بۆچی كهڤالێن شێوهكارێن كورد كێم دهێنه فرۆتن؟
سندس سالح سلێڤانەی
ل ههموو وهلاتێن جیهانێ شێوهكارێن وان رێزهكا مهزن ل دهف حكومهتێ، ههروهسا ل دهف خهلكێ وی وهلاتی ههیه، چونکۆ ئهو كهسێن داهێنهرن و دهمێ پێشانگهههكا شێوهكاری ڤهدكهن ب گۆژمێن مهزن كهڤالێن وان ژ لایێ حهز ژێكهرێن هونهری، ههروهسا خهلكێ وی وهلاتی ڤه دهێته كڕین و هونهرمهند ههبوویه كهڤالهكێ بتنێ ههتا ملیۆن دۆلاران فرۆتیه و ئهڤ چهنده بوویه دهرگهههك كو یێ بهردهوام بیت و كڕینا كهڤالێ وی دو مفا گههاندینێ، یا ئێكێ ئهو پارێ وهرگرتی دێ شێت ژیانهكا خۆش بۆ خێزان و زارۆكێن خۆ پێ دابینكهت، ههروهسا یا دویێ ژی ئهو چهنده دێ بو وی بیته هێزهك كو یێ بهردهوام بیت و بهردهوام داهێنانێ بكهت، لێ مخابن ل وهلاتێ مه ئهڤ چهنده یان نینه، یان ههكه ههبیت ژی دێ ب رێژهیهكا گهلهك كێم بیت، چونکۆ كهڤالێن شێوهكارێن كورد گهلهك ب كێمی دهێنه فرۆتن و ههكه هونهرمهندهك كهڤالێن خوە بفرۆشیت ژی دێ بهرامبهر پارهیهكێ گهلهك كێم بیت، لهورا ئهڤ چهنده دبیته هۆكار كو ئهڤ هونهرمهنده نهچار دبیت بۆ كارهكێ دی بكهت، ژ بەر کو وهكو مه گۆتی ب پارێ هونهری نهشێت ژیانا زارۆكێن خوە پێ خوەش بكهت، بۆ زانین مه ل كوردستانێ گهلهك هونهرمهندێن باش ههنه و كهڤالێن گهلهك باش و بهێز چێكرینه، لێ ژ بهر كو ژێ نههاتینه كڕین هندهك ژوان د عمبارێن مالێن خوە دا ههلگرتینه و شێوهكار ههبوویه د مالێ دا جهـ نهبوویه و كهڤالێن وی ل ڤێره و وێراهه پرت و بهلاڤ بووینه و ل هاڤینان ژ بهر گهرمێ و ل زڤستانان ژ بهر بارانێ زیان گههشتینه كهڤالێن وان و جاران ههبوویه ئهو كهڤال ب ئێكجاری ههلوهشیایه.
لهورا ل ڤێره پێشنیار دكهم ههموو دامودهزگههێن حزبی و ئیداری و ههتا یێن لەشکری ژی چالنجهكێ ب ڕاگههینن و ههر ئێك ژ لایێ خوە ڤه چهند كهڤالان بكڕیت و ل بارهگا و جهێ كارێ خوە ب ههلاویسن، ههلبهت ئهڤ چهنده دێ جوانیهكێ دهته جهێن وان، یا دویێ ژی دێ بیته ئەگەرەک كو پارهیهك بگههیته شێوهكاری كو ب شێت بهر ههر تشتهكی كهرهستهیێن وێنهچێكرنێ پێ بكڕیت، ههروهسا ژین و ژیارا زارۆیێن خوە ههتا رادهیهكی باشتر لێ بكهت، چونکۆ پتریا وان د ههژارن، ههروهسا دێ ههست پێ كهت كو ئهم ههموو یێ گرنگیێ ب وان و بهرههمێن وان ددهین.
