بەرهەمێ كونجیێن ئەڤ سالە ل دەڤەرا ئامێدیێ دگەهیتە پتر ژ دو ملیار دیناران
ئامێدیێ، مەحمود نهێلی
ل سنوورێ دەڤەردارییا ئامێدیێ ئەڤ سالە نێزیكێ 1500 دونەمێن ئەردی بۆ مەبەستا چاندنا كونجیان هاتینە ب كارئینان و داهاتەكێ باش بۆ جوتیاران بەرهەم دئینیت و جوتیار ژی دبێژن بەرهەمێ كونجیان ئەڤ سالە باشتر بوویە ژ سالێن چوویی دا. ل گۆرەی زانیاریێن رۆژنامەیا ئەڤرۆ ژی، بەرهەمێ كونجیێن ئەڤ سالە ل سنوورێ دەڤەردارییا ئامێدیێ دگەهیتە پتر ژ دو ملیار دیناران.
لوقمان عەزیر ئێك ژ جوتیارێن ناوچەدارییا دێرەلۆكێ یە دبێژیت: هەموو سالان ئەز ب كارێ چاندنا كونجیان رادبم و گۆت: كونجیا دەڤەرا مە هەموو سالان یا باشە، لێ ئەڤ سالە باشترە ژ سالێن چوویی ژ بەر كو ل سالێن چوویی دەرامەتێ كونجیێ نەهند یێ باش بوویە و گۆت: ل دەڤەرا مە گەلەك جورێ، كونجیان دهێنە چاندن، لێ كونجیا هەری سەركەفتی یا كوردیە و ئەوا د بەرێ دا دهاتە چاندن.
ناڤهاتی دیار كر، ئەو كونجیێ دادقوتن دبەنە سیكێ هەم بۆ فروتنێ هندەك جوتیار ژی ب تنێ كونجیا بۆ خوە دچینن و دكەنە تەحین و گۆت: بهایێ كونجیا دەڤەرا وان گەلەك باش بوویە و ل سالێن بووری كیلویا كونجیان دناڤبەرا 6 بۆ 8 هزار دیناران دا بوویە و ئەڤ سالە چێدبیت تا 10 هزاران ژی بهێتە فرۆتن، ژ بەر كو بەرێ وەلاتیان ژی كەفتیە بەرهەمێ نافخۆیی ژ بەر كو وان باوەری ب بەرهەمێ دەرڤە نەمایە.
جوتیارەكی دی ب ناڤێ فایق رەمەزان بۆ رۆژناما ئەڤرۆ دیاركر، د نوكە دا هاریكاریا جوتیاری ناهێتە كرن بۆ وێ یەكێ دەمێ جوتیار دەست ب كارێ چاندنێ دكەت، زیان نەگەهنێ وەك دابینكرنا كیمیایێ و هەروەسا گازویلێ و گۆت: كونجیا ئەڤ سالە زۆر باشتر بوویە ژ سالێن چوویی و ئاشكرا كر، ئەڤ سالە جویا گوندێ وان هاتیە چێكرن و گەلەك مفا ژێ هاتیە وەرگرتن.
دەربارەی چاندنا كونجیان ژی ناڤهاتی دیار كر، پشتی زەڤی دهێتە كێلان دهێتە رۆبساندن و هەروەسا دهێتە توڤكرن و پشتی دەرباز بوونا 40 رۆژان دێ بەرئاڤا ئێكێ دەنێ و پاشان پشتی دەربازبوونا 15 رۆژان سێ تا چار جاران دهێتە ئاڤدان و كارێ وێ نە گەلەك یێ ب زەحمەتە.
و گۆت: پشتی كونجی دگەهیت دێ هێتە هەلكێشان و پاشان دێ كەنە كەپرۆك و پشتی هشك دبیت دێ هێنە داقوتان و دێ دەنە بای بو وێ یەكێ كونجی پاقژببیت و پاشان دێ بەنە ئاشی بو چێكرنا تەحینێ.
و گۆت: هندەك كەس كونجیا بۆ خوە دكەن، ب تنێ دكەنە تەحین و هندەك كەس ژی بۆ فرۆتنێ كونجیان دچینن و گەلەك كارێن دی و خارن و شریناهی ب كونجیێ دهێنە چێكرن.
ئەندازیار هەكار حەمید رێڤەبەرێ چاندنا ئامێدیێ بۆ رۆژناما ئەڤرۆ خویاكر، ل سنورێ رێڤەبەریا وانا چاندنا كونجیان سال بۆ سالێ پتر لێ دهێت، ژ بەر كو بەرهەمێ وێ یێ باشە و تاما وێ ژی یا خوەشە و گۆت: ئەڤ سالە خوشبەختانە دورێن پتر ژ هزار دونەمێن كونجیان هاتینە كرن و پتری وان ژی ل سنوورێ ناوچەدارییا دێرەلۆكێ بووینە.
دیار كر، چەمێن وانا سیستەمەك یێ هەی و دبیتە دو كەرت، كەرتەك بۆ چاندنا كونجیان دهێتە ب كار ئینان و كەرتەك ژی بۆ چاندنا برنجی یە و گۆت: ئەو ئەردێ مایی ژی بۆ چاندنا بەرهەمێن دیتر هاتبوو ب كار ئینان.
خویاكر، ژ بلی ڤان چەمان هند ژ جوتیاران ل بەر ئاڤا رووباری كونجی چاندی نە و ژ بەر ڤێ یەكێ ژی ئەڤ سالە بەرهەمێن چاندنا كونجیان زێدەبوویە و هەر چەندە بەرهەمێ وێ ئەڤ سالە باشتر بوویە ژ سالێن چوویی.
ناڤهاتی داخواز ژ هەموو جوتیارێن دەڤەرێ كر، پتر گرنگیێ ب چاندنێ و بەرهەمێ نافخویی بدەن، ژ بەر كو نوكە پتر هاولاتی ژی گرنگیێ ب بەرهەمێن نافخوەیی ددەن و ژ لایێ كابینە یا نوو یا حكۆمەتێ ژی هەژمارەكا زۆرا جویێ ئاڤدانێ هاتینە چێكرن كو ئەڤە ژی جهێ سوپاسیێ یە.
ل گور وان زانیاری و داتایێن تەخمینی یێن ب دەست رۆژناما ئەڤرۆ كەفتین، بەرهەمێ كونجیێن ئەڤ سالە ل سنوورێ دەڤەردارییا ئامێدیێ دگەهیتە پتر ژ دو ملیار دیناران.
