دەمێ دبێژم من تو دڤێی
رەمەزان ئیسماعیل گەرەگوهی
دەمێ دبێژم من تو دڤێی
ئەو من ژ بەر وان
دەڤ و لێڤ و
چاڤ و بری و دێمێ تەیە
هندی دشەنگ و جوان و ڕندن..
ئەو من ژبەر وان
مژویلانک و
کەزی و بسک و پڕچا تەیە
ڕەوشا وێ بەژنا بلندن..
ئەو من ژبەر وان
هنارۆکێن
سۆر و سپیێن ڕویکێن تەیە
هندی ل جەم من
دشرین و ناز و پەسندن..
دەمێ دبێژم من تو دڤێی
ئەو من ژبەر وان
گڕنژین و بشکوڕین و
کەنی و خوەشییا پەیڤێن تەیە
هەردەم ڕۆناهی و ئەلندن..
ئەو من ژبەر وان
کەسایەتی و
سەرەدەریێن باشــێن تەیە
بۆ من مۆم و چرا و فندن..
ئەو من ژبەر وان
سـالۆخــەت و
سنج و کارێن چاکێن تەیـە و
هندی بێژی.. بۆ من هنـدن!.
١٩/ ١٢ /٢٠٢٥