كارئێخستیه‌، به‌لێ هه‌تا نوكه‌ چ پێزانین لسه‌ر قوربانیێن ناڤا بوردمانێ نینن).

ناڤبرى دیاركر ژى كو نوكه‌ بوردومانێن توركیا بو ده‌ڤه‌رێن ئاڤه‌دانى هاتیه‌ گوهرین و خواست كو جهێن شوله‌ژێ كار بكه‌ن بو راگرتنا بوردومانێن توركیا بو سه‌ر گونده‌وارێن وان.