دەمژمێر ١:١ خۆلەک
ئەڤراز حامد نسری
ل شوینا کو ئەڤ شەڤە ب هیڤییا سپێدێ بکەینە خەو، ئەز د ناڤ مژویلانکێن خەیالێن خوە دا یێ بەرزەمە، شەش دەمژمێرێن دی ماینە بۆ وێ سپێدەهیا کو جاران مە دزانی دێ چەوا دەست پێ کەت: جۆش و خرۆش، تەلەفۆنێن بابۆی بۆ مامۆی، ئامادەکاریێن دادێ بۆ خوارنێن سەیرانێ و ئەو قەرەبالغا زارۆکان کو مال دهەژاند.
جاران دڤان دەمژمێران دا مە پارچەیێن خوەشییا خوە دکرنە د سندۆقا ترومبێلێ دا و بەرەڤ دەشت و چیایێن کوردستانێ ب ڕێ دکەفتین، ئەو بێهنا گوشتی و دەنگێ سترانان هێشتا ل گوهێن من ماینە، هێشتا وێنەیێ بابۆی ل بەر چاڤێن منە دەما پشتی فراڤینێ دنڤست، ل وی لایێ دی ژی دادێ و ژنمامێن من ب سوحبەتێن خوە یێن گەرم ڤە مژیل دبوون، بەحسێ فلانی و بێڤانی دکرن و تژی کەنێ دبوون، ئەز و پسمامێن خوە ژی وەک زەلامێن مالێ مە پیاسە دکرن و د ناڤ وێ بێدەنگییا جگارە کێشانێ دا مە بەحسی خەونێن خوە دکرن، پا دخۆش و ب تام بوون ئەو نەورۆز.
بەلێ ئەڤ سالە، نەورۆز یا بێ دەنگە.
ئەو یاریێن ئاگری یێن جیهان دهەژاند، ئەڤ شەڤە دبێدەنگن، جادەێن کو جاران ب ترومبێلان دهاتنە گرتن، نوکە چۆل و سارە، نەورۆزا ئەڤ سالە نە وەک یا پارە و نە وەک یا پێرارە، ئەڤ سالە جیهانێ هەمییێ دەرگەهێن خوە ل سەر خوە گرتینە، ئەم د مالێن خوە دا یێن زیندانکرین، ژیان وەک تشتەکێ بێ گیان لێ هاتبوو.
من بەری نوکە ژی دگۆت مرۆڤ د خرابن، نوکە ژی ل سەر وێ باوەرێ مە، ئەز نزانم مرۆڤان ئەڤ جیهانە تێك دایە یان ژی هێزەکا مەزنتر دڤێت مە هشیار کەت؟ “کۆڤید-١٩” هات و جیهان هەمی وەک پارچە کاغەزەکێ د دەستێن خوە دا چرووساند، هندەک مرن، هندەک ترسیان، و هندەک ژی د ناڤ دلێ خوە دا مرن، کێ دگۆت دێ ڕۆژەک هێت و نەورۆز ب تنێ بێهنا کەرەنتینێ و بێدەنگییێ ژێ هێت؟
بەلێ، د ڤێ تاریاتییێ دا ژی دڤێت ئەم بێ هیڤی نەبین، خودایێ کو دەرد دای، دێ دەرمانی ژی دەت، دبیت ئەڤە تاقیكرنەک بیت بۆ وان مروڤێن دفن بلند دا کو بزانن ئەرد و ئەسمان یێن خودێ نە، یا ل سەر مە پێدڤی خوەراگرییە، ئەگەر خودێ ڤیابیت ئەڤ ڤایرۆسە بگەهیتە مە، دێ هێت؛ ئەگەر ڤیابیت ئەم بژین دێ ژین، رازیبوون ب قەدەرێ ئارامییا دلێ مرۆڤی یە، هندەک جاران د ناڤ شەڕی دا خێرەکا ڤەشارتی هەیە.
د ناڤ ڤان هزرێن کویر و خەمگین دا، دەنگێ “الله أكبر” یێ بانگێ سپێدێ ل بەر گوهێن من لێدا، ئەز ژ جیهانا خەیالان هاتمە دەر، قەلەمێ خوە من دانا و ب دەستنڤێژەکا سار، من خوە بۆ نڤێژا سپێدێ ئامادە کر، من زانی کو ژیان یا بەردەوامە، ب شێوازەکێ دی، بەلێ هەر یا بەردەوامە.
