بهری پاسورد ژ دهستێ ته دهركهڤیت ڤێ گوهۆڕینێ بكه
تەکنۆلۆژیا
ئەز دشێم بێژم کو پەیڤا تە یا نھێنی (Password) هێلا ئێکێ یا بەرگریێ یە ل هەمبەر وان هاکەرێن هەول ددەن بگەهنە هەژمارێن تە. گەلەک گرنگە پەیڤەکا نھێنی یا ب هێز بکاربینی و خۆ ژ شاشیان بپارێزی، لێ وەک دیار، ئەڤە بتنێ نە بەسە. ل ڤێرە ئەم دێ باس ل گوهۆڕینەکێ کەین کو پێدڤییە ب زووترین دەم ئەنجام بدەی دا کو هەژمارێن تە ژ دزیێ پاراستی بن.
ئارمانج پاراستنا هەژمارێن تە یێن سۆشیال میدیایێ، هەژمارێن بانکی، ئیمێل، نۆژینگەهێن ئۆنلاین و هەر هەژمارەکا دی یە کو تو رۆژانە بکاردینی. گوهۆڕینەکا سادە دشێت ئاستێ پاراستنێ ب رەنگەکێ بەرچاڤ بلند بکەت و زانیاریێن تە ب دروستی بپارێزیت.
چالاککرنا پشتراستکرنا دو ئاستی (Two-Factor Authentication)
گوهۆڕینا سەرەکی و پێدڤی، چالاککرنا تایبەتمەندییا پشتراستکرنا دو ئاستی یە. ئەڤ مژارە بۆ پاراستنا هەژمارێن تە یێن ئەلیکترۆنی گەلەکا فەرە، تەنانەت ژ بکارئینانا پەیڤەکا نھێنی یا ب هێز ژی گرنگترە. ئەڤە چینەکا دی یا پاراستنێ زێدە دکەت، کو کارێ هاکەران بۆ گەهشتن ب هەژمارێن تە گەلەک ب زەحمەت دکەت.
ئەڤ تایبەتمەندییە ب ناڤێ (2FA) ژی دهێتە نیاسین، و واتایا وێ ئەوە کو پێدڤییە تو پێنگاڤەکا دی یا دویێ ئەنجام بدەی بۆ چوونە ژوورێ د هەژمارا خۆ دا. ئەگەر پەیڤا تە یا نھێنی ژی بهێتە دزین، هاکەر دێ پێدڤی ب ڤێ پێنگاڤا دویێ بیت، کو دبیت کۆدەک بیت ژ لایێ بەرنامەیێن وەک (Google Authenticator) ڤە بهێتە دروستکرن.
تو دشێی کۆدێن پشتراستکرنێ ب رێیا نامەیێن کورت (SMS) وەرگری، لێ ئەڤە نە باشترین بژاردەیە. هەر چەندە ژ نەبوونا وێ باشترە، لێ ئەگەر هەیە هاکەر بشێن دەست ب سەر نامەیێن تە دا بگرن. لەوما، ئەم ئامۆژگارییا تە دکەین کو بەرنامەیێن تایبەت ب پشتراستکرنێ بکاربینی.
تو دشێی ڤێ خزمەتگوزاریێ بۆ گەلەک هەژماران بکاربینی، وەک سۆشیال میدیا، ئیمێل و مالپەرێن کڕین و فرۆشتنێ. د هندەک حالەتان دا، وەک هەژمارێن بانکی، بکارئینانا ڤێ تایبەتمەندیێ یا فەرە.
پێدڤی ناکەت بەردەوام پەیڤێن خۆ یێن نھێنی بگوھۆڕی
یا گرنگە بزانی کو پێدڤی ناکەت تو بەردەوام پەیڤێن خۆ یێن نھێنی بگوھۆڕی. دبیت تو هوسا هزر بکەی کو گوھۆڕینا وان ب بەردەوامی یا ب مفایە، لێ د راستی دا تو پێدڤی ب ڤێ چەندێ نینی، بەلکو دبیت تو خۆ تووشی مەترسیێن زێدەتر بکەی ئەگەر پاشێ پەیڤێن لاوازتر بکاربینی.
ئەگەر تو پەیڤەکا نھێنی یا ب هێز و پشتراست بکاربینی کو هەمی مەرج تێدا بن، پێدڤی ب گوھۆڕینێ ناکەت. واتە دڤێت پیتێن (مەزن و بچووک)، ژمارە و نیشانێن تایبەت تێدا بن. خۆ ژ بکارئینانا ناڤێ خۆ، رۆژا ژدایکبوونێ، یان هەر پەیڤ و ژمارەیەکا کو ب ساناهی بهێتە پێشبینیکردن بپارێزە.
لێ دڤێت پەیڤا خۆ بگوھۆڕی ئەگەر هەست ب مەترسییەکێ کر یان تە ژ ئامیرەکێ گومانا ڤایرۆسی لێ هەبیت چوو بیە د هەژمارا خۆ دا. د ڤان حالەتان دا، باشترە ب زووترین دەم پەیڤا نھێنی بگوھۆڕی.
ل دووماهیێ، گرنگترین گوھۆڕین کو پێدڤییە ب زووترین دەم ئەنجام بدەی، چالاککرنا تایبەتمەندییا پشتراستکرنا ب دو پێنگاڤانە. ئەڤە رێیەکا گەلەک ب مفایە بۆ پاراستنا هەژماران و وەک تەمامکەرەکێ بۆ پەیڤێن نھێنی کار دکەت، کو دێ هەر میننە هێلا ئێکێ یا بەرگریێ.
