باژێڕڤانیا ئاكرێ دەست ب هەوەكا بەرفرەهـ یا پاقژكرنا ئاڤڕێژ و سۆلینان كر
رەمەزان زەكەریا:
پەیڤدارێ سەرۆكاتیا باژێرڤانیا ئاكرێ راگەهاند: وەكو بەرهەڤیەك بۆ وەرزێ بارانبارینێ و رێگریكرن ل دروستبوونا لەهیان و كۆمبوونا ئاڤێ هۆبەیا خزمەتگوزارییان ل سەرۆكاتیا باژێرڤانیا ئاكرێ هەوەكا بەرفرەها پاقژكرنێ بۆ ئاڤڕێژ و سۆلینێن سنۆرێ باژێرڤانیێ دەستپێكر.
زێرەڤان تەمۆ، پەیڤدارێ سەرۆكاتیا باژێرڤانیا ئاكرێ بۆ ئەڤرۆ گۆت: «ڤەگوهاستن و چوونا ئاڤا بارانێ ب رەنگەكێ رێكوپێك و بێ ئاڕێشە، دووركرنا مەترسیێن لەهیان و پاراستنا گیان و مالێن وەلاتییان، پاقژكرنا هەموو وان جهێن ئاڤا بارانان لێ كۆم دبیت».
ناڤبری گۆت ژی: «تیمێن مەیدانی یێن باژێرڤانیێ د نوكە دا ل سەر كارێن خۆ بەردەوامن، ل هەموو گەڕەكێن باژێڕی پێنگاڤێن پاقژكرنێ پتر لێ كرینە، دا كو باژێڕ ب تەمامی بۆ وەرزێ زڤستانێ ئامادە بیت».
