ئەڤ رەفتارێن رۆژانە زیانێ ل دلی دکەن
دل رۆژانە نێزیکی 100 هزار جاران لێددەت، ئێک ژ ئەندامێن هەرە گرنگێن لەشی یە و ژیانا مرۆڤی ل سەر راوەستیایە، لەورا پاراستنا وی کارێ هەرە گرنگە. چەند عەدەتەک هەنە کو مرۆڤ رۆژانە دکەت و بەلکی بێ ئاگەهـ بیت کو زیانێ دگەهیننە دلی، مالپەرێ (Times Now) ئەڤ خالێن ل خوارێ بەلاڤکرینە:
– روینشتن بۆ دەمەکێ درێژ: روینشتن هاتنوچوونا خوینێ خاڤ دکەت، چەوریێن سێیانی و کۆلیسترۆلێ خراب بلند دکەت. هەتا هەکە رۆژانە وەرزشێ ژی بکەی، روینشتن بۆ دەمێ 8 سعەتا ل سەر ئێک زیانێ دگەهینیت. دل پێدڤی ب لڤینێ یە ب بەردەوامی، نە تەنێ دەمەکێ کێم ل رۆژێ. پێدڤی یە هەر 45 بۆ 60 دەقیقان بێهنڤەدانەکێ وەربگری و 5 دەقیقا پیاسێ بکەی.
– زۆر نڤستن یان کێم نڤستن: نڤستنا کێمتر ژ شەش دسعەتا و زێدەتری نەهـ سعەتا، مەترسیا نەخۆشیێن کۆئەندامێ دەماران زێدە دکەت، لەورا باشترین دەم بۆ نڤستنێ 7 بۆ 8 سعەتن ل رۆژەکێ دا.
– پشتگوهـ هاڤێتنا فشارێن دۆمدرێژ (سترێس):
فشارا دەروونی تنێ رەوشەکا دەروونی نینە، بەلکی کارتێکرنێ ل سەر هەمی لەشی دکەت. لێدانێن دلی تێک ددەت و فشارا خوینێ بلند دکەت، هەتا مەترسیا جەلتەیێن دل و مێشکی ژی زێدە دکەت.
– نەڤەخارنا ئاڤێ: دەمێ ب رێژا پێدڤی ئاڤێ نەڤەخوی، دل پێدڤی ب وێ چەندێ دکەت کو ب زەحمەتتر کار بکەت بۆ هنارتنا خوینێ، ئەڤە ژی فشارەکا زێدە یە ل سەر دلی.
– درەنگ خارنا شەڤان: درەنگ خارنا شەڤان ئەگەرە بۆ بلندبوونا فشارا خوینێ. دل پێدڤی ب بێهنڤەدانێ یە شەڤان، لێ دەمێ خوارنەکا گران دخوی، شەکرا خوینێ بلند دبیت و فشارەکا مەزن ل سەر دلی پەیدا دبت.
– پشتگوهـ هاڤێتنا سەرەدانا نۆشداری: گەلەک کەس بۆ پشکنینێن سالانە سەرەدانا نۆشداری ناکەن تا دەمێ هەست ب ئێشێ دکەن، ئەڤە شاشیەکا مەزنە، چونکی نیشانێن نەخۆشیێن دلی هندەک جاران دهێنە هەستپێکرن، لەورا پشکنینا سالانە پێدڤی یە.
