تێسلایێ بەرهەمەکێ نوو بۆ زارۆکان ئێخستە بازاڕی
کۆمپانیا تێسلا بەرهەمەکێ نوو ئێخستییە د بازاڕی دا کو نە ترۆمبێلە، بەلکو پایسکلەکێ هەڤسەنگییێ یە بۆ زارۆیێن ژیێ وان دناڤبەرا دو ههتا پێنج سالیێ دا. ئەڤ پایسکلە ب بهایەکێ دیارکری و ب دیزاینەکا تایبەت هاتییە دروستکرن کو شێوازێ داهێنانێ یێ کۆمپانیێ پێڤە دیارە.
پایسکل ژ ماددێ مەگنیسیۆمێ هاتییە چێکرن و کێشەکا سڤک هەیە. تایبەتمەندیا وێ یا سەرەکی ژی کورسیکەکا رێکخستییە کو دشێت ل دووڤ گەشەیا بالا زارۆکی د پێنج ئاستێن جودا دا بهێتە بلندکرن و نزمکرن. ئەڤ پایسکلە چ پایدەر نینن و زارۆ ب رێیا لنگێن خۆ هەڤسەنگییا خۆ دپارێزن و دشێن رابگرن.
ل دووڤ زانیاریێن تێسلا، ئەڤ پایسکلە بۆ زارۆیێن هەتا کێشا ٣٠ کیلۆگرامان یا گونجایە و بهایێ هەر دانەیەکێ ٢٢٥ دۆلارن. بڕیارە فرۆتنا ڤی بەرهەمی ل ٣١ێ تیرمههێ دەست پێ بکەت و دهێتە چاڤەڕێکرن ژ بەر داخوازیا زۆر ب زووترین دەم ل بازاڕی نەمینیت، هەروەسا هنارتنا داخوازیان بۆ کڕیاران د دویماهیا مەها تهباخێ دا دێ دەستپێبکەت.
