دهۆك و زاخۆ ژ دەرڤەی یاریگەهێن خوە د تاقیكرنێن بهێز دانە
قەیس وەیس :
چاڤەڕێ دهێتە كرن سوبەهی هەتا ئێكشەمبییا بهێت دەست ب هەڤڕكیێن گەڕا 10ێ ژ خولا ستێرێن ئیراقێ یا فوتبۆلێ ل یاریگەهێن جودا بهێنە كرن، دهۆك بۆ بەردەوامییا ئەنجامێن باش و زاخۆ بۆ ڤەگەڕیانا سەركەفتنان و هەولێر و نەورۆز بۆ شەڕێ سەرێ لیستێ.
ئەلهۆیێن چیا بۆ سەركەفتنا سێیێ
بڕیارە تیما یانەیا دهۆك ل شەمبییا بهێت ل باژێرێ فەلۆجە یا ئەنباری بیتە مێڤانا یانەیا جەولان ل دەمژمێر شەشێ ئێڤار د یارییەكا ب سانەهی نابیت بۆ ئەلهۆیێن چیا ئەوا ل ڕێزا حەفتێ دهێت ب كۆمكرنا 12 خالان ژ دو سەركەفتن، شەش وەكهەڤی و خوسارەتیەكێ، 14 گۆل تۆماركرینە و 11 گۆل ل سەر هاتینە تۆماركرن، ژلایێ خوەڤە یانەیا ئەلجولان 11 خال كۆمكرینە ل ڕێزا 10ێ دهێت، سەركەفتنا ئەلهۆییان دێ جهێ خوە پارێزیت لێ خوسارەتی یان وەكهەڤی دێ كارتیكرنێ ل سەر پاشڤەچوونا وێ كەت.
ڕاهێنەر یاریێ ب هەستیار دانایە
د كۆنگرەیێ رۆژنامەڤانی دا یێ ئیرانی یەحیا گولمحەمەد ڕاهێنەرێ تیما یانەیا دهۆك گۆت: هەر یارییەكا ژ دەرڤەیی یاریگەها خوە دكەین پلان و شێواز جودایە ژبەركو بەرانبەر یانەیەكێ دكەین خودان ئەرد و جەماوەرن، هەر یاریەكا دكەین ژی ب سانەهی نابیت و یا هەستیارە، ب هیڤی نە وەكو یارییا بۆری ب ئاست و ئەنجام بەردەوامییێ بدەینە سەركەفتنێ، من باوەری ب شیانێن یاریزانێن خوە هەیە كو دێ ب دلخوەشی ڤەگەڕین.
زاخۆ پێدڤی ب ڤەگەڕیانێ یە
ژلایێ خوەڤە تیما یانەیا زاخۆ ل شەمبییا بهێت دێ ل پایتەختێ ئیراقێ بەغدا بیتە مێڤانا یانەیا نەفت ل دەمژمێر 8:30 شەڤ، د یارییەكا دی یا بزەحمەت دا بۆ كوڕێن خابووری ئەوێن د كاودانەكێ خراب یێ ئەنجامدان دا دەرباز دكەن، زاخۆ نەهـ خال كۆمكرینە ل ڕێزا 12ێ دهێت ب دو سەركەفتنان، سێ وەكهەڤیان و چار خوسارەتیان، حەفت گۆل هەنە لێ 12 گۆل ل سەر هاتینە تۆماركرن، ژلایێ خوەڤە یانەیا نەفت د ڕەوشەكا باش دایە ئەوا پێنج سەركەفتن ئینایین ل رێزا پێنجێ دهێت ب كۆمكرنا 18 خالان، تاقیكرنەكا بزەحمەتە بۆ كوڕێن خابووری ئەوێن لبن گڤاشتنێن پشتەڤانێن خوە.
ڕاهێنەرێ زاخۆ هیڤی خوازە ب سەركەڤن
د پرێس كونفرانسێ رۆژنامەڤانی دا یێ قەتەری تەلال ئەلبلوشی ڕاهێنەرێ تیما یانەیا زاخۆ گۆت: د یاریێن بۆری دا ڕەوشا تیما مە گەلەك یا باش نەبوو و ئەنجام بەرۆڤاژی ئاستێ تیمێ بوون، ل سەر چەند شاشییان ڕاوەستیاینە، یاری بەرانبەر نەفتێ ب سانەهی نابی تلێ ئەم پێدڤی ب سەركەفتنێ نە ژبۆ ڤەكرنا گرێیا ئەنجامێن لاواز و ڤەگەڕیان بۆ ناڤ هەڤڕكیێن پێشەنگییێ.
هەولێر ژ كۆپا كەنداڤی بۆ ستێرێن ئیراقێ
پشتی تیما یانەیا هەولێرێ ئێكەم یارییا خوە ژ كۆپا كەنداڤی ئەنجامدایی بڕیارە ل شەمبییا بهێت دناڤ ئەرد و جەماوەرێ خوە دا یانەیا مووسل ل دەمژمێر شەشی مەغرەب مێڤان كەت، كوڕێن كەلهە و منارە ل ڕێزبەندییا چارێ نە ب كۆمكرنا 18 خالا ژ پێنج سەركەفتنان، سێ وەكهەڤی و ئێك خوسارەتی هەیە، 13 گۆل تۆماركرینە و چار لسەر هاتینە تۆماركرن، ژلایێ خوەڤە یانەیا مووسل هەشت خال هەنە ل ڕێزا 17ێ دهێت.
نەورۆز دێ یانەیا بەسرایی مێڤان كەت
چاڤەڕێ دهێتە كرن سوبەهی ئەینی تیما یانەیا نەورۆز ل یاریگەها خوە یانەیا مینا یا بەسرایی مێڤان بكەت، نوونەرا سلێمانییێ ژی د دەمەكێ باش دا دەرباز دكەت ئەوا 18 خال كۆمكرین ل رێزا دویێ دهێت ژ پێنج سەركەفتن، سێ وەكهەڤی و ئێك خوسارەتی هەیە، ژلایێ خوەڤە یانەیا مینا 12 خال كۆمكرینە ل ڕێزا هەشتێ دهێت، ئەڤ یارییە دێ ل دەمژمێر شەشی مەغرەب هێتە كرن.
نوونەرا كەركووكێ دێ زەورا مێڤان كەت
ژلایێ خوەڤە یانەیا غاز ئەلشیمال یا كەركووكی دێ ل یاریگەها نەورۆزێ مێڤاندارییا یانەیا زەورا ل دەمژمێر شەشی مەغرەب كەت، نوونەرا باژێرێ كەركووكا دلێ كوردستانی هەشت خال كۆمكرینە ل ڕێزا 13ێ دهێت بتنێ ئێك سەركەفتن، پێنج وەكهەڤی و سێ خوسارەتی هەنە، هەڤڕكا وێ زەورا ل ڕێزا سێیێ دهێت ب كۆمكرنا 18 خالان.
ژ یاریێن دی یێن ڤێ گەڕێ
رۆژا ئەینی 16-10-2026
كەربەلا- ئەلغراف، دەمژمێر شەشی مەغرەب.
كارەبا- تەلەبە، دەمژمێر 8:30 شەڤ.
دیالا- نەفت میسان، دەمژمێر 8:30 شەڤ.
رۆژا شەمبی 17-10- 2026
جەوییە- ئەلگەرمە، دەمژمێر 8:30 شەڤ.
یاریێن رۆژا ئێكشەمبی 18-10-2026
شورتە- كەرخ، ل دەمژمێر 8:30 شەڤ.
هەلوەستێ گشتی بەری دەستپێكرنا هەڤڕكیێن گەڕا 10ێ
1- ئەلگەرمە 23 خال.
2- نەورۆز 18 خال.
3- زەورا 18 خال.
4- هەولێر 18 خال.
5- نەفت 18 خال.
6- شورتە 16 خال.
7- دهۆك 12 خال.
8- مینا 12 خال.
9- جەوییە 11 خال.
10- جولان 11 خال.
11- دیالا نەهـ خال.
12- زاخۆ نەهـ خال.
13- غازئەلشیمال هەشت خال.
14- كارەبا هەشت خال.
15- تەلەبە هەشت خال.
16- نەفت میسان هەشت خال.
17- مووسل هەشت خال.
18- كەرخ حەفت خال.
19- ئەلغراف شەش خال.
20- كەربەلا شەش خال.
