ئەڤرۆ نیوز، بارزان مزووری:

قایمقامێ قەزا شێخان ئاشکرا کر، رێیا شێخان بۆ ئەترووش و گوندێن دەوروبەر ب درێژاھیا ٣٥ کیلۆمەتران ژ لایێ کۆمپانیا (ئێچ کەی ئێن)ڤە ب کۆژمێ ٨٠٠ ملیۆن دیناران دھێتە ب جھئینان.

سەردار یەحیا عەبدولعەزیز، قایمقامێ قەزا شێخان بۆ ئەڤرۆ نیوز گۆت: “پشتی چەندین گازندێن وەلاتیێن دەڤەرا ئەترووش ب نڤیسارێن فەرمی گەھشتینە مە کو رێیا سەرەکیا شێخان بۆ ئەترووش و گوندێن دەوروبەر پێدڤی ب نووژەنکرنێ یە، مە ب رێیا نڤیسارەکا فەرمی داخواز ژ پارێزگارێ دھۆک کر، ژ لایێ خوەڤە وی ژی پەیوەندی ب وەزیرێ سامانێن سروشتی کر و د نھا دا بڕیار ھاتیە دان کو ئەڤ رێیە ب درێژاھیا زێدەتری ٣٥ کیلۆمەتران و ب کوژمێ ٨٠٠ ملیۆن دیناران ژ لایێ کۆمپانیا (ئێچ کەی ئێن) یا بەرھەمئینانا پترۆلێ ل دەڤەرێ بھێتە نووژەنکرن و ئەو ب شێوەکێ راستەوخۆ سەرپەرشتیا پرۆژەی دکەن”.

ناڤھاتی خویا ژی کر، رێیا سەرەکیا قەزا شێخان بۆ ناحیا ئەترووش ھەتا دگەھیتە گوندێ نسرا و ربەتکێ ھەتا دگەھیتە سنوورێ قەزا ئامیدیێ ل ناحیا چەمانکێ دێ ھێتاە قێرکرن و گۆت: “د نھا دا پرۆژە کەفتیە د قووناغێن کاری دا و کۆمپانی ب خوە دێ ب کارێ نووژەنکرنا وێ رابیت، ھەر ژ دوڕیانا خەنس بۆ ئەترووش، دیسا ژ دوڕیانا گەلیێ رمان ھەتا دگەھیتە ناڤ سەنتەرێ ناحیا ئەترووش و بۆ گوندێن نسرا و ربەتکێ ھەتا دگەھیتە سەر سنوورێ قەزا ئامیدیێ دێ ھێتە نووژەنکرن”.

ئەڤرۆ نیوز،رەمەزان ھەرنی:

ل سنوورێ دەشتا نەینەوا پشتی ھژمارەکا خێزانێن ئاوارە زڤرینە سەر جھێن خوە دەست ب کارێ خوەیێ چاندنێ کریە ڤە و بۆ دەمێ دو سالانە ب گشتی گەنمی دچینن، بەلێ ترس ھەیە گەنمێ وان بھێنە سۆتن بەری دوورینێ.

روبینا تیاری، ئەنداما پەرلەمانێ کوردستانێ ژ پێکھاتا مەسیحیان بۆ ئەڤرۆ نیوز دیار کر کو پشتی خێزانێن مەسیحی د ناڤ کەمپا دا زڤرینە سەر جھێن خوە ل دەشتا نەینەوا دەست ب کارێ چاندنێ کریە ڤە و رێَژەکا باش ب رووبەرەکێ مەزن گەنم چاندیە ل دەشتا نەینەوا.

ناڤھاتیێ ئاماژە دا وێ چەندێ کو پشتی خیانەتا ١٦ ێ ئوکتوبەرێ ھاتنا چەکدارێن حەشدا شەعبی بۆ دەشتا نەینەوا و دەڤەرێن مەسیحیان مەترسیا سۆتنا بەرھەمێن وان یێن چاندنێ ھەیە و دخوازن کو حەشدا شەعبی ژ دەڤەرێن وان دەرکەڤن و پێشمەرگە ب زڤرنەڤە دەڤەرێن وان، چونکی ھەکە گەنمێ وان بھێنە سۆتن بەریا دوورینێ دێ زیانێن مەزن بەر ب وان جوتیارێن مەسیحی کەڤن ئەوێن ل دەشتا نەینەوا گەنم چاندی و گۆت: “ئەڤ سالە مەترسی ھەیە وەک دەڤەرا کەرکووک گەنمێ مەسیحیان ل دەشتا نەینەوا ژی ب دەستێن چەکدارێن حەشدا شەعبی بھێنە سۆتن”.

ئەڤرۆ نیوز، قائید میرۆ:

بەرپرسەکێ ئێکەتیا بەلێندەرێن کوردستانێ ئاشکرا کر کو ل دەمەکێ نێزیک دێ ٢٠ ملیۆن دۆلار بۆ بەلێندەرێن دھۆک و ھەولێرێ ھێنە مەزاختن، یێن پڕۆژێن پترۆ دۆلاری و گۆت: “حوکمەتێ سۆزا مەزاختنا ھەموو قەڕێن بەلێندەران دایە کو دبنە ٨٠٠ ملیۆن دۆلار”.

سەرۆ دزەیی، سەرۆکێ لقا ھەولێرێ یا ئێکەتیا بەلێندەرێن کوردستانێ بۆ ئەڤرۆ نیوز دیار کر کو ھەر ژ دەستپێکا شەڕێ دژی تیرۆرستێن داعش حوکمەت ب ملیار و ٥٠٠ ملیۆن دۆلاران قەڕدارا بەلێندەرانبوو، بەلێ ئەڤ رێژە ھاتە کێمکرن بۆ ئێک ملیار دۆلار، پشتی دژواربوونا قەیرانا دارایی حوکمەت نەشیا قەڕێن بەلێندەران بدەت، لێ ل دووماھیا سالا بۆری وەرە دەست ب دانا قەڕێن بەلێندەران ھاتیەکرن ڤە و ھەیڤا یازدە یا سالا بۆری بڕیار ھاتەدان ١٠٠ ملیۆن دۆلار بۆ تەخا بەلێندەران بھێنە مەزاختن و ئەڤ پارە ب رێیا بەنکێ ھاتە بەلاڤکرن.

ناڤھاتی ئاماژە دا وێ چەندێ کو ئەڤ سالە ژی ١٠٠ ملیۆن دینارێن دی ھاتینە مەزاختن و بڕیارە ھەموو قەڕێن مایی ژی بھێنە مەزاختن، چونکی چەندین جاران وان دگەل بەرپرسێن سەرۆکاتیا جڤاتا وەزیران ئاخفتیە سۆزا مەزاختنا پارێ بەلێندەران دایە وان و گۆت: “بڕیارە ٢٠ ملیۆن دۆلارێن دی بۆ پڕۆژێن پتڕۆ دۆلاری ھەر دو پارێزگەھێن ھەولێر و دھۆکێ بھێنە مەزاختن یێن، ئانکو دێ ١٠ ملیۆن دۆلار بۆ پارێ.گەھا دھۆکێ بن و ١٠ ملیۆن دۆلار بۆ پارێزگەھا ھەولێرێ”.