بارانه‌ك ژ ئه‌ورێن زوها
نایف مه‌حموود
بۆ ئه‌نفالا بارزانیان و هه‌می وان ده‌رده‌سه‌ریێن ب سه‌رێ ملله‌تێ كورد هاتین
ئێڤاریه‌ك
به‌رێ ڕوژێ ل ئاڤابوونێ
ئه‌ڤیندارێن باژێڕێ من
ل ڤی تاخی و تاخێ هه‌نێ
د خه‌لوه‌تێ دا
ل به‌ندا چاڤه‌ڕێبوونێ،
بگه‌هنه ئێك
د ڕێكێ دا
هه‌می گول دبوونه ستری
هه‌می هیڤی
دبوونه پیش و
ستێرێن ل ئه‌سمانا ڤه‌مری
دلێن عاشقان دسۆتن پێت و گوڕی
چ تۆفانه!
ل ئه‌سمانا دهێته خوار
ژ ئه‌ڤان عه‌ورێن گڕگڕی
ده‌شت و نه‌وال و بیابان
تاڤێ سۆتن به‌ردا گری
ڤی به‌ختێ ڕه‌ش،
دینده‌ها چیایێ جودی
یێ باب ئاده‌م، ئاده‌میزاد
هه‌می جیهان ل سه‌ر سینگێ خوه حه‌واندی
چ دوژه‌هه و ڤۆلكانا پێلێن ئاگری
چ بارانه!
ئه‌ورێن مه ژ ڕۆندكا زوهابوون
ئاڤاهیێن مه وێران بوون
قێڕی و هه‌وارێن زاڕۆیان
ل ئه‌سمانا بوون برووسی
و ده‌نگ ڤه‌دان
ده‌ربه‌ده‌ر و ژار و برسی
ئه‌نفال و تێزاب و خه‌رده‌ل
بارێن گران
ده‌ست و پێ چۆك ل مه شكه‌ستی
زڤستانا سار و دژوار و قه‌ڕمتی
هه‌ڕی و ته‌قن گری و زێمار
هه‌ڕۆ سه‌د جار هلنگفتی
بار و پشتیێن ڤه‌ڕه‌ستی
چ باهۆز و ڕه‌شه‌بانه
به‌هر و پشكێن وه‌لاتێ ژار
ئێدی بلبل
ل وارێ مه نه‌بسترین
ته‌یران هێلین نه فڕاندن
تیشكێن وان ژ برسا مرین
ل هه‌می جها ل ده‌ردۆرێن مه
لۆرێنا ده‌نگێ گورگانه
كێلبێن خوه ژبۆ مه دهسین
جار هۆڤن، جار ژی ئه‌ژده‌هار
ڤان زێمارا
ڕۆندكێن خوینێ ژ چاڤێن
ڕۆژا مه ئینان خوار
ئه‌رد و ئه‌سمان
ژ زولماتێ
ل سه‌ر سه‌رێ مه
ل بن پێن مه قڕقچاندن
دل و جانێن
پیر و كالێن مه كوزراندن
بوونه ده‌هبه و
خوینا مه فڕكر و ڤه‌خوار
ئه‌ڤ چ مژه و چ دومانه؟
دونیا دوژه‌ها كوردانه!
لێ قه‌ده‌رێ ڕۆژ ئاڤا نه‌بوو
دلێ هۆڤان پێ شاد نه‌بوو
چیایێن مه، دۆوست و هه‌ڤال
بوون ئاڤاهی، سینگ و مه‌تال
تیر و خه‌نجه‌رێن وان بڕین
كه‌ڤرێن مه لێ بوونه شیر و
سه‌رێن قڕالا لێ بڕین
ده‌ڤێن وان لێ هاتنه درین
د قه‌فه‌س و زیندانان دا
بوونه جرد و د كونجان دا
گوهێن وان دشوڕ
سه‌رێ زوحاكێن سه‌ر كینجڕ
وه‌كی سه‌گا د ڕه‌وین و دڕ
خه‌ونا فیرعه‌ونێن گوڕ به‌گوڕ
د گوهێن گای دا مه سه‌رژێكر
ئاڤا چه‌م و ڕوبارێن شین
هناڤێن مه پێ هوین بوون و
ئو ژ ئه‌مرێ ئزرائیلی
ژ كفنێ سپی رزگار كرین
سلاڤه‌ك ژ ڕۆژا مه هات
شه‌ڤا تاری و ده‌ڤێن كێرا ل سه‌ر مه ڕاكر
بایه‌كێ هوین، تاڤیه‌كا مزگینیا
خه‌لات
ب سایا خوینا شه‌هیدا،
خه‌بات و خوها عه‌گیدا
نوو بهارێ ڕه‌نگێ خوه دا
گول و نێرگز،
هه‌لال و سوسن و به‌یبین
ل باوه‌شا ئازادیێ
ته‌ڤ بشكڤین
مه ده‌ست دا دستاڕێ جارا
بێده‌را ما هاته بای و
ئاشێ مه ژی هه‌ڤڕان هێرا
مێرگ و زۆزان و به‌یاران
خه‌ملا بوهارا دلان كر
عه‌ورێن ڕه‌ش چۆن بوو ڤه ساهی
ل گوڤه‌ندا بووك وزاڤا
ده‌نگێ تلیلیا ڤه‌دا
بوو ڤه دیلان بوو ڤه شاهی
31/7/2021
