تەمبەلی نیشانا ماندیبوونا دەروونییە
زاخۆ، دلۆڤان هالۆ:
جڤاكناسەکێ د دیدارەکێ دا بۆ ڕۆژنامەیا ئەڤرۆ دیارکر کو هندەك جاران پاشئێخستنا کاران تەمبەلیە، لێ زۆربەی جاران تەمبەلی دیاردەیەکا دەروونی یە و گۆت؛ چونكی کار هینگێ دهێتە پاشئێخستن ل دەمێ کو مرۆڤ حەز نەکەت وی کاری ئەنجام بدەت.
جڤاکناس لاجان محەمەد دیار کر کو تەمبەلی کێمبۆنا حەز و بزاڤایە بێی کو ترس و نە ئارامی ئەگەر بن، ئانکو مرۆڤێ تەمبەل گەلەك جاران بەرامبەر ئەنجامدانا کارەکێ بتنێ یێ بێ هەستە، لێ مرۆڤێ کارێ خوە پاش دئێخیت د دەروونێ خوە دا نە یێ ئارامە و هەست ب گوننەهێ دکەت و گۆت؛ ئانکو پاشئێخستنا کاری حالەتەکە کو وی کەسی دڤێت کارێ خوە ئەنجام بدەت، لێ ژ ئەگەرێ ترسێ یان فشارێ یان ماندیبونا دەروونی نەشێت دەستپێ بکەت.
لاجانێ گۆتژی: “دەمێ مرۆڤ کارێ خوە پاش دئێخیت دڤێت مرۆڤ ژ خوە پرسیار نەکەت بۆچی ئەز یێ تەمبەلم یان بۆچی لاوازم؟ بەلکو دڤێت پرسیارێ ژ خوە بکەت کا دلێ من چ دڤێت، ئەرێ ئارامی و پشتڕاستی دڤێت یان ژی پێنگاڤەکا بچووك یا بێ فشار دڤێت”.
جڤاكناسێ گۆتژی: “جاران مرۆڤ ژ ترسێن وێ چەندێ کارێ خۆ پاش دئێخیت، هەکە ب سەرکەفتیانە ئەنجام نەدەت و بێ هێزیا وی دیار ببیت و ژبەر ئاخفتنێن دەوروبەران و خەلکی ژی، لەوما ب بێدەنگی کارێ خوە پاش دئێخیت”.
جڤاکناسێ سالۆخەتێن کەسێ تەمبەل دیار کرن و گۆت: “گەلەك جاران کەسێ تەمبەل لاواز دهێتە دیتن، لێ د ڕاستی دا دلێ وی ماندیە و یێ بێ هێزە و هەستێن وی کێم بووینە”.
جڤاکناسێ دیار کر، پێدڤیە مرۆڤ ژینگەهەکا دەروونی یا ئارام بۆ خۆ دروست بکەت و ب پێنگاڤێن بچووك و سادە دەست ب کارێن خۆ بکەت و گۆت؛ “کلیلا سەرکەفتنێ ل سەر تەمبەلیێ نە ب توندوتیژیێ یە، بەلکو ب گوهداریکرنا دەروونی و دابینکرنا پشتڕاستیێ یە دا کو مرۆڤ بشێت وزەیا خۆ یا ڤەشارتی د کار و بزاڤان دا دووبارە بکاربینیت”.
