ئەڤرۆ دووماهی دەلیڤەیە بۆ گەشەكرنا هیڤیێن ناسناڤی
قەیس وەیس
چاڤەڕێ دهێتە كرن ئەڤرۆ ل دەمژمێر حەفتی شەڤ تیما باسكێت بۆلا یانەیا زاخۆ ل هۆلا گرتییا ئەرمەن ل پایتەختێ ئیراقێ بەغدا دیدارەكا ئاگرین بەرانبەر خودانێن ئەردی یانەیا دیفاع ئەلجەویی ئەنجامبدەت ئەوا د چارچووڤەیێ یاریێن خوە یێن زنجیرەیا پێنچ یاریێن فینالا ئیراقێ كو دبیتە یارییا سێیێ و چارەنڤیس بۆ كوڕێن خابووری.
ژبلی سەركەڤتنێ ناسناڤ دێ ژ دەست چیت
تیما یانەیا زاخۆ د زنجیرەیا یاریێن فینالێ دا دو یاری بەرانبەر دیفاع ئەلجەوی هەلگرا ناسناڤێ وەرزێ بۆری كرینە و د هەردو یارییان دا تووشی خوسارەتیێ بوویە، یا ئێكێ ئەوا ل بەغدا هاتیە كرن ب ئەنجامێ 73 خالان بەرانبەر 70 خالان تووشی خوسارەتیێ بوو، د یارییا دویێ دا ئەوا ل چارشەمبییا بۆری هاتیە كرن زاخۆ نەشیا مفایی ژ ئەرد و جەماوەرێ خوە وەربگریت و تووشی خوسارەتیێ بوو ب ئەنجامێ 86 خالان بەرانبەر 76 خالان تووشی خوسارەتیێ بوو، یارییا ئەڤرۆ دێ بیتە یا سێیێ و چارەنڤیس بۆ كوڕێن خابۆری، ژبەركو هەكە تووشی خوسارەتیا سێیێ بوو ئانكو ب فەرمی دێ یانەیا دیفاع ئەلجەوی بیتە قارەمان وەرزێ ئەڤ سالە ژی و پێدڤی ب یارییا چارێ و پێنجێ ناكەت.
زاخۆ هیڤیێن ناسناڤی هەنە
ل دووڤ سیستەمێ خولێ یا زنجیرا فینالێ دا پێنچ یاری هاتینە دانان لێ سەرجەمێ هەر پێنچ یارییان هەر تیمەكا سێ سەركەڤتنان بینی تدێ بیتە قارەمان، د نوكە دا ژ دو یارییان دیفاع ئەلجەوی دو سەركەڤتن ئیناینە و سەركەڤتنا ئەڤرۆ دێ ناسناڤی ئێكلاكەت، لێ هەكە زاخۆ ب سەركەڤت دێ یارییا چارێ ژی هێتە كرن و دبیت یا پێنجێ ژی بهێتە كرن هەكە زاخۆ دو سەركەڤتن ل دووڤ ئێك ئینان.
كاپتنێ تیمێ ب هیڤییە
د داخویانیەكێ دا موراد عەلی كاپتنێ تیما زاخۆ ب هیڤییە ئەو بشێن ڤەگەڕینە دناڤ هەڤڕكیێ بۆ دەستڤە ئینانا ناسناڤی و گۆت: ڕاستە ئەركێ مە ب زەحمەتە لێ د یارییا باسكێت بۆلێ دا ئەنجام ب چركەیان دهێتە گوهۆڕین لەوما ژی هەتا دووماهی چركە دێ شەڕی بۆ سەركەڤتنێ كەین، د هەردو یاریێن بۆری دا ژ شاشیێن كەسۆكی و نەبوونا چەنسی د تۆماركرنا خالان تایبەت یێن سیانی هەروەسان هێزا تیما هەڤڕك ئەگەر بوون كو سەركەڤتنێ ژ دەستبدەین، بۆ یارییا ئەڤرۆ مە هەموو بەرهەڤی كرینە ب هەر شێوەیەكێ بشین ئەنجامی بۆ تیما خوە ئێكلا كەین و ڤەگەرینە هەڤڕكییا ناسناڤی.
هەروەسان ناڤی سۆز دا پشتەڤانێن یانەیێ كو ئەوا د شیان دا بیت د ناڤ یاریگەهێ دا بكەن و گۆت: مە تیمەكا ڕێكخستی و ئێگكرتی یا هەیی و چوونا مە بۆ ناڤ یاریگەهێ دا ئێك ئارمانجە ئەو ژی هەرزوو گڤاشتن و ڕێگریگرتن ل سەر هەر هێرشەكا وان و بزاڤێن پتر ب دەستڤە ئینانا خالان، دێ ئەركێ مە ب زەحمەت بیت لێ مورالا مە یا بلندە ب هیڤی مە د رۆژا خوە دابینت ژبۆ دەستڤەئینانا سەركەڤتنێ.
بۆ زانین هەكە ئەڤرۆ یانەیا زاخۆ ب سەركەڤت بڕیارە یارییا چارێ كوڕێن خابوورب بەرانبەر دیفاع ئەلجەوی ل 20ێ ڤێ مەهێ دەمژمێر حەفتی شەڤ ل هۆلا گرتییا بنگەهێ وەرزشی ل زاخۆ مێڤان كەت، یارییا پێنجێ دێ ل 26ێ ڤێ مەهێ بیت ل هۆلا گرتییا یانەیا جەیش ل بەغدا دەمژمێر حەفتی شەڤ هێتە كرن.
