سایکوپات تێکچوونا کەساتییە نەک نەخۆشی
بێوار حەمدی:
پتریا ئەو کەسێن تێکچوونا کەسایەتییا سایکۆپاتی ل دەڤ هەبیت، هەستێ وژدانێ ل دەڤ نامینیت. دەروونناسەکی ژی دیار کر کو سایکۆپاتی نەخۆشیەکا دەروونی نینە، بەلکو تێکچوونەکا کەسایەتییە، و ژلایێ ساخلەمییا گشتی ڤە، بارودۆخێ ڤان کەسان باشترە ژ نەخۆشێن دەروونی.
دەرونناس، رەشاد بەشار د دیدارەکێ دا بۆ ڕۆژنامەیا ئەڤرۆ دیار کر کو سایکۆپاتی نەخۆشیەکا دەروونی نینە، بەلکو جۆرەکە ژ تێکچوونێن کەسایەتییا مرۆڤی و گۆت؛ ئەو کەسێن ئەڤ تێکچوونە ل دەڤ هەین، ژلایێ ساخلەمییا عەقلی و گشتی ڤە باشترن ژ نەخۆشێن دەروونی، لێ ئەگەر ئەڤ حالەتە بەردەوام بوو و چارەسەر نەکر، ڕەنگە ل پاشەڕۆژێ بچیتە د خانا نەخۆشیێن دەروونی یێن دژواردا.
رەشاد د بەردەوامیا ئاخفتنێن خۆدا دیار کر کو ئەو کەسێن تێکچوونا سایکوپاتێ لدەڤ هەی پتریا وان هەستێ وژدانێ لدەڤ نامینیت و دبنە ئەو مرۆڤ یێن کو ب ئازاردان و بریندارکرنا کەسێن بەرامبەر دلخۆش دبن و گۆت؛ ب گشتی ئەڤ کەسە د بێ بەرپرسایەتی و فێلبازن، هەرچەندە زمانەکێ خوش وسادە هەیە، لێ بو هندێ یە دا کەسێن دەوروبەر د سەردا ببەن “
دەرووناسی ئەو چەندە ژی دا زانین کو لدووڤ ڤەکۆلینان، ب ڕێژەیا (1.5%) ژ خەلکی ئەڤ ئاریشەیە ل دەڤ هەیە، کو ژ ئەگەرێن جڤاکی، بایۆلۆژی یێن مێشکی و ئەو ژینگەها پەروەردەیی یا مرۆڤ تێدا مەزن بووی پەیدا دبیت و گۆت؛ لەوما ژی یا پێدڤییە چارەسەریا دەروونی ب ڕێیا تەکنیکا ڕەفتاری (CBT) دگەل دا بهێتە ئەنجامدان، و ئەگەر پێدڤی کر، باشترین جۆرێ چارەسەریا ب ئاخفتنێ (Talk Therapy) وەربگرن دا کو فێری ڕەفتارێن دروست و ساخلەم ببن.
