شەش رێک بۆ دوورکەفتنێ ژ پەنجەشێرێ

بەرپەرێ‌ ساخلەمیێ‌:

پەنجەشێر نەخۆشییەکا کوژەک و بێهێڤیکەرە، بەلێ بەری مرۆڤ تووش ببیت، دشێت خۆ ژێ بپارێزیت.
​سەرباری هندێ کو ڤەکۆلینێن زانستی د بەردەوامن بۆ دیتنا ڕێکێن نوی دا کو ڕێگریێ ل پەنجەشێرێ بکەن، بەلێ تایبەتمەندێن نۆشداری ل “مایۆ کلینیک” جەختێ ل سەر هندێ دکەن کو گۆهورینا شێوازێ ژیانێ کاریگەرییەکا ڕاستەوخۆ ل سەر کێمکرنا ئەگەرێن تووشبوونێ هەیە.
​ل ڤێرێ دێ چەند ئامۆژگاریێن سەرەکی بەرچاڤ کەین:

-1 دوورکەفتن ژ تووتنێ (جگارەکێشانێ)
​کێشانا جگارە و نێرگێلان گرێداییە ب پەنجەشێرا سیهان، دەڤی، گەوریێ، پەنکریاسی، میزڵدانێ و گولچیسکان. هەتا مانا مرۆڤی دبن کاریگەریا دووکێلا کەسێن دی دا مەترسییان زێدە دکەت. جۆرێن دی یێن تویتنێ وەک چوینێ (مژتنێ) ژی دبنە ئەگەرێ پەنجەشێرا دەڤی و گەوریێ.

-2 خوارنا خوارنەکا ساخلەم
​گرنگیدان ب زەرزەواتی، فێقی، دانەوێڵەیێن تەمام و باقلەمەنییان، و کێمکرنا گوشتێ سۆر، گوشتێ دەستکرد (قۆتیان) و چەوریێن تێرکربووی مەترسیا پەنجەشێرێ کێم دکەت. هەروەسا دوورکەفتن ژ کحولی ژی مەترسیا پەنجەشێرا کۆلۆنێ، مەمکی، جەگەر و سیهان دوور دکەت.

-3 پاراستنا کێشێ ساخلەم و وەرزشکرن
​کێشا گونجای مەترسیا شێرپەنجەشێرا پەنکریاسی، جەگەرێ، قۆلۆن و گولچیسکان کێم دکەت. ئەنجامدانا ١٥٠ دەقیقێن وەرزشا ناڤنجی یان ٧٥ دەقیقێن وەرزشا دژوار د حەفتییەکێ دا، نە تنێ کێشێ ڕێک دئێخیت، بەلکو ب تنێ ژی مەترسیا شێرپەنجەشێرا مەمکی و کۆلۆنی کێم دکەت.

-4 پاراستنا پیستی ژ تیشکا ڕۆژێ
​پەنجەشێرا پیستی ئێکە ژ بەربەلافترین و ب ساناهیترین جۆران بۆ ڕێگریکرنێ. پێدڤییە د ناڤبەرا دەمژمێر ١٠ی سپێدێ بۆ ٤ی ئێڤاری د بن ڕۆژێ دا نەمینی، و سێبەر، کلاڤ و بەرچاڤکێن ڕۆژێ بکاربینی.

-5 ڤاکسینێ دژی ڤایرۆسان
​وەرگرتنا ڤاکسینێ “هێپاتایتیس B” (زەرکێ) ڕێگریێ ل پەنجەشێرا جەگەرێ دکەت. هەروەسا ڤاکسینێ ڤایرۆسێ پاپیۆمایێ مرۆڤی (HPV) کو ل ڕێیا سێکسێ دگوهێزیت، دشێت زارۆک و گەنجان ژ پەنجەشێرا مالبچووکی، کۆئەندامێ زاوزێ، و پەنجەشێرا سەری و گەوریێ بپارێزیت.

-6 پشکنینا نۆشداری یا دەوری
​ئەنجامدانا پشکنینێن پێشوەخت و دەوری بۆ پەنجەشێرێن پیستی، قۆلۆنی، مالبچووکی و مەمکی، دەرفەتا دیتنا نەخۆشیێ د قۆناغێن دەستپێکێ دا زێدە دکەت، کو ئەڤە ژی دەمێ گونجایە بۆ هندێ کو چارەسەری ب سەرکەفتیانە کار بکەن.

کۆمێنتا تە