ئەڤرۆ دهۆك و نەورۆز د ئێك یاریگەهـ دا و ئەركێ وان ب سانەهی نابیت
قەیس وەیس:
چاڤەڕێ دهێتە كرن ئەڤرۆ ژی پێنج یاریێن مایی ژ هەڤڕكیێن گەڕا سێیێ یا خولا ستێرێن ئیراقێ یا فوتبۆلێ بهێنە كرن، هەردو یانەیێن كوردستانی دهۆك و نەورۆز ل پایتەختێ ئیراقێ بەغدا نە ژبۆ ئەنجامدانا یاریێن خوە و چاڤ ل سێ خالێن وێ یاریێ نە.
قەرەبوویا سێ خالان ئارمانجە
ب دروشمێ قەرەبوویا خالێن هەردو یاریێن بوری بڕیارە ئەڤرۆ ل دەمژمێر 6:30 مەغرەب تیما یانەیا دهۆك ل پایتەختێ ئیراقێ بەغدا ببیتە مێڤانا یانەیا نەفت ل یاریگەها وێ كاپتن شەرار حەیدەر، د یارییەكا ب هێز دا بۆ ئەلهۆیێن چیا ئەوا پشتی بۆ یارییا دویێ ل دووڤ ئێك ب ئەنجامێ وەكهەڤی د ناڤ ئەرد و یاریگەها خوە دا دەركەڤتی ل گەل ئەلغراف ب گۆلەكێ وەكهەڤبوو، د یارییا دویێ دا بەرانبەر تەلەبە ب سێ گۆلان.
ژلایێ خوەڤە یانەیا نەفت یا بەغدایی ئاستەكێ باش نیشان دایە د دو یاریێن وەرزێ ئەڤ سالە دا چار خال كۆمكرینە سەركەفتیە ل سەر كەرخێ و وەكهەڤییەك ل گەل نەفت میسان ئینایە، ئەڤ یارییە بۆ ئەلهۆیێن چیا گەلەك گرنگە و سەركەڤتن دێ هێزەكا باش دەتێ.
ڕاهێنەرێ دهۆكێ چ گۆتییە؟
د پرێس كونفرانس دا یەحیا گۆل محەمەد ڕاهێنەرێ یانەیا دهۆكێ دیاركر پشتی دو یاریێن دناڤ ئەردێ خوە دا ب ئەنجامێن وەكهەڤی ئینایی دێ ئەڤ یارییە بیتە یا ئێكێ ژ دەرڤەیی یاریگەها خوە لەوما دبیت گڤاشتن ب شێوەیەكێ دی ل سەر تیمێ هەبیت، تیما نەفتێ دیارە ژ ئەنجامێن وێ یا ڕێكخستیە و باشە، دبیت ئەو دەمێ بەردەست نە بیت ب شێوەیەكێ بەرفرەهـ كار ل سەر تەكتیكێ بكەین، لێ مە كار یێ كری و هەلسەنگاندنا تیما نەفتێ كو پلانێن مە ب دەستڤە ئینانا سێ خالان بن.
ژلایەكێ دووڤە گۆت: بۆ من یا گەلەك كەیفخوەش هەبوونا پشتەڤانێن یانەیا مە كو ڕێژەیەكا ئێكجار زوور ب گیانەكێ وەرزشی و پشتەڤانیەكا مەزن ل تیما خوە دكەن ئەڤە ژی پالدەر ببیتە هێزەك بۆ تیمێ، پێنەڤێت ئارمانجا مە یا سەرەكی ئەوە ئاستەكێ باش و دەستڤە ئینانا سەركەفتنێ یە.
نەورۆز پێدڤی ب سەركەڤتنێ یە
د هەمان یاریگەها ئەڤرۆ دهۆك یاریێ لێ دكەت بڕیارە تیما دویێ یا كوردستانی یارییا خوە ل یاریگەها كاپتن شەرار حەیدەر بەرانبەر یانەیا تەلەبە یا بەغدایی ل دەمژمێر 9:45 شەڤ ئەنجام بدەت، تیما نەورۆز د دو یاریێن بۆری دا بتنێ ئێك خال كۆمكرییە ئەوژی بەرانبەر جەوییە د گەڕا ئێكێ دابوو لێ د یارییا دویێ دا بەرانبەر ئەلغراف تووشی خوسارەتیێ بوو، ئەڤ یارییە بۆ كوڕێن باژێرێ سلێمانیێ ب سانەهی نابیت و پێدڤی ب سێ خالانە لێ یانەیا تەلەبە ئاستێ وێ چێگێر نینە، د دو یاریێن بۆری دا بتنێ ئێك خال ئینایە ئەوژی بەرانبەر دهۆكێ بوو.
ژ یاریێن دی یێن ئەڤرۆ د خولێ دا
كارەبا- ئەلگەرمە، یاریكەها زەورا، دەمژمێر 6:45 مەغرەب.
مینا- ئەلغراف، یاریگەها فەیحا، دەمژمێر نەهی شەڤ.
مووسل- كەربەلا، یاریگەها شەهید فرانسۆ حەریری، دەمژمێر نەهی شەڤ.
