ئهپل دێ بهرچاڤکێن ژیر یێن تایبهت ب براندا خۆ ڤه بهرههم ئینیت
سندس سالح:
ب گۆرەی پێشهاتێن دووماهیێ، کۆمپانیا «ئهپل» یا خۆ بەرھەڤ دکەت بۆ پێنگاڤەکا گرنگ د ناڤ تەکنۆلۆژیا سهردهم دا، ئەڤە ژی ب دهستپێکرنا بەرچاڤکێن ژیر (Smart Glasses) یە کو پێشبینی دھێتە کرن د سالا 2027ێ دا بەردەست ببن. ڤێ جارێ، ئهپل نه دێ ب رێیا ھەڤکاریێ ل گەل کۆمپانیێن دی یێن بەرچاڤکان ڤە چیت، بەلکو دێ ب براندێ خۆ یێ تایبەت و ب تەکنۆلۆژیایەکا ب ئایفۆنی ڤە گرێدایی.
گوهۆڕین د ستراتیژیا ئهپل دا
بەروڤاژی کۆمپانیا «مێتا» کو ھەڤکاریێ ل گەل براندێن وەکی «رەی-بان» دکەت، ئهپل دێ ب سهرخۆ و بێ ھەڤکار کەتە د بازاری دا. ئەڤ ستراتیژییە ل سهر بنەمایێ ھەبوونا 1.5 ملیار بکاربەرێن ئایفۆنی یێن ل سەرانسەری جیھانێ دھێتە دارێژتن، کو دهلیڤەکا زێڕین ددهتە کۆمپانیێ بۆ بازارکرنا ڤی بەرھەمی. ھەروەسا پێشبینی دھێتە کرن کو بهایێ ڤان بەرچاڤکان د ناڤبەرا 200 بۆ 500 دۆلاران دا بیت، ئەڤە ژی دێ بیتە ھاندەرەکێ مەزن بۆ بکاربەران کو ب ساناهی ڤی بەرھەمی بکڕن.
سهرکهڤتنا ڤان بەرچاڤکان دێ ل سهر دهستێ «ژیریا دهستکرد» (AI) و پێشکەفتنا مێشکێ وان یێ «سیری» بیت. بکارئینانا کامێرا و مایکروفۆنان ل گەل تەکنۆلۆژیا «Visual Intelligence» دێ تایبەتمەندیەکا جودا ب وان دهت. ئەڤە د دەمەکێ دایە کو مێتا نوکە ب 82% ژ بازاری دهست ب سەر بەرھەمان دا گرتییە، لێ مێتا یێ د دهمەکێ ب زهحمهت دا دهرباز دبیت ژ بەر کێشەیێن تایبەتمەندیا داتایان و دلتهنگیێن بکاربەران لسەر پاراستنا نهێنیێن وان.
ل دهستپێکێ، ڕەنگە ھەر بەرھەمەکێ لۆگۆیا ئهپل ل سهر بیت بێ سهرکهفتن نەمینیت، لێ سهرکهفتنا راستەقینە ل سهر ئاستێ پراکتیکی دێ ھێتە پێڤان. ئهپل نوکە د خهما وێ یەکێ دایه کو بكران رازی بکەت، چونکی بكر ھەست ب وێ یەکێ کریە کو هندەک ژ سوزێن پێشتر یێن «ژیریا ئهپل» دهمێ وان ڤهكێشایه و نوکە چاڤهڕێی وێ نە تشتەکێ ب مفا و پراکتیکی ببینن.
ئەڤ بەرچاڤکە دێ بیتە ئهزموونەکا نوو بۆ ئهپل؛ ئەگەر شیا «سیری» ب ڕەنگەکێ وهسا پێشکێش بکەت کو د کارێن ڕۆژانە دا ب مفا بیت، دێ بیتە پاشایێ بازاری. لێ ئەگەر د ڤی واری دا تووشی ئاستەنگ و کێماسیان بیت، دێ د ھەڤرکیەکا گەلەک ب زهحمهت دا ل گەل مێتا و کۆمپانیێن دی گیرۆ بیت. یا ژ هەمیێ گرنگتر، ئهرێ ئهپل دێ شێت باوهریا بکرێن خۆ پارێزیت؟ یان دێ ههمان کێشەیێن تایبەتمەندیێ ب سهر ڤێ بەرچاڤکێ ژی دا ئێن؟
هەروەسا، پاراستنا بەرچاڤکێ ژ ئالیێ دیزاین و فیزیکی ڤە، نەبوونا هەستیاریا بکارئینانێ، دێ بیتە ئاستەنگەکا دی ل هەمبەر ئهپل. دڤێت بەرچاڤک ب رەنگەکێ بیت کو مروڤی بێزار نەکەت، چونکی بکرێن ئایفۆنی یێن فێر بووین ل گەل ئاستەکێ بلند یێ ئارامیێ.
