ئهڤ خاله دێ ساركهرێ ترومبێلا ته كارا و ساخلهم هێلن
- دڤێت بەردەوام ئاگەهداری نیشانا گەرمیێ بین د ناڤ داشبوولێ ترۆمبێلێ دا (حەماوە).
– دڤێت بەردەوام تەماشای رێژا ئاڤێ د ناڤ رادێتەرێ دا بکەین.
– ئاڤا پاقژ و بێ کلس و تایبەت بۆ رادێتەرێ بکاربهینن، چونکو ئاڤا پیس دبیتە ئەگەرێ ژەنگگرتنێ و کلسگرتنێ، و د ئەنجام دا بۆریێن رادێتەرێ و ناڤا بزوێنەری دهێنه گرتن.
– بکارئینانا ئاڤا سار بۆ رادێتەرێ ئەگەر گەرم بیت کارەکێ باش نینە، چونکو سارکرنا پارچەکا کانزایی یا گەرم کارتێکرنەکا خراب ل سەر وێ کانزایێ دکەت.
– دەمێ پلەیا گەرمیێ (حەماوە) بەرز دبیت، ئەگەر ئاڤ ل بەر دەست هەبیت، پێدڤی یە رادێتەر ب ئاڤێ بهێتە سار کرن پاشان ترۆمبێل بهێتە ڤەمراندن. ئەگەر ئاڤ نەبیت، باشترە ئێکسەر بهێتە ڤەمراندن، چونکی دەمێ ترۆمبێل رادوەستیت کارتێکرنا هەوای ل سەر رادێتەرێ کێم دبیت و ب وێ یەکێ ئەگەر هەیە پلەیا گەرمیێ پتر بلند ببیت.
– ئەگەر بۆریێن رادێتەرێ گیرهێ گرتن، دبیتە ئەگەرێ سەرەکی کو پلەیا گەرمیا بزوێنەری بلند ببیت، د ڤێ حالەتێ دا دڤێت رادێتەر شیش لێ بهێتەدان یان فلاشی لێ بدەن دا بۆری ڤەبن، ئەگەر ب ڤێ یەکێ چارەسەر نەبوو دڤێت بهێتە گوهۆرین. هندەک جاران بۆریێن رادێتەرێ کون دبن، ئەڤە ژی ژ ئەگەرێ کۆنبوونێ یان هەر ئەگەرەکێ دی یە؛ بۆ چارەسەرکرنێ ژی ماددێن تایبەت هەنە دکەنە د ناڤ رادێتەرێ دا دا کو کونان بگریت، رێنمایێن بکارئینانێ ل سەر هاتینە نڤیسین.
– پشکەکا دی ژ ڤی سیستەمی پێکهاتییە ژ رادێتەرا گەرمکرنا ناڤا ترۆمبێلێ. ئەڤ رادێتەرە ل بن داشبوولێ دهێتە دانان، کو دەمێ ل زستانێ سیستەمێ هەوایێ گەرم دهێتە ڤەکرن، ئاڤا گەرم دچیتە د ناڤ ڤێ رادێتەری ژی دا. دەمێ پلەیا گەرمیا بزوێنەری بلند دبیت، دشێین مفای ژێ وەربگرن بۆ داکەفتنا پلەیا گەرمیێ ب رێیا ڤەکرنا گەرمکەرێ (هیتەری)، چونکو ئەڤ رادێتەرە ژی وەک رادێتەرێن سەرەکی پانک هەیە و پشکەکێ ژ گەرمیا ئاڤێ لاددەت.
