ئەڤرۆ د كۆپا ئاسیایێ دا كچێن دهۆكێ دێ هەڤڕكییا كچێن توركمانستانێ كەن
محەمەدعەلی نوری:
هەر سێ كچێن پارێزگەهێ و یانەیا دهۆك لارا ئاڤدەل، زەلال سەعید و هانا ئاڤدەل ل گەل ڕاهێنەرێ خوە ئاڤدەل حەسەن بناڤێ هەلبژارتیێ ئیراقێ پشكدارن د قارەمانییا كۆپا بێلی چین كینگ یا نێڤدەولەتی ئەوا هەڤڕكیێن وێ ل وەلاتێ فێتنامێ دهێتە كرن و ئەڤرۆ ژی یارییا هەی.
لدۆر ڤێ یەكێ سەعید خەلیل ئەندامێ فدراسیۆنا یارییا تێنسا ئەردی یا ئیراقێ و سەرۆك شاند بۆ ئەڤرۆ گۆت: تیما هەلبژارتیێ ئیراقێ ب پێكهاتیێ كچێن دهۆكێ نە ئەوێن دنوكە دا پشكدارن د كۆپا بێلی چین كینگ یا نێڤدەولەتی دا ئەوژی لارا و خویشكا وێ هانا ئاڤدەل و هەڤالا وان زەلال سەعید دوهی یارییا ئێكێ بەرانبەر خودانا ئەردبی فێتنام كربوو، ئەڤرۆ دێ بەرانبەر هەلبژارتیێ توركمانستانێ كەن و سوبەهی بەرانبەر تاچاكستانێ بیت، ئەڤ قارەمانییە سالانە ژلایێ فدراسیۆنا تێنسا ئەردی یا جیهانی ل سەر ئاستێ پێشكەفتیان بۆ كوڕان و كچان ل وەلاتێن جودا ڕێكئێخستیە.
ژلایەكێ دووڤە ناڤهاتی گۆت: پشكدارییا هەرسێ كچێن دهۆكێ ل سەر ئەوێ پیڤەرێ هاتن پشتی د دووماهی قارەمانیا ئیراقێ دا شیابوون ڕێزێن ئێكێ هەتا سێیێ بهێن و بەردەوامیێ بدەنە مانا خوە دناڤ ڕێزێن هەلبژارتییێ ئیراقێ دا.
