باشترە ژن بەری 35 سالییێ خێزانا خۆ پێکبینیت
د. شرین سەعید تایبەتمەندا نەخۆشیێن ژنان و زارۆکبوونێ و نەزۆکیێ دیارکر کو گۆهرینێن جڤاکی یێن سەردەم، کچ و کوڕ ژ بەر خواندنێ یان مسۆگەرکرنا پاشەرۆژا ئابۆری و کاری پرۆسەیا هەڤژینیێ و دوگیانبوونێ پاشدئێخن، وێ هۆشداریدا کو ئەڤ گیرۆکرنە ئەگەر بێی پشکنین و شیرەتکاریا نۆشداری یت دبیتە ئەگەرێ دروستبوونا ئاریشەیێن مەزن د پاشەرۆژێ دا، ژ بەرکو دەمێ زێرین و هەرە گونجای بۆ دوگیانبوونا ئێکێ یا ژنێ، پشتی بیست سالییێ یە و پێدڤییە هەر ژنەک بەری کو بگەهیتە سیهـ و پێنج سالییێ پلانا خێزانا خۆ ب تەمامی دارێژیت، چونکی پشتی ڤی ژیی کوالێتییا هێکان بەرەڤ سستیێ دچیت و ئەڤ چەندە ژی مەترسییا تووشبوونا زارۆکی ب کێماسییێن جیناتی و نیشانێن داون یان همان مەنگۆلیزمێ زێدە دکەت
د. شرین سەعید ئەوژی دیارکر کو دوگیانبوونا پێشوەخت ژی د ژییێ کێمتر ژ بیست سالییێ دا هەیە و ل سەر ڤێ چەندێ گۆت: مەترسی د ڤی ژیێ بچووک دا پترن ژ بەرکو لەشێ کچێ و ب تایبەت حەوزێ وێ هێشتا ب تەمامی گەشە نەکریە دا کو بشێت ب ڕێکا سروشتی پڕۆسەیا ژدایکبوونێ ئەنجام بدەت و ئەڤ چەندە گەلەک جاران دایبابان نەچار دکەت بەرەڤ نشتەگەریێن قەیسەری بچن، دیسان مەترسییێن تووشبوونێ ب ژەهراویبوونا خوینێ و بلندبوونا فشارا خوینێ و کێمخوینیێ ل دەف دایکێن گەنج گەلەک پترن و زارۆکێن وان ژی د بن مەترسییا ژدایکبوونا پێشوەخت و کێمبوونا کێشێ دانە لەوما زانین و هۆشیارییا نۆشداری بەری هەر پێنگاڤەکێ بنەمایێ سەرەکیێ ئاڤاکرنا خێزانەکا ساخلەمە
دەمێ مە پرسیار ل سەر ڕێکارێن پێدڤی بۆ وان ژنێن د ژییێ سیهـ سالییێ یان پتر دا پڵانا دوگیانبوونێ دکەن کری، دکتۆرایێ ڕوونکر کو پێدڤییە ل لایەنێ کێم سێ بۆ شەش هەیڤان بەری دوگیانبوونێ سەرەدانا نۆشدارا تایبەتمەند بهێتە کرن داکو پشکنینێن گشتى و هۆرمۆنى و پشکنینا مخزونا هێکان و ڕێژەیا شەکرا سێ هەیڤی بهێنە کرن و دیسان وەرگرتنا حەبکێن فۆلیک ئەسید سێ هەیڤان بەری پڕۆسێ گەلەک یا فەرە دا کو پاشەرۆژا کۆرپەلەی ژ کێماسیێن زکماکی بهێتە پاراستن و پێدڤییە ڕێژەیا شەکرا دایکێ د کۆنترۆڵێ دا بیت و ژ شەش پۆینت دو بلندتر نەبیت دا کو چو مەترسی ل سەر ژیانا دایکێ و کۆرپەلەی چێنەبن دووماهی پەیاما دکتۆرایێ بۆ زەلامان بوو کو تێدا دیار کر ژییێ بابێ ژی کارتێکرنێ ل سەر دروستبوونا زارۆکی دکەت و پشتی ژییێ چل و پێنج یان پێنجی سالییێ کوالێتییا سپێرمان کێم دبیت و هەک شێوازێ ژیانا زەلامی یێ نەساخلەم بیت و کێشانا جگارە و نێرگیلان و قەڵەوی تێدا بن مەترسییا ژبەرچوونا زارۆکی د سێ هەیڤێن دەستپێکێ دا گەلەک بلند دبیت.
