ئەڤرۆ نیوز:
راپورتێن رۆژنامەڤانی ل ئەلمانیا ئاشکراکرینە ھێرشبەرێ کرواتی و یانا یوڤانتوس یا ئیتالی ماریو ماندزوکیتچ نێزیکی ئیمزاکرنا ھەڤبەستا یانا بایرن میونیخ بوویە پشتی یانا یوڤانتوس ئەو یاریزانێ خوە ئاگادارکری دەرگەھێ چوونێ بۆ ئەوی یێ ڤەکریە ل ڤەگوھاستنێن ھاڤینا ئەڤ سالە.
ھەژی گوتنێ یە ماریو ماندزوکیتچ بەری نوکە بۆ ماوێ دو سالان یاری ل یانا بایرن میونیخ کربوو ئەوژی ژ ٢٠١٢ ھەتا ٢٠١٤ و پشکداری د ٥٥ یاریان دا کربوو و شیابوو ٣٣ گولان ل گەل وێ یانا باڤاری توماربکەت.
ئەڤرۆ نیوز:
پشتی ستێرا بەرازیلی و یانا پاریس سانجێرمان نیمار بەرپرسێن یانا خوە ئاگادارکرین ئەو ناخوازیت بۆ وەرزێ نوو ڤەگەریتە وێ یانێ و دخوازیت جارەکا دی ڤەگەریتە یانا خوە یا بەرێ بەرشەلۆنا.
رۆژناما سپورت یا ئیسپانی دیارکریە بەرپرسێن یانا پاریس سانجێرمان دەست ب لێگەریانا یاریزانەکێ نوو کریە وەکو پێگوھورێ نیماری پشتی وی یاریزانی دیارکری ئەو ناخوازیت بۆ وەرزێ نوو ل گەل وێ یانێ یێ بەردەوام بیت.
ھەردیسان ئەوێ رۆژنامێ دیارکریە ژی بەرپرسێن یانا پاریس ستێرا ئەلمانی و یانا مانچێستەر سیتی لیرو سانی وەکو بەربژارێ سەرەکی دەست نیشانکریە ل جھێ نیماری .
ئەڤرۆ نیوز:
یانا مانچێستەر یوناید ژ ترسا چوونا ستێرا خوە یا فرەنسی پول پوکپا ل ڤەگوھاستنێن ھاڤینا ئەڤ سالە دخوازیت ھەڤبەستێ ل گەل یاریزانەکێ نوو ئیمزا بکەت .
مالپەرێ سکای سپورتیس دیارکریە ی یانا مانچێستەر یوتاید ل سەر ئینانا پێگوھورێ پوکپای خوە جە بوویە ھەکو ئەوی یاریزانی ل ڤەگوھاستنێن ھاڤینا ئەڤ سالە پێکھاتیێ وێ یانێ ب جە ھێلا کو ئەوژی یاریزانێ سربی و یانا لازیۆ میلینکوڤیتچ ساڤیتیچ .
ھەردیسان وی مالپەری دیارکریە ژی مان یوناید کوژمێ ٧٢ ملیون جێنێ ئیسترلینی بۆ ڤەگوھاستنا ئەوی یاریزانی بەرھەڤکرینە لێ سەرۆکێ یانا لازبۆ داخوازیا ٩٠ ملیون جێنێ ئیسترلینی دکەت .
ئه‌ڤرۆ نیوز:
فه‌رهاد ئه‌مین ئه‌تروشى پارێزگه‌رێ دهوكێ ئەڤرۆ پێشوازیا خانم ( حمیده ره‌مه‌دانى ) رێڤه‌به‌را گشتى یا رێكخراوا یونسێف (UNICEF)ل ئیراقێ وشاندێ دگه‌لدا كر.
دهه‌ڤدیتنه‌كێدا به‌حسێ به‌رنامێن رێكخراوا یونسێف ل عیراقێ ب گشتى ول هه‌رێما كوردستانێ ول پارێزگه‌ها دهوكێ ب تایبه‌تى هاته كرن.
دته‌وه‌ره‌كێ دن به‌حسێ پلانا پێنچ سالى یا رێكخراوا یونسێف دبیاڤێ پشته‌ڤانیكرنا زاروك و ژنان وپروژێن ئاڤێ ب گشتى هاته كرن.
رێڤه‌به‌را گشتى یا رێكخراوا یونسێف (UNICEF)ل عیراقێ سوپاسیا پارێزگه‌رێ دهوكێ وهه‌موو سازیێن په‌یوه‌ندیدار یێن پارێزگه‌ها دهوكێ كر كو به‌رده‌وام هه‌ڤكاریێ دگه‌ل تیمێن یونسێف دكه‌ن وژبه‌ر وێ هه‌ماهه‌نگیێ به‌رنامێن رێكخراوا یونسێف بره‌نگه‌كێ سه‌ركه‌فتیانه ل دڤه‌رێ دهێنه بجه ئینان.
پارێزگه‌رێ دهوكێ خوشحالیا خو ب سه‌ره‌دانا شاندێ رێكخراوا یونسێف (UNICEF) دیاركر وده‌ست خوشى ل تیمێن رێكخراوێ كر ئه‌وێن كار وپروژێن جودا جودا ل سنورێ پارێزگه‌هێ بجه دئینن تایبه‌تى پروژێن گرێداى ب ژن وزاروكان و په‌ره‌پێدانا پروژێن ئاڤێ وخواست كو رێكخراوا یونسێف (UNICEF) قه‌بارێ پروژێن خو ل سنورێ پارێزگه‌هێ به‌رفره‌ه بكه‌ت وپشته‌ڤانیا پارێزگه‌هێ نیشان دا بو هه‌ر هه‌ڤكاریه‌كێ .
ئه‌ڤرۆ نیوز:
ل دور چاره‌سه‌ری و سۆتنا به‌رمایكێن نوشداری ل نه‌خۆشخانێن تایبه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ و رێڤه‌به‌رێ ژینگه‌ها دهۆكێ كۆمبونه‌ك دگه‌ل نوونه‌رێن نه‌خۆشخانێن تایبه‌ت گرێدا.
د.نزار عصمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو پشتی دووڤچوون هاتیه كرن وه‌سا دیاره به‌رمایكێن نه‌خۆشخانێن تایبه‌ت ب شێوه‌یه‌كێ زانستی ناهێنه چاره‌سه‌ركرن و سۆتن و گۆت: ئه‌و به‌رمایك پێكهاتینه ژ كه‌رستێن كیمیاوی و بایولوجی كو دناڤ ( ده‌رمانێن ب كارهاتی و ئێكسپایر، ده‌رزیك و كه‌رستێن تاقیگه‌هان و نشته‌رگه‌ریان) دا هه‌نه، پێدڤیه ژێك بهێنه ڤارڤارتن و د زه‌رفێن تایبه‌ت دا بهێنه هه‌لگرتن و نابیت دگه‌ل به‌رمایكێن گشتی بهێنه تێكه‌لكرن، چونكو كارتێكرنه‌كا راسته‌وخو ل سه‌ر ژینگه‌هێ و ساخله‌میا مرۆڤان هه‌یه و بو ڤێ چه‌ندێ پێدڤیه رۆژانه بهێته كۆمكرن و ل سوتنگه‌هان بهێنه سۆتن و ژناڤبرن و بو ڤێ چه‌ندێ دێ هه‌موو ئاسانكاری ژلایێ ساخله‌میێ هێنه كرن.
محه‌مه‌د تاهر بریفكانی، رێڤه‌به‌رێ ژینگه‌ها دهۆكێ ژی دیاركر هه‌ر نه‌خۆشخانه‌كا ب دروستی سه‌ره‌ده‌ریێ دگه‌ل چاره‌سه‌ركرنا به‌رمایكان نه‌كه‌ت و ل دووڤ رێنمایێن ژینگه‌هێ نه‌بیت، هه‌تا هه‌شت ملیون دیناران دێ هێنه سزادان و جارا دوێ مه ماف هه‌یه بگرین و گۆت: بو ڤێ چه‌ندێ دێ رینمایێن تایبه‌ت ب ساخله‌می و ژینگه‌هێ ئاراسته‌ی هه‌موو نه‌خوشخانان كه‌ین و پێدڤیه پێگیری پێ بهێته كرن.
ژێده‌ر: نوش نيوز
ئه‌ڤرۆ نيوز:
ب ده‌نگێن (72) په‌رله‌مانتاران رێواز فايه‌ق ژ فراكسيۆنا ئێكه‌تى نشتيمانى كوردستان بۆ سه‌رۆكا په‌رله‌مانێ كوردستانێ.
د كۆمبوونا ئه‌ڤرۆ يا په‌رله‌مانێ كوردستانێ دا و د بڕگا دويێ دا، هه‌لبژارتن د ناڤبه‌را هه‌ر ئێك ژ د. رێواز فايه‌ق ژ فراكسيۆنا ئێكه‌تى نشتيمانى كوردستان و شادى ره‌سۆل ئه‌نداما فراكسيۆنا نه‌وه‌ى نوێ بۆ پۆستێ سه‌رۆكاتيا په‌رله‌مانێ كوردستانێ ده‌ستپێكر.
هێمن هه‌ورامى جێگرێ سه‌رۆكێ په‌رله‌مانێ كوردستانێ كو ل وى ده‌مى روونشتنا په‌رله‌مانێ كوردستانێ برێڤه دبر، راگه‌هاند كو هه‌لبژارتن بۆ سه‌رۆكا په‌رله‌مانێ كوردستانێ دێ ب نهێنى برێڤه چيت.
پشتى هه‌لبژارتن هاتينه ئه‌نجامدان، ئه‌نجام ب ڤى ره‌نگى بوون:
رێواس فایه‌ق: 72
شادی نه‌وزاد: 16
ده‌نگی سپی و به‌تال: 9
ئه‌ڤرۆ نيوز:
بڕياره ئه‌ڤرۆ رۆژا پێنجشه‌مبى 11ى تيرمه‌ها 2019ێ جڤاتا نوونه‌رێن عيراقێ بۆ دو مه‌ره‌مان كۆم ببيت كو ئێك ژ وان گرێدايى پرسا هه‌لبژارتنێن كه‌ركووكێ يه.
ب گۆره‌ى به‌رنامێ كارێ جڤاتا نوونه‌رێن عيراقێ بڕگا ئێكێ دانوستاندنه ل سه‌ر پرۆژێ راستڤه‌كرنا قانوونا هه‌لبژارتنان ل جڤاتا پارێزگه‌هـ و قه‌زايان ل كه‌ركووك.
بڕگا دويێ يا به‌رنامێ كارێ جڤاتا نوونه‌رێن عيراقێ مێڤانداريكرنا هه‌ر ئێك ژ وه‌زيرێ په‌ترۆلێ، دارايى، نوونه‌رێ سه‌رۆكێ جڤاتا وه‌زيرێن عيراقێ و چاڤدێريا دارايى يه ده‌رباره‌يى بجهئينانا قانوونا بوودجا گشتى يا حوكمه‌تا فيدرال و هنارتنا په‌ترۆلا هه‌رێمێ و راده‌ستكرنا داهاتى بۆ حوكمه‌تا ناڤه‌ندى.
ئەڤرۆ نیوز، رێوار مزیری:
مافپه‌روه‌ر سه‌ركار سبغه‌تۆللا، به‌رپرسێ مولك و زه‌ڤیان ل رێڤه‌به‌ریا گشتیا باژێرڤانیان ل پارێزگه‌ها دهۆكێ بۆ ئەڤرۆ نیوز دیار كر، ل گۆره‌ی پرۆژه‌قانوونا په‌رله‌مانێ كوردستانێ ئه‌وا گرێدای تاپۆكرنا خانیێن زێده‌گاڤی ل هه‌رێما كوردستانێ ئه‌و خانیێن هه‌تا سالا 2018 ب زێده‌گاڤی هاتینه چێكرن دێ هێنه تاپۆكرن.
سه‌ركار سبغه‌توللا ئاشكرا ژی كر، هژماره‌كا خانیێن زێده‌گاڤی كو نێزیكی چوار هزار خانیانه ل گۆره‌ی یاسایه‌كێ به‌ری نوكه هاتینه چاره‌سه‌ركرن، به‌لێ نێزیكی 21 هزار خانیێن زێده‌گاڤی چو یاسا ژێ نه‌گرتینه و هه‌تا نوكه نه‌هاتینه تاپۆكرن و گۆت: ل سالا 2018 یاسایا ژماره 3 ژ په‌رله‌مانێ كوردستانێ ده‌رچوویه و ل گۆره‌ی وێ یاسایێ ب تنێ ئه‌و خانیێن هه‌تا سالا 2018 هاتینه چێكرن دێ هێنه تاپۆكرن و پشتی سالا 2018 یاسایه‌كا نوو ژ په‌رله‌مانێ كوردستانێ ده‌رچوویه و رێگریێ ل چێكرنا خانیێن زێده‌گاڤی دكه‌ت و ناهێلێت خانیێن زێده‌گاڤی بهێنه چێكرن.
ئەڤرۆ نیوز:
وەزارەتا ئەوقاف و کاروبارێن ئاینی راگەھاند کو ئەڤرۆ ل فرۆکخانا نێڤدەولەتی یا ھەولێرێ کاروانێ ئێکێ یێ حەجیێن ھەرێما کوردستانێ کو پێکھاتبوون ژ 376 حەجیێن ھەولێرێ بەر ب وەلاتێ سعودی چوون.
وەزارەتا ئەوقاف و کاروبارێن ئاینی ل حوکمەتا ھەرێما کوردستانێ د راگەھاندنەکێ دا، راگەھاند کو ئەڤرۆ رۆژا پێنجشەمبی 11ی تیرمەھا 2019ێ ل فرۆکخانا نێڤدەولەتی یا ھەولێر کاروانێ ئێکێ یێ حەجیێن ھەرێما کوردستانێ کو پێکھاتبوون ژ 376 حەجیێن ھەولێرێ بەر ب وەلاتێ سعودی ب رێ کەفتن.
ئاماژە ب وێ چەندێ ژی کریە کو ل گەل کاروانی دا لژنا ساخلەمیێ کو پێکھاتی نە ژ 27 نوشداران د وارێن جودا، دا، ب تایبەتی نوشدارێن نەخۆشیێن دومدرێژ و نوشدارێن تایبەتمەند یێن ئافرەتان و ھاریکارێن نوشداران و کارمەندێن ساخلەمیێ کو دێ ھەموو خزمەتگۆزاریێن نوشداری پێشکێشی حەجیان کە د ماوێ وانا وان ل سعودیێ.
وەزارەتا ئەوقافێ دایە زانین ژی کو ھەر ئەڤرۆ کاروانەکێ دی یێ حەجیان ل فرۆکخانا سلێمانیێ ب رێ کەڤیت کو ئەو ژی 188 حەجی نە.
ژمارا حەجیێن ھەرێما کوردستانێ بۆ ئەڤ سالە حەفت ھزار کەسن و زێدەتر ژ 35 رۆژان دێ ل سعودی مینن و لژنێن تایبەتمەند یێن وەزارەتێ ژی ل باژێرێ مەدینێ دێ پێشوازیێ ل حەجیێن ھەرێما کوردستانێ کەن.
نيشاندان