ئەڤرۆ زاخۆ دێ ل قەتەر بەرانبەر شەباب یا سعوودیێ بیت و چاڤ ل فینالێ یە
قەیس وەیس:
بڕیارە ئەڤرۆ نوونەرا كوردستانێ و ئیراقێ یانەیا زاخۆ ئێك ژ گرنگترین پێنگاڤێن خوە د دیرۆكا یانەیا خوە دا پاڤێژیت دەمێ ل یاریگەها خەلیفە یا پایتەختێ قەتەرێ دەوحە بەرانبەر یانەیا شەباب یا سعوودیێ بیت ئەوا دێ ل دەمژمێر پێنجێ ئێڤاری ژ چارچووڤەیێ قووناغا پێش دووماهییا قارەمانییا كۆپا كەنداڤی دەربازبوون بۆ فینالێ هێتە كرن.
هەر د هەمان دەم دا بڕیارە یانەیا ڕەیان یا قەتەری ل یاریگەها خوە یانەیا ئەلقادسیە یا كۆێتی ل دەمژمێر هەشتی شەڤ مێڤان بكەت، سەركەڤتیێ هەردو یارییان دێ دەربازبنە یارییا فینالێ ئەوا بڕیارە ل پێنج شەمبییا بهێت یاریگەها خەلیفە یا قەتەری بهێتە كرن.
زاخۆ بۆ دیرۆكێ بەرهەڤە
تیما یانەیا زاخۆ چاڤ ل فینالێ یە ژبۆ خەونا خوە و ئێكەم ناسناڤەكێ دیرۆكی كو بشێت وەكو برایێ خوە یانەیا دهۆكێ ب گەهیتە فینالێ و ناسناڤی ژی بینیت ئەوا ل وەرزێ بۆری شیایی د فینالێ دا سەركەڤتنێ د یارییا خوێ دا ل سەر ئەلقاجسیا ئینابوو و ئێكەم ناسناڤێ دیرۆكی ل سەر ئاستێ كوردستانێ و ئیراقێ تۆماركربوو، لڤێرە كوڕێن خابووری بەرانبەر هەمان دەلیڤەیا دیرۆكی نە و بەرهەڤن بۆ سەركەڤتنێ، سەرباری یانەیا شەباب یا سعۆدی ئێك ژ هێزێن دەڤەرا كەنداڤی یە و خودان یاریزانێن پیشەكار یێن باشە، لەوما ژی یاری دێ ب هەڤڕكییەكا بهێزبیت.
كوڕێن خابووری چەوا دەربازبوون
تیما یانەیا زاخۆ دەربازبوو قووناغا چارگۆشەیا زێرین پشتی د كۆما ئێكێ دا شیایی ل سەرێ لیستێ بهێت ب كۆمكرنا 13 خالان، ژ چار سەركەڤتن، وەكهەڤی و خوسارەتیەكێ، ئەوا یانەیا ئەلقادسیە یا كۆێتی ل ڕێزا دویێ هاتی، عەین یا ئیماراتی ل ڕێزا سێیێ و سترە یا بەحرێنی ل ڕێزا چارێ هاتبوو، د كۆما دویێ دا یانەیا ڕەیان یا قەتەری ل ڕێزا ئێكێ هاتبوو ب12 خالان، شەباب یا سعۆدیێ ل ڕێزا دویێ، نەهزە یا عومانی و تەزامن حەزرموت یا یەمەنی ل ڕێزێن سێیێ و چارێ هاتبوون.
ڕاهێنەرێ زاخۆ درویشمێ سەركەڤتنێ بلندكرییە
د كۆنگرەیێ رۆژنامەڤانی دا ئەیۆب ئۆدیشۆ ڕاهێنەرێ تیما یانەیا زاخۆ گۆت: هەرچەندە دڤیابا ئەڤ قووناغە یارییەكە ل یاریگەها مە و ئێك ل یاریگەها شەباب هاتباكرن، لێ ژبەر ڕەوشا نوكە بوویە یاریگەهەكا بێ لایەن، هەرچەوابیت ئەم یێن هاتینە قەتەری و مەرەما مە ئێكە ئەوژی ب سەركەڤین و دەربازبیتە فینالێ و بگەهینە ناسناڤی، ئەڤە ب سانەهی نابیت بەرانبەر یانەیێن وەكو شەباب یا سعۆدیێ ژبەركو ئەوان ژی هەمان بۆچوونا مە هەیە و مافێ هەر یانەیەكێ یە، ب گشتی یانەیێن سعۆدی خودان سەربۆرن و ب هێزن، لێ ئەم ژی دێ شەڕی بۆ سەركەڤتنێ كەین و ب هیڤی نە ب گەهینە ئارمانجا خوە.
لدۆر یاریێن مایی ژ كۆپا كەنداڤی جاسم ئەلرومێحی ئەمیندارێ گشتی یێ فدراسیۆنا كەنداڤی د دیدارەكا رۆژنامەڤانی دا گۆت: هەرچەندە ل دووڤ خشتەیێ پێشتر بڕیاربوو یاریێن قووناغا پێش دووماهیێ ب هاتنۆچوون دناڤبەرا یانەیێن پشكدار هاتباكرن و پاشان یاریگەهەك بۆ فینالێ هاتبا دیاركرن، لێ نەچاربووین ژبەر كاودانێن سیاسی یێن دەڤەر تایبەت شەرێ ئەمریكا- ئیسرائیل بەرانبەر ئیرانێ وەكر ئەڤ ڤێ بڕیارێ بدەین زاخۆ پێنەڤێت ئەڤ پێنگاڤە ژی ژبۆ سلامەتییا هەموو یانەیێن پشكداربوویە و گیانێ وەرزشڤانان بوو مە گرنگترە ژ ئەنجامێ هەر یارییەكێ.
بۆ زانین یانەیا زاخۆ وەكو نوونەرا ئێكانە یا كوردستانێ و ئیراقێ پشكداریێ د ڤێ قارەمانیێ دا كەت، ئەوا ل وەرزێ بۆری یانەیا دهۆك شیایی ب سەرفەرازی پشكداریێ بكەت و ناسناڤێ قارەمانیێ بۆ جارا ئێكێ د دیرۆكا خوە دا ب دەستڤە بینت پشتی د فینالێ دا ئەوا ل 15ێ نیسانا سالا 2025ێ شیابوو ل سەر ئەردێ یاریگەها خوە سەركەڤتنێ ل سەر یانەیا ئەلقادسیە یا كۆێتی بینت ب گۆلەكێ بێ بەرانبەر و ئێكەم ناسناڤێ كۆپا كەنداڤی بۆ خەزینەیا وەرزشا ئیراقێ و كوردستانێ ب دەستڤە بینت.
