ئیحسان عەبدوللا: ڕەوشت بنەمایێ سەرەکی یێ یاریا تایکواندۆیێ یە
هەرهین محەمەد:
د داخویانیەکێ دا ئیحسان عەبدوللا ڕاهێنەرێ تایکواندویێ بۆ ئەڤرۆ دیارکر یاریا تایکواندۆیێ ل سەر بنەما و جەوهەرێ خۆ ئێکەمە چو ئەوا ل ئۆلمپیادا دهێتە کرن یان ژی یێن نە ئۆلمپی بیت و جوداهیێن مەزن د ناڤبەرا وان دا نینن.
زێدەتر ناڤهاتی گۆت: هەرچەندە تایکواندۆ بۆ مەرەمێن سەربازی هاتبوو چێکرن، بەلێ پشتی هینگێ گەشەکر و بەلاڤ بوو هەتا کو بوویە وەرزشەکا مەدەنی و هاتیە ناڤ جڤاکی دا.
زێدەتر گۆت: ئەم وەک ڕاهێنەر یاریزانێن خۆ ل سەر هەموو تشتەکێ ئامادە دکەین، وپشتی فێرکرنێ ئەگەر یاریزانەکێ باش و زیرەک بیت ئەم پشکداری قارەمانیان دکەین دا کو بشێت ناڤێ پارێزگەهـ و وەلاتێ خۆ ل ئاستێن بلیند پێش بێخیت.
ئیحسانی گۆت: د ناڤا هۆلێ دا چ کچ بیت یان کوڕ دەستپێک دێ راهێنان ل سەر ڕەوشتێ بلند فێر دکەین، پاشان ل سەر ئاستێ وەرزشێ و چو جووداهی د ناڤبەرا کچ و کوڕان دا نینە، دەمێ ئەم ڕاهێنانان دکەین هەردو ڕەگەزان ب ئێک ئاست و پلە سەیر دکەین هەروەسا حەزا مە ئەوە کو هەر کچەک یان کوڕەکێ بهێتە دناڤ ڤێ وەرزشێ دا و بەردەوام وەرزشا خۆ بکەت، نوکە هۆلێن تایکواندۆیێ گەلەک هەنە و یاریزانێن زۆر ژی مە هەنە کو حەزا پێشکەفتنێ ل دەڤ وان هەیە، بەلێ مخابن پشتەڤانیا دارایی و مەعنەوی بۆ ڤێ یاریێ یاکێمە.
ئەوچەندە ژی گۆت: وەکو ڕاهێنەرەک حەزدکەم و دخوازم هەموو لایەنەک ب گشتی هاریکاری و پشتەڤانیا یارییا تایکواندۆیێ بهێتە کرن، دا کو بشێین بەردەوام بین و قارەمانێن مەزن بۆ جڤاک و وەلاتێ خۆ دروست بکەین.
