دویکێلا درەوان
مستەفا مەلا سەلیم ئاکەرەیی
وی نەدزانی دێ باوەرییا خۆ ب کێ ئینیت، ھەدرەم د گێلەشۆکا ھزران دا بوو، دا ھزر کەی ئەڤ گەردوونە ھەمی یا لسەر ملێن وی ڕاوەستای، ھەر شاشییەک دیتبا دلگران دبوو، ھندەک ڕێزێن ڕوژنامەیێ دا خوینیت و پاشان دا لویل دەت و ھاڤێتە پشت خۆ.
د دلێ خۆ دا دگۆت: ھەمی تشت درەون، ھەر کەسەک ژلایێ خۆڤە یێ درەوا دکەتن. لێ داکو پیچەک سەرێ وی تەنابیتن قەستا گازینۆیەکێ کر، دیت ھندەک یێ قومارێ دکەن و ھندەک ژی یێ قەھوێ و چایێ ڤەدخون و ھندەکێن دی ژی یێ نارگیلێ دکێشن و قاپیێن مەزن دبەردەنەڤە و پەسنا ئێکودو دکەن، ھەر کەسەک یێ بۆ خۆ دئاخڤیت، لێ ژ لڤینا دەست و جەستەیێن وان دا ھزر کەی ھەمی یێن درەوان ل ئێک و دوو دکەن، دویکێلا جگارا و نارگیلان ئەسمانێ گازینۆیێ وەکی عەوران داپۆشی بوو.
وی د دلێ خۆدا دگۆت: خودێ دزانیت کا چەند درەو و بوختان دگەل ڤێ دویکێلێ بلندبووینە، ئەگەر بارودۆخەکە ب ڤی دەست و داری بیت؛ چێدبیت ئەڤ سوحبەتێن ل ڤێرێ دھێنە کرن تێرا ڕۆمانەکا ھزار لاپەڕبیت.
وی ڕۆژنامەیا خۆ ڤەکر و ھێل لبن ھەمی مانشێتا کێشا و ڕەشکرن، دویماھیکێ تایتلێ گۆتارەکێ پێش چاڤێ وی کەفت كو نڤیسیبوو (کۆمەلگەهـ ب درەوان ژناڤ دچیت)، پشتی خواندی سەرێ خۆ ھەژاند و لبن لێڤکارا ب ئاخینكڤە دگۆت: کەسێ ھندی تە درەو نەکرینە. پاشی ژ گازینۆیێ دەرکەفت، ھەڤالەکێ وی ب ڕەخ ویڤە یێ ڕونشتیبوو و گوتێ: ھێشا زوی یە… تو بۆچی ڕابووی. وی بەرسڤ دا و گۆت: دێ چم پەرتووکەکێ بۆ خۆ کرم؛ چونکی ئەو باشترین ھەڤالە!.
