تراژیدییا ئـەنفالان و ئـاوارەبوونـا سـالا (1988)
خـالد ئـەحمەد بـادی
مرۆڤ بەندێن خۆدایێ مەزنن، خۆدایێ مەزن مرۆڤ مللەت چێكرینە و مرۆڤ كرنە كەسانێن ب بها, گەلەك یا فەرە هەر تاكەك ب چاڤێن دلۆڤانیێ ب گیانەكێ دلسۆزیێ ب شێوەكێ ئارامیێ ب شێوازێن جوانیێ سەحكەتە هەڤدو، سەحكەتە مللەتێن دی ژی بكەن, یا فەرە ئەم ب تایبەت تاكێن كورد سەحكەینە هەمی هەوێن ئەنفالان؛ یێن كو دوژمنان ب سەرێ كوردان ئیناین, ئەگەر ئەم تاك تاك سەحكەینە هەوێن ئەنفالان، دێ ب ئێك چاڤ ئێك دیتن و ئێك هزر مەزناهی و مالوێرانیا ئەنفالان بینین، دێ هەمی ویستگەهێن قووناغێن ئەنفالان دا بینین یێن كو مللەتێ كورد ب شێوازەكێ ئاسایی سەحەكەتێ لێ دكەت, ب درێژاهیا دیرۆكێ جیهان یا د گەلەك قووناغان دا بۆری، هەمی قووناغ ب خۆڤە دیتینە، ئێك تمامكەرا یا دی بوویە شلقێن مەزن و بەرچاڤ ب هەمی كوژیێن مللەت و جڤاك و وەلاتێن جیهانێ كەفتینە و د ناڤا وان مللەتان دا، مللەتێ كورد ژی بەهرەكا مەزن ب بەر كەفتیە, هەردەم رۆژێن رەشتاری بووینە بەهر و بەرۆكا مللەتێ كورد ل هەمی پارچەیێن كوردستانێ, هەمی حوكمرانێن ل سەر كوردان بووینە دەستهەلاتدار، هەر ئێك ب شیانێن خۆ یێن جودا جودا ب هزر و پیلانێن خۆ یێن چەپەل ڤە رابووینە ب دوژمنكاریكرنا مللەتێ كورد, كار بۆ نەهێلان و بنبڕكرنا كوردان كریە، دوژمنان هەمی رێكخستنە بەر ب هەمی جۆران ڤە، ب كوشتنا كوردان خرابكرن و سۆتنا گوند و مالێن وان گرتن ئەشكەنجەدانا كوردان ب بێ بەهركرنا كوردان ژ هەر پشكداریەكا حوكمرانیێ و د ناڤ كاروبارێن دەولەتێ دا ب مامەلەكرنا كوردان وەكو وەلاتیێن پلە سێ و چار و وێڤەتر و هژمارتنا كوردان مینا (بیانی) ئانكو (اجانب) هەر دیسا دویركرنا كوردان ژ وەرگرتنا زانست و زانین پەروەدە و فێركرنێ, بۆ نموونە مەزنترین و بلندترین جهێن وەرگرتنا زانستی ل كوردستانێ بتنێ پەیمانگەه بوون، ئەو ژی یا كێم بوو و زوی ب زوی هەمی كەس نە دوەردگرتن ب تنێ یێن نێزیكی رژێمێ دهاتنە وەرگرتن ل كۆلیژ و پەیمانگەه هەر وەسا زەمالە (زمالە دراسیە) بۆ دروست دكرن و دهنارتنە ژ دەرڤەیی وەلاتی، مینا وەلاتێ رۆسیا چیك و سلۆڤاكیا، بریتانیا ئەلمانیا و ..هتد. بۆ زانین د شیانێن حوكمەتا ئیراقێ یا وی سەردەمی یا رۆخیای دا بوو كو كۆلیژە و زانكۆیێن هەرە باش و پێشكەفتی ڤەكەت ل كوردستانێ، لێ چ گرنگیدان نەدایە كورد و كوردستان پشتگوه هاڤێتیە و دوژمنان هەردەم ڤیایە كو نەزانین جاهلیەتێ ل ناڤ كوردان دا بەربەلاڤ بكەت ب تنێ بەرێ كوردان دایە پرسێن كلاسیك و كەڤنار كو هەولدان هەردەم دكرن كوردان ب عەشیرەتگەریێ جاشاتیێ كرێگرتیێ ڤە ب گرێدەن یان ژی كوردان مژویل بكەن بۆ بدەستڤەئینانا پاریێ رۆژێ بۆ خۆ و خێزانا خۆ. هەر دیسا ژ ئالیێ گەشت و گوزار ئاڤەدان كرن، پێشكەفتن شارستانیەتێ ڤە بتنێ هندەك پرۆژەیێن هاتینە دروستكرن، بتنێ بۆ خزمەتكرنا وان دوژمنان بوو.
