ب وێنه: دو ترێلان لێكدا
به‌رپرسێ بنگه‌هێ پۆليسێن هاتنوچوونێ ل ئه‌لقۆش راگه‌هاند كو ژ ئه‌نجامێ روودانه‌كێ د ناڤبه‌را دو ترۆمبێلێن بارهه‌لگر ترێل دا، دو وه‌لاتيێن تورك بريندار بوون.
پيشه‌نگێ هاتنوچووني، ره‌شاد ئيبراهيم، به‌رپرسێ بنگه‌هێ پۆليسێن هاتنوچوونێ ل ئه‌لقۆش بۆ ئه‌ڤرۆ نيوز گۆت: “ئه‌ڤرۆ رۆژا پێنجشه‌مبى رێكه‌فتى 7ى گۆلانا 2015ێ ل سه‌ر رێيا سه‌ره‌كيا ئه‌لقۆش بۆ شێخان ل نێزيك گۆندێ بێبانێ روودانه‌ك د ناڤبه‌را دو ترۆمبێلێن ژ جۆرێ بارهه‌لگر ترێل يێن ڤه‌گوهاستنا په‌ترۆلا خاڤ لێكدا”.
به‌رپرسێ بنگه‌هێ پۆليسێن هاتنوچوونێ ل ئه‌لقۆش زێده‌تر گۆت: “ئێك ژ وان ترۆمبێلان وه‌رگه‌ريا و گه‌له‌ك ژ په‌ترۆلا وێ يا خاڤ چو سه‌ر جادێ و ترۆمبێلا دژى ژ جادێ ده‌ركه‌فت و زيان گه‌هشتنێ”.
دا زانين ژى كو د ڤێ روودانێ دا دو وه‌لاتى بريندار بوون و ژ به‌ر كو برينا وان سڤك بوو، بۆ نه‌خۆشخانا ئه‌لقۆش هاتنه ره‌وانه كرن كو هه‌ردو ب ره‌گه‌ز تورك بوون.
پيشه‌نگێ هاتنوچووني، ره‌شاد ئيبراهيم نه‌ڤه‌شارت كو ژ ئه‌گه‌رێ له‌زاتيێ ئه‌ڤ روودانه روودايه كو ئێك ژ وان ترۆمبێلان بزاڤ كريه له‌زێ بكه‌ت و د ئه‌نجام دا ئه‌ڤ روودانه په‌يدا بوويه.
